بۇل ورتالىق بۇگىندە جاستار شىعارماشىلىعىن شىڭداۋ مەكتەبىنە اينالعان. ستۋديادا تالاپكەر اقىندارمەن قاتار, وزگە دە ونەرلى جاستار ءتالىم الادى. مۇندا ءبادريساپا اتىنداعى بي توبى, ۆوكال سىنىبى, دومبىراشىلار ءانسامبلى جۇمىس ىستەيدى. «ونەر ستۋدياسىنان» 22 جىل ىشىندە تالاي تالانتتى جاستار تاربيەلەنىپ شىقتى. ولار قازىر ءتۇرلى سالادا ەڭبەك ەتىپ جۇرگەنىمەن اقىندىق, انشىلىك, كۇيشىلىك ونەردەن قول ۇزگەن جوق.
– حورەوگرافيا, دومبىرا, ۆوكال, اقىندىق جانە كوركەمسوز شەبەرلىگى سىنىپتارىن اشتىم. بارا-بارا ونەر ستۋدياسى ۋنيۆەرسيتەتتىڭ كادىمگىدەي مادەني-قوعامدىق ءىس-شارالارىن اتقاراتىن جانە بويىندا تالابى بار بالالاردىڭ قاناتىن قاتايتاتىن, مادەنيەت سالاسىنا ۇلەسىن قوساتىن جاقسى ءبىر ۇجىم بولىپ قالىپتاستى. ءتىپتى, تەحنيكالىق ماماندىق بويىنشا وقىعان كەيبىر ستۋدەنتتەر مەنىڭ ستۋديامدى بىتىرگەن سوڭ, ءبىرجولا ونەر جولىنا ءتۇسىپ كەتتى, – دەدى حالىق اقىنى.
«ونەر ستۋدياسىنان» قاناتتانعان ونەرپازدىڭ ءبىرى – وڭىرگە اقىندىعىمەن قوسا ءانشى-سازگەرلىگىمەن تانىمال بولعان, بۇگىندە ىبىراي التىنسارين مەموريالدىق مۇراجايىن باسقارىپ وتىرعان مارعۇلان وسپانوۆ. مەكتەپ قابىرعاسىندا ءجۇرىپ وبلىستىق ايتىستارعا قاتىسىپ جۇرگەن جاس دارىنعا ۇنەمى قازىلار القاسىنىڭ قۇرامىندا وتىراتىن حالىق اقىنى سارى دومالاق دەپ ات قويىپتى. كەيىن ارمان قۋىپ قوستانايعا كەلىپ, احاڭ ۋنيۆەرسيتەتىنە وقۋعا تۇسكەن سارى دومالاق بالا ءاسيا اپايىنىڭ مەكتەبىندە ونەرىن ۇشتاپ, تالاي ايتىستارعا قاتىستى. بىردە جەڭىلىپ, بىردە جەڭە ءجۇرىپ ىسىلىپ, شىڭدالدى. بۇگىندە ءبىراز تۋىندىسى ۇلكەن ساحنالاردا ورىندالىپ جۇرگەن سازگەر ۇستازىنىڭ بىرنەشە ولەڭىنە ءان جازىپ, ۇلكەن كونتسەرتتەردە ورىنداپ ءجۇر. وسىلايشا, ۇستاز بەن شاكىرت اراسىنداعى تاربيەلىك ءتالىم شىعارماشىلىق ارىپتەستىككە ۇلاستى.
– ءاسيا اپامىزدىڭ «قايداسىڭ بالالىق» دەگەن ءبىر ولەڭى بار ەدى, سودان كەيىن «جەڭگەلەرىم» دەگەن ولەڭى بار. ەكەۋى دە انگە سۇرانىپ تۇر ەكەن – دەپ, سول ولەڭدەردى اپايدان ارنايى سۇراپ الدىم. سوعان ءان جازدىم. ول اندەردى ءوزىمىزدىڭ «ونەر ستۋدياسىنىڭ» تۇلەگى, بۇگىندە «حابار» تەلەارناسىندا قىزمەت ەتىپ جۇرگەن بەلگىلى جۋرناليست دارحان ءابدۋاحيتتىڭ جارى دينا ورىنداپ ءجۇر, – دەدى مارعۇلان بۇل جايىندا.
سىرت قاراعان كىسىگە سۋىقتاۋ كورىنەتىن ءاسيا ايىپقىزىنىڭ ىشكى جان دۇنيەسىنە ءۇڭىلىپ كورگەن ادام كەرىم ءبىر جىلىلىق پەن نازىكتىكتى, ءتۇزۋ ادامعا ءتان بەرىك ۇستانىمدى, ەلگە جاناشىر ازاماتتىقتى بىردەن اڭعارادى. اقىننىڭ بۇل قاسيەتى قاعازعا ادىپتەلگەن جازبا ولەڭدەرىندە كوزگە ۇرىپ تۇر.
«...تورەلەردىڭ شىقسام دا جيi ەسiنەن,
ءتول ونەردىڭ كۇش الام يەسىنەن.
توبەدەگi قامشىسىن ۇيiرگەندە,
تومەندەگi ەل قورعايدى كيەسiمەن», –
دەپ ءاسيا اپامىزدىڭ ەسكەرىلمەي, ەلەنبەي جاتقان ءبىر دۇنيەسى وسى جازبا ولەڭدەرى.
ءاسيا بەركەنوۆانىڭ ايتىس ونەرىندەگى وزىندىك ورنەگى مەن اقىندىق شەبەرلىگى جايىنداعى ويىمىزدى بەلگىلى اقىن جولبارىس قاجى ءبايازيدتىڭ ء«اسيانىڭ شىققان بيىگى, العان اسۋلارى, ايتىس ونەرىندە تالاي جۇرتتى تامسانتىپ, تاڭعالدىرعانى مەنىڭ ءالى كۇنگە كوڭىل كوكىرەگىمدە, كوز الدىمدا. ءاسيا ايتىس تاريحىن ەجىكتەپ, توم-توم كىتاپتاردى اقتارىپ, وقىپ-ۇيرەنىپ, بۇرىن-سوڭدى وتكەن اقىن-جىراۋلاردان سۋسىنداعان اقىن دەپ ايتا المايمىن. ءاسيانىڭ ءوزى ۇستاز. قازاق مەكتەبىندە ورىس تىلىنەن ساباق بەردى. جوعارى دارەجەلى ءبىلىمى بار. العاش ايتىسقا قوسىلعاننىڭ وزىندە-اق تابيعي تالانت يەسى, ايتىس ونەرىنىڭ ءبىر بەل بالاسى, سونىڭ بەسىگىنەن شىققان پەرزەنتىندەي بولىپ تانىلدى. سودان بەرى ءوزىنىڭ ايقىن ۇنىنەن, ءوزىنىڭ بيىگىنەن, ءداستۇرلى جىر ماقامىنان, اقىندىق-ازاماتتىق تۇلعاسىنان اينىعان ەمەس. مىنە, مەن وسىعان قۋانامىن», دەگەن سوزىمەن تۇيىندەسەك قۇپ.
قوستاناي وبلىسى
