اۋىل تۇرعىندارىن اۋدان ورتالىعىمەن بايلانىستىراتىن جالعىز جولدىڭ ءۇستىن تەلەگەي تەڭىزگە اينالدىرىپ جىبەرگەن قارقىنى جامان قىزىل سۋدىڭ تەرەڭدىگى 50-60 سانتيمەترگە دەيىن جەتەدى. جول بويىنداعى قاتەرلى اۋماقتا بولىپ جاتقان تابيعي اپات ءتورتىنشى ءساۋىر كۇنى الەۋمەتتىك جەلىگە تاراپ كەتكەن ۆيدەودا باياندالعان:
– جىلدا ايتامىز. بىراق مۇنى قاراپ جاتقان اۋدان اكىمى دە, اۋىل اكىمى دە جوق. نە ءارى, نە بەرى وتە الماي تۇرمىز. كولىكتىڭ ىشىندە قانشاما كىشكەنتاي بالالار وتىر. ەرتەڭ اۋىلدان بىرەۋ اۋىرا قالسا, نە بولادى؟ مۇنى اۋداننىڭ باسشىلارى بىلەدى. اناۋ «ۋاز»-دىڭ ءىشى تولعان ادام. قايدا بارارىمىزدى بىلمەي تۇرمىز, – دەيدى ۆيدەونى تاراتقان جولاۋشى.
قابىرعا اۋىلدىق وكرۋگىنىڭ اكىمى سەرىك بايكەنوۆتىڭ ايتۋىنشا, 2017 جىلى قاتتى سۋ تاسقىنى بولىپ, ءدال وسى جەردى 5-6 جەردەن قۇبىرلارىمەن قوسا اعىزىپ جىرىپ كەتكەن. كەيىن ول جەردىڭ قۇبىرلارى ورنىنا قايتادان ورناتىلىپ, ۇستىنە قيىرشىق تاس توسەلىپتى.
– باسقا جەردەن تاعى جىرىلىپ كەتپەۋ ءۇشىن كولەمى 2-3 شاقىرىمداي جولعا سۋ ءوتىپ كەتەتىندەي ەتىپ گرەيدەر توسەپ قويعانبىز. قازىر قارعىن سۋ سول گرەيدەردىڭ ۇستىمەن ءجۇرىپ جاتىر. الەۋمەتتىك جەلىدە تاراعان ۆيدەودا ەكى جول بەلگىسى تۇر, كوردىڭىزدەر مە؟ نەگىزى ول جەردى سۋ جىرماعان. قىزىل سۋ سول سۋ وتۋگە ارنالعان وتكەلدىڭ ۇستىنەن ءوتىپ جاتىر. بىراق بيىل قاردىڭ سۋى مول. كەزىندە باسشىلىق قىزمەتتەردە بولعان كوپتى كورگەن ۇلكەن كىسىلەردىڭ وزدەرى بۇرىن-سوڭدى مۇنداي سۋ تاسقىنى بولىپ كورگەن جوق دەپ وتىر. قارعىن سۋدىڭ قاتتى تاسىعانى سونداي, وتكەلگە قويىلعان قۇبىرلار سۋدى وتكىزىپ ۇلگەرە الماي جاتىر. بۇكىل سۋ قىردان كەلەدى عوي. بۇل ەندى تابيعاتتىڭ توسىن قۇبىلىسى. مىنە, قازىر گرەيدەردى جاعالاپ, ات ۇستىندە كەتىپ بارامىن. بولىمشەلەردى ارالاپ شىعۋ كەرەك. ويتكەنى كولىك قاتىناسى ءۇزىلدى, ماشينا جۇرە المايدى. تاسىپ جاتقانى – قاندىقارا, تالدىقارا دەگەن قىردىڭ سۋى. 2 ساۋىردە ءبىرىنشى سايدان سۋ كەلە باستاعاندا-اق دابىل قاعىپ, جۇرتقا ەسكەرتتىم. ەرتەسىندە كەمەردىڭ سايىنان سۋ ءجۇرىپ كەتتى. سول كۇنى ءوزىمىزدىڭ «اۋىلداستار» دەگەن چاتىمىزعا «امانكەلدىمەن ەكى ارادا قاتىناس توقتايدى. سوندىقتان ءارى-بەرى قاراي شىعىپ كەتىپ جۇرمەڭىزدەر, اپاتتى جاعدايعا دۋشار بولاسىزدار, جول جوق» دەپ جازىپ جىبەردىم. كەيبىر تۇرعىندار سونى تىڭداماي, ەلەمەي شىعىپ كەتىپ, جولدا قالىپ قيىندىققا تاپ بولىپ جاتىر. ابىروي بولعاندا, كەمەر دەگەن بولىمشەدەگى ازاماتتار باتپاققا باتقان كولىكتەردى تراكتورمەن تارتىپ شىعارىپ الۋدا. بۇرىن سۋ تاسىعاندا ءبىر جەتىدەن كەيىن وتكەل بەرىپ, تراكتور, استى بيىك «ۋاز», «گاز-66» سياقتى اۋىر تەحنيكالار وتەتىن. ال بيىل جولدىڭ قاشان اشىلاتىنى بەلگىسىز. سۋدىڭ ارىنى وتە قاتتى. ساعات سايىن ءوسىپ جاتىر. انا جەرگە ون تەحنيكا اكەلىپ بوگەسە دە ءدال قازىر وعان كۇشتەرى جەتپەيدى, – دەدى اكىم.
جەرگىلىكتى توتەنشە جاعداي قىزمەتى وكىلدەرىنىڭ ايتۋىنشا, سۋ تاسقىنىنا دايىندىق بارىسىندا اۋىلدىق وكرۋگكە قاراستى قابىرعا, جاڭاتاي, الاكول اۋىلىنىڭ تۇرعىندارىنا ەرتە كوكتەمدە كەلەتىن قاۋىپتى كەزەڭگە الدىن الا قامدانۋدىڭ ماڭىزدى ەكەنى ءتۇسىندىرىلىپ, الدىن-الا جەتكىلىكتى مولشەردە ازىق-ت ۇلىك جەتكىزىلگەن. ەلدى مەكەندەر مەن مال جايىلىمىنا سۋ تاسقىنىنان قاۋىپ جوق.
قازىر سۋ تاسىپ جاتقان قاۋىپتى اۋماقتا ارنايى باقىلاۋ بەكەتى جاساقتالىپ, 2 تەحنيكا, جەرگىلىكتى اتقارۋشى ورگان وكىلدەرى مەن اۋداندىق پوليتسيا, توتەنشە جاعداي بولىمدەرىنىڭ قىزمەتكەرلەرى كۇنى-ءتۇنى كەزەكشىلىكتە تۇر.
قوستاناي وبلىسى,
امانكەلدى اۋدانى
