وڭىردە مويىنقۇم جانە سارىسۋ اۋداندارىنا كوگىلدىر وتىن تارتۋ ماسەلەسى دە بۇگىندە وزەكتى. سول سياقتى وبلىستاعى بىرقاتار اۋىلدا دا مۇنداي ماسەلە بار. ال جەرگىلىكتى بيلىك وكىلدەرى دە كوپشىلىككە ۋادە بەرگەنىمەن, ونىڭ كەيبىرى ءالى دە ورىندالماي وتىر.
بىلتىر ت.رىسقۇلوۆ اۋدانىندا كوگىلدىر وتىن تارتۋ جۇمىسى قارقىندى ءجۇردى. اكىمدىكتىڭ مالىمەتى بويىنشا بۇل كۇندە اۋداننىڭ 98,5 پايىزى گازبەن قامتىلعان. تالاي جىلدان بەرى تۇرعىنداردى تولعاندىرىپ كەلە جاتقان ماسەلە وڭىنان شەشىلىپ, وتكەن جىلى جاڭاتۇرمىس, قازاق, تاسشولاق, قوراعاتى سياقتى بارلىعى 10 اۋىل گازعا قوسىلدى. الايدا ەندى جاقىن ۋاقىتتاردا گاز كەلەدى دەپ جوسپارلانعان شولاققايىڭدى اۋىلى وتكەن جىلى دا گازداندىرىلۋعا ءتيىس ەلدى مەكەندەردىڭ تىزىمىنە كىرمەي قالعان. ال اتالعان اۋىل تۇرعىندارى ايتىلعان ءسوز اۋاعا كەتكەندەي كۇي كەشۋدە. جىل سايىن جاقسى جاڭالىقتى كۇتۋمەن جۇرگەن كوپشىلىك جۇمىستىڭ نە سەبەپتى سايابىرلاپ قالعانىن بىلە الماي وتىر. بۇل ماسەلەنى اۋىل تۇرعىندارىنىڭ اتىنان بەيبىت بايساريەۆ كوتەرىپ كەلەدى. بىراق ءالى ناتيجە جوق. شولاققايىڭدى بۇل كۇندە تەرەڭوزەك اۋىلدىق وكرۋگىنە قاراستى ەلدى مەكەننىڭ ءبىرى. الاتاۋدىڭ ەتەگىندە ورنالاسقان شاعىن اۋىل. بىراق اۋداندى گازداندىرۋ جۇمىسىنىڭ كورسەتكىشى ءجۇز پايىزعا جاقىنداسا دا, بۇل اۋىلعا جەتپەي وتىر. «شولاققايىڭدى اۋىلىنا كەزىندە ءارتۇرلى سەبەپتەرمەن, اتاپ ايتقاندا, ءتيىستى جوبالىق-سمەتالىق قۇجاتتامانىڭ ءوز ۋاقتىسىندا وتكىزىلمەۋىنەن بۇگىندە اۋىل كوگىلدىر وتىنسىز كۇن كەشۋدە. بۇل ماسەلە جىل سايىن اكىمدەردىڭ اۋىل تۇرعىندارىنا ەسەپ بەرۋ جيىندارىندا ايتىلىپ تا ءجۇر. كەزىندە اۋىل قاريالارى سول ۋاقىتتاعى اۋدان اكىمى جارىلقاسىن ايتاقوۆتىڭ جەكە قابىلداۋىندا بولىپ, تالاپ-ءوتىنىشىمىزدى بىلدىرگەن ەدى.
«كەلەسى كۇنى اكىم اتالعان اۋىلعا ءوزى ارنايى كەلىپ, شولاققايىڭدىعا كوگىلدىر وتىن جۇيەسىن جۇرگىزۋدى باسشىلىققا الاتىنىن ايتىپ, ۋادەسىن بەرگەن بولاتىن. الايدا بۇل اكىمنىڭ باسقا قىزمەتكە اۋىسۋىنا بايلانىستى اتقارىلۋعا ءتيىس جۇمىس اياقسىز قالا بەردى. ال ەندى اۋداننىڭ قازىرگى اكىمى ەربولات سادىرقۇلوۆ جاڭادان تاعايىندالعاندا اۋىل قاريالارى گاز ماسەلەسى بويىنشا تاعى دا ءوتىنىش جولدادى. اۋدان اكىمدىگىنىڭ تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى بولىمىنەن جاۋاپحات كەلىپ, ول حاتتا شولاققايىڭدى اۋىلىنا گاز جۇرگىزۋ قۇرىلىس جۇمىستارى 2020 جىلدىڭ باسىندا مەملەكەت تاراپىنان قاراجات بولىنگەن جاعدايدا قولعا الىنادى دەلىنگەن ەدى. دەگەنمەن ول دا ورىندالماي قالدى. نەگە بۇل تاپسىرما ءالى كۇنگە تولىققاندى ورىندالماي وتىر؟ بىرقالىپتى تۇرمىس-تىرشىلىكتەگى اياداي شاعىن اۋىلدىڭ كوگىلدىر وتىنسىز وتىرعانى وكىنىشتى-اق. كۇن سايىن شەلەكتەپ كومىر تاسىپ, كۇيەلەش كۇيدە كۇل شىعارۋدان ىعىر بولعان اق جاۋلىقتى انالارىمىز بەن كەلىندەرىمىزدىڭ دە وكپە-رەنىشتەرى قارا قازانداي. ەندىگى ءۇمىتىمىز وبلىس باسشىلىعىندا», دەيدى اۋىل تۇرعىنى بەيبىت بايساريەۆ. تۇرعىنداردىڭ جانايقايىن جەتكىزگەن ارداگەر بۇل ماسەلەنىڭ نەگە ءالى كۇنگە دەيىن شەشىلمەي كەلە جاتقانىن تۇسىنە المايدى.
ال اۋداندىق تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى ءبولىمى باسشىسىنىڭ مىندەتىن اتقارۋشى جاسۇلان ومىرقۇلوۆ شولاققايىڭدى اۋىلىن گازداندىرۋ بويىنشا جوبالىق-سمەتالىق قۇجاتتاما ازىرلەنىپ, 2021 جىلى مەملەكەتتىك ساراپتاما قورىتىندىسى الىنعانىن ايتتى. «جوبا قۇنى – 186 ملن 700 مىڭ تەڭگە. اتالعان جوبا وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى ارقىلى ءتيىستى مينيسترلىككە بيۋدجەتتىك ءوتىنىم الۋعا جولداندى. قازىرگى تاڭدا قارجى ماسەلەسى مينيسترلىكتە قارالىپ جاتىر», دەيدى ول.
ەندى اۋداندا شولاققايىڭدى ەلدى مەكەنىنەن بولەك, گاز قۇبىرى تارتىلماعان تاعى دا 7 ەلدى مەكەن بار. اكىمدىكتىڭ مالىمەتىنشە, گاز كىرمەگەن اققاينار, قوساپان, تويقۇدىق, مامىرتوبە, سۇڭقايتى ەلدى مەكەندەرى مەن قوراعاتى ستانساسى, قۇمارىق رازەزىنىڭ گازداندىرىلۋ ىقتيمالدىلىعى تومەن. سەبەبى مۇندا حالىق از قونىستانعان جانە شالعاي ورنالاسقان. ال شولاققايىڭدى اۋىلىنىڭ ماسەلەسى ەندى قانشا جىلعا سوزىلاتىنى بەلگىسىز. كوپشىلىك كوگىلدىر وتىندى ءالى كۇتىپ كەلەدى.
جامبىل وبلىسى
