اتىمتاي مەن قۇرالاي بۇگىندە احمەت, ءاليحان ەسىمدى ەكى ۇل, سەگىز قىز تاربيەلەپ وتىر. كوپبالالى وتباسىنىڭ تۇرمىس جاعدايىمەن تانىسقان قالا اكىمى باتىر اناعا بەسىك اربا سىيلاپ, بالالارعا بازارلىق-تاتتىلەردەن ۇلەستىردى.
– وسپانوۆتار وتباسىنىڭ اۋدانى 58 شارشى مەتردەي پاتەرى بار. ارينە, بۇل ون بالاعا تارلىق ەتەدى. الايدا تار ءۇيدى مەملەكەتتىك تۇرعىن ءۇي قورى ەسەبىنەن كەڭەيتۋگە زاڭ مۇرسات بەرمەيدى. بىراق زاڭعا قايشى كەلەدى دەپ قول قۋسىرىپ وتىرا بەرۋگە تاعى دا بولمايدى. سوندىقتان ماسەلەنى شەشۋ ءۇشىن دەمەۋشىلەردىڭ كومەگىنە جۇگىنۋگە تۋرا كەلدى, – دەدى مارات جۇندىباەۆ.
«بولاشاق كونستراكشن» قۇرىلىس كومپانياسىنىڭ قۇرىلتايشىسى ءۋاليحان نىسانوۆ وسپانوۆتار وتباسىنىڭ پاتەرىن جاڭا سالىنىپ جاتقان ەليتالىق تۇرعىن ءۇي كەشەنىندەگى كەڭ پاتەرگە ايىرباستاپ بەرەمىن دەپ وتىر.
– نەگىزى بۇل وتباسىنىڭ جاعدايى جامان ەمەس, اشىق, ەڭبەكقور, جاقسى كىسىلەر ەكەن. ولار تۋرالى الەۋمەتتىك جەلىدەن وقىعانمىن. سودان جاقىندا جۇمىس بارىسىمەن قالا اكىمىنە كىرگەنىمدە ول كىسى وسىنداي كوپبالالى وتباسى بار, ەگەر قول ۇشىن بەرىپ, قولداۋ كورسەتەمىن دەگەن نيەتىڭىز بولسا, حابارلاسارسىز دەدى. كەڭسەگە كەلگەن سوڭ ماماندارمەن كەڭەسىپ كورسەم, كومەكتەسۋگە مۇمكىندىك بار ەكەن. بىردەن وڭ شەشىم قابىلداپ, اكىم ەكەۋمىز بارىپ, قۋانتىپ قايتتىق. مەنى قۋانتقانى, ءبىز سالىپ جاتقان ءۇي سول ماڭايدا, بالالاردىڭ قازىر وقىپ جاتقان مەكتەبىنە جاقىن. ءبىز بارعاندا ۇيگە ادام تولىپ كەتتى, ءۇي يەلەرى داستارقان جايىپ, تورگە شاقىرعان سوڭ, استان اتتاپ كەتۋگە ىڭعايسىزدانىپ, ۇستەل باسىنا وتىرىپ ەدىك, قۋانىش ۇستىندە بايقاماي ىستىق شاي ءىشىپ قويىپ, ورازامدى بۇزىپ الدىم. ەندى اللا كەشىرسىن, بۇيىرسا كەيىن وتەپ الارمىن, – دەپ كۇلدى ءۋاليحان نىسانوۆ.
قاسيەتتى رامازان ايىندا جاسالعان ىزگى امال, شاراپاتتى ءىستىڭ ساۋابى مىڭ ەسە مول. شاڭىراعى كەڭەيىپ, كوڭىلى وسكەن كوپبالالى اكە اتىمتاي دا اتىمتاي دەمەۋشىلەرگە اعىنان جارىلىپ العىس ايتتى.
– مەملەكەتتەن الاقان جايىپ سۇراماساق تا, وزدەرى ءبىلىپ قولداۋ كورسەتىپ جاتقان وبلىس, قالا باسشىلارىنا, قۇرىلىس كومپانياسىنىڭ باسشىسى ءۋاليحان نىسانوۆقا, تىلەكشى بولعان كوپشىلىككە وتباسىمنىڭ اتىنان راحمەتىمدى ايتامىن! قاسيەتتى رامازان ايىندا جاساعان جاقسىلىقتارى اللادان قايتسىن دەپ تىلەيمىن, – دەدى اتىمتاي وسپانوۆ.
جاڭا سالىنىپ جاتقان تۇرعىن ءۇي كەشەنى بيىل تامىز ايىندا پايدالانۋعا بەرىلەدى.
قوستاناي
