قوعام • 11 ءساۋىر، 2022

ەلىمىزدە 170 ديىرمەن جۇمىس ىستەپ تۇر

اگرارلىق ازىق-ت ۇلىك نارىقتارى جانە اۋىل شارۋاشىلىعى ءونىمىن قايتا وڭدەۋ دەپارتامەنتىنىڭ ديرەكتورى نازگۇل حاتەپوۆا ۋاقىتشا توقتاپ قالعان ديىرمەندەرگە قاتىستى پىكىر ءبىلدىردى، دەپ حابارلايدى Egemen.kz.

Egemen Qazaqstan

«قازاقستاندا 240-قا جۋىق ۇن تارتاتىن كاسىپورىن بار. سونىڭ ىشىندە 170-ءسى جۇمىس ىستەپ تۇر. جالپى ىشكى نارىقتا رەسەي بيدايىن تۇتىنىپ، وڭدەپ جۇرگەن ديىرمەندەر نەگىزىنەن شەكارالاس ايماقتاردا ورنالاسقان. ولار سقو، بقو، پاۆلودار وبلىسىنداعى ديىرمەندەر. مۇنىڭ دا ءوز سەبەپتەرى بار. ىشكى نارىقتا سولتۇستىكتەن باتىسقا بيداي تاسىمالداۋ شىعىندارىنىڭ نەمەسە رەسەيدەن اكەلۋ شىعىندارىنىڭ اراسىنداعى ايىرماشىلىق وتە ۇلكەن. اتالعان وڭىرلەردە شامامەن 45-50-گە جۋىق ۇن تارتاتىن كاسىپورىن بار. سولاردىڭ جارتىسىنا جۋىعى رەسەيلىك ونىممەن جۇمىس ىستەدى. قازىرگى كەزدە رەسەيدە قويىلعان شەكتەۋگە بايلانىستى ۇن تارتۋ كاسىپورىندارى ىشكى نارىقتان بيداي ساتىپ الۋعا ءماجبۇر بولىپ وتىر»، دەدى سپيكەر ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.

ونىڭ ايتۋىنشا، ديىرمەندەر جۇمىسى الداعى ۋاقىتتا توقتاپ قالمايدى.

ء«وتىنىم بەرگەن جاعدايدا ازىق-ت ۇلىك كەلىسىمشارت كورپوراتسياسى ارزانداتىلعان بيدايدى وڭىرلەرگە اپارىپ، تارتىپ، جەكەلەگەن وبلىسقا قاجەتتى كولەمدە ۇن وندىرۋگە قاۋقارلى. مۇندا باعادان باسقا كەدەرگى جوق. ءبىزدىڭ ديىرمەندەر ترانسپورتتىق جانە لوگيستيكالىق نەگىزدەمەلەر بويىنشا عانا رەسەيدىڭ بيدايىن وسى كەزگە دەيىن تارتىپ وتىردى»، دەدى ن. حاتەپوۆا.

بۇعان دەيىن استىق وڭدەۋشىلەر وداعى ەلىمىزدە ءبىر جارىم اپتاعا عانا جەتەرلىك بيداي قورى قالعانىن مالىمدەگەن ەدى. استىق وسىرۋشىلەر مەن وڭدەۋشىلەر بيدايدى بولىسە الماي داۋ تۋعانى، بيداي تاۋسىلسا بارلىق ديىرمەندەر جۇمىسىن توقتاتۋعا ءماجبۇر ەكەنى ايتىلعان ەدى.

ءوز كەزەگىندە ايداربەك ساپاروۆ ەلدە ەشقانداي استىق تاپشىلىعى جوق ەكەنىن مالىمدەدى. 1 ساۋىردەگى جاعداي بويىنشا رەسپۋبليكادا 6،4 ملن توننا استىق بولعان.

7 ساۋىردەگى جاعداي بويىنشا ەلدەگى ۇن قورى 118 مىڭ تونناعا جەتەدى، ونىڭ ىشىندە: تۇراقتاندىرۋ قورلارىندا - 10،4 مىڭ توننا، «اينالىم سحەماسى» اياسىندا – 22 مىڭ توننا، وندىرۋشىلەردە – 48،6 مىڭ توننا، قويمالاردا – شامامەن 20 مىڭ توننا جانە ساۋدا وبەكتىلەرىندە – 18 مىڭ توننا بار. اتالعان كولەم ىشكى قاجەتتىلىكتى قامتاماسىز ەتۋگە تولىق جەتكىلىكتى.

ايانا توعانبەك