وتكەن سەنبىدە وبلىس اكىمىنىڭ ورىنباسارى ۆ.يونەنكو مەن وبلىستىق توتەنشە جاعداي دەپارتامەنتىنىڭ باسشىسى, ازاماتتىق قورعانىس پولكوۆنيگى ءبىرجان كارىموۆ باستاعان جۇمىس توبى «ەس-145» تىكۇشاعىمەن وبلىس ورتالىعىنىڭ ماڭايىنا, سونداي-اق قوستاناي, اۋليەكول, ناۋىرزىم اۋداندارىنىڭ اۋماعىنا اۋەدەن باقىلاۋ جۇرگىزدى. مونيتورينگتىك توپ مىنگەن تىكۇشاق ناۋرىزىم اۋدانىنىڭ بۋرەۆەستنيك اۋىلىنا قونىپ, اۋىل ىشىندە ورنالاسقان بوگەتتەردەگى ەرىگەن قار سۋىنان تونەتىن قاتەر جوق ەكەنىن انىقتادى.
– اۋليەكول اۋدانىنداعى ديەۆ ەلدى مەكەنىنىڭ توڭىرەگىندە, ناۋرىزىم وڭىرىندەگى ولەڭدى اۋىلىنىڭ ماڭايىندا ءالى دە قار جاتىر. دەگەنمەن, ءبىز ۇشىپ وتكەن ءۇش اۋداننىڭ اۋماعىندا قاردىڭ كوبى ەرىگەن. ساي-سالادا جاتقان قىزىل سۋدان ەلدى مەكەندەرگە ءتونىپ تۇرعان قاۋىپ جوق. زەرتتەۋ ناتيجەلەرى بويىنشا ناۋرىزىم اۋدانىنىڭ اكىمى ق.ابىشەۆكە بۋرەۆەستنيك اۋىلىندا دا, جالپى ناۋرىزىم اۋدانى بويىنشا دا بەلسەندى قار ەرۋ كەزەڭىندە سۋ تاسقىنى قاۋپىن ازايتۋ جانە توتەنشە جاعدايلارعا جول بەرمەۋ بويىنشا تاپسىرمالار بەرىلدى, – دەدى بۇل جونىندە وبلىستىق تجد باسشىسى.
اتالعان جۇمىس توبى جەكسەنبى كۇنى التىنسارين, قاراسۋ اۋداندارى مەن اۋليەكول اۋدانىنىڭ شىعىسىندا اۋەدەن بارلاۋ جۇمىستارىن جۇرگىزىپ, قوستاناي اۋدانىنا قاراستى رىبنوە, سۆەردلوۆ, التىنسارين اۋدانىنداعى نوۆوسەلوۆ, قاراسۋ وڭىرىندەگى ۆوستوك, قارامىرزا, كوشەۆوي, تسەليننىي, وكتيابرسكي, كوكتال ەلدى مەكەندەرىنىڭ ماڭايىنداعى سۋ تاسقىنىنان تونەتىن قاۋىپ دەڭگەيىن انىقتادى.
توتەنشە جاعداي ماماندارىنىڭ مالىمەتىنشە, وڭىردە سۋ تاسقىنىنان كەلەتىن قاۋىپتىڭ بەتى قايتقان سىڭايلى. بىراق بيىل وبلىستىڭ وڭتۇستىك اۋداندارىندا قارعىن سۋدىڭ قارقىنى قاتتى بولدى. سالدارىنان كەيبىر ەلدى مەكەندەردىڭ اراسىندا جول قاتىناسى ءۇزىلىپ قالىپ جاتىر. مىسالى, تاياۋدا ارقالىق قالاسى ماڭىنداعى ەلدى مەكەندەرگە باراتىن جولدىڭ سۋاعارىن قىزىل سۋ جىرىپ كەتىپ, ونىڭ ۇستىندە پايدا بولعان شۇڭقىرعا دالادا جايىلىپ جۇرگەن جىلقى قۇلاعان. سونداي-اق جانگەلدين اۋدانىنىڭ ورتالىعى, تورعايدان اقشىعاناق اۋىلىنا باراتىن جولدىڭ 15 جانە 25-ءشى شاقىرىمى بۇزىلعان. ال ارقالىق قالاسىنىڭ شەتىنە ورنالاسقان جەر ۇيلەردىڭ ىشىنە اۋلا مەن كوشەدەگى ەرىگەن قاردىڭ سۋى كىرىپ كەتكەن.
قوستاناي وبلىسى
