شىن جۇرەكتەن جاقسىلىق جاساۋعا ۇمتىلۋ – ادامنىڭ بويىنداعى ەڭ اسىل قاسيەتتەردىڭ ءبىرى. مەيىرىمدىلىك تە كەز كەلگەن جانعا جىلىلىق پەن شۋاق سىيلايتىنى انىق.
2021 جىلى وڭىرىمىزدە «بىرگەمىز» تۇجىرىمداماسى نەگىزىندە ء«بىلىم», «ساباقتاستىق», «ساۋلىق», «تازا الەم», «اسىل مۇرا», «قامقور», ء«ۇمىت» سەكىلدى ۇزىن سانى جەتى باعىتتا جالپىۇلتتىق ەرىكتىلەردىڭ جوبالارى جۇزەگە اسىرىلدى. بۇل جوبالارعا پەتروپاۆل قالاسىنىڭ جاسوسپىرىمدەرى دە بەلسەندى قاتىسىپ, ءوز سالالارى بويىنشا ۇلكەن جەتىستىكتەرگە جەتتى. تاۋەلسىزدىكتىڭ 30 جىلدىعىنا وراي سولتۇستىك قازاقستان وبلىسىندا «اسار» اتتى ەرىكتىلەردىڭ جيىنى ءوتىپ, وبلىسىمىزدىڭ ەڭ ۇزدىك ەرىكتىلەرى ماراپاتتارعا يە بولعان ەدى. وسى جيىندا ماعان «ساباقتاستىق» اتتى باعىتتا «2021 جىلدىڭ ۇزدىك ۆولونتەرى» اتاعىن الۋ بۇيىردى. «ساباقتاستىقتىڭ» باستى ماقساتى – بالالارعا قاتىستى ۆولونتەرلەردىڭ تالىمگەرلىك تاجىريبەسىن ەنگىزۋ. سوندىقتان مەن ءوزىم وقيتىن ورتا مەكتەپتە تالىمگەرلىك باعىتتى ۇستانىپ, «25 مەكتەپ شاكىرتى» اتتى دەبات كلۋبىن اشقان بولاتىنمىن.
راس, «قازىر بوي جارىستىراتىن زامان ەمەس, وي جارىستىراتىن زامان». تەرەڭ بىلىممەن قارۋلانعان جاس ەل ەرتەڭى ءۇشىن ەلەۋلى ىستەر اتقارارى دا اقيقات. وسىعان وراي ءبىز جوبا اياسىندا وقۋشىلاردى پىكىرسايىس الەمىمەن تانىستىرىپ, بۇل سالاعا دەگەن قىزىعۋشىلىقتارىن وياتتىق. مەكتەپتىڭ قولداۋىمەن «ەلباسى مەدالى» جوباسىنداعى تالانت پەن داعدى باعىتىنداعى كوشباسشىلىق پەن شەشەندىك ونەردى دامىتۋىم وسى ماقساتىمدى جۇزەگە اسىرۋعا سەپتىگىن تيگىزگەنى دە ءسوزسىز. قازىرگى تاڭدا پىكىرسايىسقا مەكتەپتىڭ باسەكەگە قابىلەتتى شاكىرتتەرى قاتىسىپ, جۇلدەلى ورىندار الىپ ءجۇر.
بۇل – مەنىڭ ۆولونتەرلىكپەن شىن ىقىلاسپەن اينالىسىپ, ءبىر جىل ىشىندە قول جەتكىزگەن العاشقى جەتىستىگىم. الايدا الداعى ۋاقىتتا دا جان-جاعىمداعى ادامدار مەن جاستارعا قولۇشىن سوزۋدى, قاجەت بولسا قايىرىمدىلىقپەن اينالىسۋدى ويلاپ ءجۇرمىن. سەبەبى, ۆولونتەر بولۋ – قايىرىمدى بولۋ دەگەندى بىلدىرەدى ەمەس پە؟!
اجار سىزدىقوۆا,
11-سىنىپ وقۋشىسى
پەتروپاۆل
