جالپى 2022 جىلدىڭ العاشقى توقسانىندا وبلىستا 6058 ادام جۇمىسقا ورنالاستىرىلىپتى. بۇدان بولەك ءوڭىردىڭ جۇمىسپەن قامتۋ قىزمەتىنە اتالعان مەرزىم ىشىندە 7136 تۇرعىن جۇگىنگەن.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى اسەم جۇنىسپەكوۆا كاسىپكەرلىكتى دامىتۋدىڭ 2021-2025 جىلدارعا ارنالعان ۇلتتىق جوباسى اياسىندا 6058 ادامنىڭ جۇمىسپەن قامتىلعانىن ايتادى. ونىڭ ىشىندە 3,3 مىڭ ۇمىتكەر بوس ورىندارعا جولداما العان.
– اتاپ ايتقاندا, «الەۋمەتتىك جۇمىس ورىندارىنا – 294, قوعامدىق جۇمىستارعا 2310 ادام ورنالاستىرىلدى. جاستاردىڭ وندىرىستىك تاجىريبەدەن ءوتۋ مۇمكىندىگىن ءوڭىردىڭ 118 تۇرعىنى پايدالاندى. «ۇرپاقتار كەلىسىمشارتى» جوباسى بويىنشا ەكى جاس مامان شەبەرلىگىن ارتتىرا الدى. ء«بىرىنشى جۇمىس ورنى» جوباسى اياسىندا 20 ادام جۇمىسپەن قامتىلدى. بۇل باعدارلامانى 29 جاستان اسپاعان جاستار پايدالانا الادى. مىسالى ولاردىڭ قاتارىندا جۇمىس تاجىريبەسى جوق تۇلەكتەر, جۇمىسپەن قامتۋ ورتالىعىندا تىركەلگەن-تىركەلمەگەنىنە قاراماستان جۇمىسسىز دەپ تانىلعان جاستار, سونىڭ ىشىندە NEET ساناتىنداعىلار بار, – دەپ اتاپ ءوتتى ءا.جۇنىسپەكوۆا.
وڭىردەگى «ۇرپاقتار كەلىسىمشارتى» اتتى جوبا زەينەتكەرلىك جاسقا تولسا دا ەڭبەك ەتىپ جۇرگەن جۇمىسكەردى كەيىننەن اۋىستىرا وتىرىپ, جاس مامانداردى جۇمىسقا ورنالاستىرۋعا باعىتتالعان.
سونىمەن قاتار بيىلعى قاڭتار ايىنان باستاپ مەملەكەت باسشىسى قاسىم-جومارت توقاەۆتىڭ تاپسىرماسى بويىنشا «جاستار پراكتيكاسى» جانە «العاشقى جۇمىس ورنى» جوبالارىنا قاتىسۋ ۇزاقتىعى مەن ەڭبەكاقى مولشەرى ۇلعايتىلدى. ناقتىراق ايتساق «جاستار تاجىريبەسى» التى ايدان ءبىر جىلعا دەيىن سوزىلادى. ولاردىڭ ەڭبەكاقسى شامامەن 30 اەك (91 890 تەڭگە) مولشەرىندە بولادى. ال ء«بىرىنشى جۇمىس ورنى» جوباسى اياسىندا 12 ايدان 18 ايعا دەيىن جۇمىسقا ورنالاسۋعا كەپىلدىك بەرىلگەن جاستار دا ايىنا جوعارىداعى سوما كولەمىندەگى جالاقىمەن قامتاماسىز ەتىلمەك.
زەينەتكەرلىك جاسقا جاقىنداعان جۇمىسسىز ادامدارعا ارنالعان «كۇمىس جاس» جاڭا جوباسىن بيىل 534 ادام پايدالانا الادى. بۇلاردىڭ ەڭبەكاقىسى مەملەكەت تاراپىنان جىل بويى سۋبسيديالاناتىن بولادى. اي سايىنعى سۋبسيديا مولشەرى – بەلگىلەنگەن جالاقىنىڭ 50 پايىزىنا تەڭ. ياعني سالىقتاردى, مىندەتتى الەۋمەتتىك اۋدارىمداردى, پايدالانىلماعان ەڭبەك دەمالىسى مەن بانكتىك قىزمەتتەر ءۇشىن وتەماقىلاردى ەسكەرە كەلە «كۇمىس جاس» جوباسىن پايدالانۋشىلار 30 اەك كولەمىندە جالاقى الاتىن بولادى.
اسەم جۇنىسپەكوۆا جاڭا جوبانى ىسكە اسىرۋ رەسپۋبليكالىق بيۋدجەتتەن قارجىلاندىرۋعا بايلانىستى باستالاتىنىن جەتكىزدى.
– بۇگىندە جۇمىس بەرۋشىلەر مەن زەينەتكەرلىك جاسقا جاقىنداعان تۇلعالاردى تارتۋ بويىنشا جۇمىستار جۇرگىزىلۋدە. جۇمىسسىزداردى جۇمىسپەن قامتۋعا جاردەمدەسۋدىڭ بەلسەندى شارالارى جانە ءوزىن-ءوزى جۇمىسپەن قامتىعانداردىڭ كاسىپكەرلىك بەلسەندىلىگىن ارتتىرۋ تۋرالى اقپاراتتاندىرۋ ءۇشىن وڭىردە جىلجىمالى ءموبيلدى جۇمىسقا ورنالاستىرۋ پۋنكتتەرى جۇمىس ىستەيدى, – دەپ مالىمدەدى ول.
