قايعىلى قاڭتار وقيعاسىنان كەيىن قوعامدا كوكەيكەستى ساۋالدار كوپ بولدى. وسى جولعى جولداۋ سول سۇراقتاردىڭ جاۋابى ىسپەتتەس. ەل پرەزيدەنتى بيلىك تارماقتارىنا, قوعامعا جاڭا قازاقستاندى قۇرۋ ستراتەگياسى اياسىندا ساياسي رەفورمالاردىڭ كەزەكتى توپتاماسىن ىسكە اسىرۋ بويىنشا بىرقاتار مىندەت قويدى. ماڭىزدى ماقساتتاردى ايقىندادى. اتاپ ايتقاندا, وكىلدى بيلىك تارماقتارىن قايتا قۇرۋ, سايلاۋ جۇيەسىن جەتىلدىرۋ, قۇقىق قورعاۋ ينستيتۋتتارىن كۇشەيتۋ, ەلىمىزدىڭ اكىمشىلىك-اۋماقتىق قۇرىلىمىن جەتىلدىرۋ سىندى باستامالار كوتەرىلدى. اسىرەسە اتقارۋشى بيلىك وكىلدەرىنە حالىقپەن ءجيى كەزدەسىپ, قوعامدىق قابىلداۋلاردى تۇراقتى وتكىزۋدىڭ ماڭىزدىلىعىن اتاپ ءوتتى.
جولداۋدا اتاپ وتكەندەي, «قۋاتتى وڭىرلەر – قۋاتتى ەل» دەگەن ۇستانىمعا سايكەس كەز كەلگەن ماسەلە جەرگىلىكتى جەردە شەشىلۋگە ءتيىس. ماسەلەن, ماڭعىستاۋ وڭىرىندە گاز باعاسىنا بايلانىستى بولعان جاعدايلار قايتالانباۋى ءۇشىن ەڭبەك شارتتارىن جاقسارتۋ كەرەك, شيەلەنىستى ماسەلەلەر جەرگىلىكتى جەردە وڭ شەشىمىن تابۋى كەرەك. بۇل بولاشاقتا ۇلكەن قاقتىعىستاردىڭ الدىن الادى.
ۇلتتىق ۇلاننىڭ «باتىس» وڭىرلىك قولباسشىلىعىنىڭ اقتاۋ, اتىراۋ, اقتوبە, جاڭاوزەن قالالارىندا اسكەري بولىمدەرى بار. باتىستىق ۇلاندار ءوڭىردىڭ ىشكى تىنىشتىعى مەن قۇقىقتىق ءتارتىبىن قامتاماسىز ەتۋدە ماڭىزدى ءرول اتقارادى. كۇن سايىن جۇزدەگەن ۇلاندىق پوليتسيا قىزمەتكەرلەرىمەن بىرگە اتالعان قالالاردا قوعامدىق قاۋىپسىزدىكتى قاداعالايدى. تاۋلىك بويى جاۋىنگەرلىك قىزمەت اتقارادى. سونىمەن قاتار وڭىردەگى قوعامدىق-ساياسي جانە باسقا دا بۇقارالىق ءىس-شارالاردا قۇقىقتىق ءتارتىپتىڭ ساقتالۋىن قامتاماسىز ەتەدى. سوندىقتان پرەزيدەنتتىڭ بەيبىت شەرۋلەر تۋرالى ايتقانى كوڭىلىمىزدەن شىقتى. تەك ساياسات سالاسىنىڭ وزىندە وننان استام زاڭ قابىلدانعانىنا قاراپ, قوعامدا بولىپ جاتقان وڭ وزگەرىستەردىڭ اۋقىمى قانداي ەكەنىن باعامداۋعا بولادى. بەيبىت ميتينگتەر جاپپاي تارتىپسىزدىككە ۇلاسقانىن جانە ونىڭ سالدارى قانداي كۇردەلى بولعانىن بىلەمىز. مەملەكەتىمىزدە قۇقىقتىق ءتارتىپتى ورناتۋ ارقىلى قازاقستاننىڭ كونستيتۋتسيالىق قۇرىلىمىن, ءار ازاماتتىڭ قۇقىعى مەن بوستاندىعىن باتىل قورعاعان ۇلاندىقتار ءۇشىن بەيبىت جينالىستار تۋرالى زاڭنىڭ ساقتالۋى ماڭىزدى. اتاقتى قولباسشى باۋىرجان مومىش ۇلى «تارتىپكە باعىنعان قۇل بولمايدى» دەپ ايتقانداي, زاڭ ۇستەمدىگى سالتانات قۇراتىن قۇقىقتىق مەملەكەتتە عانا دامۋ مەن وركەندەۋ بولادى. «بازبىرەۋلەردىڭ جاۋاپسىزدىعى مەن بەيباستاق ارەكەتتەرى زاڭدى سىيلايتىن ازاماتتارىمىز ءۇشىن تىم قىمباتقا ءتۇستى. زاڭ بارىنە ورتاق, وعان بيلىكتەگى ازاماتتار دا, قوعام بەلسەندىلەرى دە بىردەي باعىنۋعا ءتيىس» دەپ مەملەكەت باسشىسى بەكەر ايتقان جوق.
ەلىمىز دامۋ جولىندا دەموكراتيالىق وزگەرىستەرگە اياق باسۋدا. قوعامدىق ءتارتىپتى بۇزۋ, ەلدىڭ شىرقىن كەتىرۋ – وركەنيەتتى دەموكراتيانىڭ كورىنىسى ەمەس. تولەرانتتىلىق, جاۋاپكەرشىلىك, ءوزارا سىيلاستىق, كەڭەسۋ, ازشىلىقتىڭ پىكىرى ەسكەرىلۋ ارقىلى كوپشىلىكتىڭ بيلىك قۇرۋى – ناقتى دەموكراتيالىق وزگەرىستەردىڭ العىشارتى. جاڭا زاڭ بەلسەندى ازاماتتارعا, ونىڭ ىشىندە وپپوزيتسيالىق كوزقاراستاعى قوعام بەلسەندىلەرىنە ەش كەدەرگىسىز شەرۋ وتكىزۋىنە, سول جەردە وي-پىكىرلەرىن ەمىن-ەركىن ايتۋىنا مۇمكىندىك بەردى.
ەلىمىزدە جاڭا ساياسي مادەنيەتتىڭ تامىر جايۋىنا, قوعامداعى ءوزارا جاۋاپكەرشىلىك پەن سەنىمنىڭ ارتۋىنا جول اشتى. سولاي دەسە دە ەلدى ارانداتقىسى كەلەتىن, زاڭعا باعىنعىسى كەلمەيتىن «مىسىق تىلەۋ» ادامداردىڭ تابىلاتىنى وكىنىشتى. ولارعا قاتىستى «بۇدان بىلاي ەشقانداي جۇمساقتىق كورسەتپەيتىنىمىزدى مالىمدەيمىن. باسقا دا زاڭدار سياقتى بۇل زاڭنىڭ تالاپتارى دا مۇلتىكسىز ورىندالۋعا ءتيىس» دەپ ناقتى ەسكەرتۋ جاسالدى. ۇلتتىق ۇلان اسكەرى وزىنە جۇكتەلگەن مىندەتتەرگە سايكەس مەملەكەتتiڭ قاۋiپسiزدiگiن قامتاماسىز ەتۋگە, ادامنىڭ جانە ازاماتتىڭ قۇقىقتارى مەن بوستاندىقتارىن قىلمىستىق جانە وزگە دە قۇقىققا قارسى قولسۇعۋشىلىقتاردان قورعاۋعا, قارۋلى كۇشتەرىمىزدىڭ جوعارعى باس قولباسشىسى قاسىم-جومارت توقاەۆتىڭ باستامالارىنا قولداۋ كورسەتىپ, جاڭارعان بولاشاقتى قۇرۋعا ءبىر ادامداي اتسالىسۋعا دايىن ەكەنىن ايتقىم كەلەدى.
قايرات ۇمبەتوۆ,
ۇلتتىق ۇلان «باتىس» وڭىرلىك قولباسشىلىعى قولباسشىسىنىڭ ءبىرىنشى ورىنباسارى – شتاب باستىعى,
حالىق قاھارمانى جانە «وتان» وردەنىنىڭ يەگەرى, پولكوۆنيك
