مازمۇندى ءىس-شارانىڭ ماقساتى − مادەنيەتارالىق جانە دىنارالىق ديالوگتى نىعايتۋ, الەمدىك جانە ءداستۇرلى دىندەر ليدەرلەرى سەزىنىڭ يدەيالارىن, تولەرانتتىلىق قاعيداتتارىن, سونداي-اق قوعامداعى رۋحاني جانە مورالدىق-ادامگەرشىلىك قۇندىلىقتاردى ىلگەرىلەتۋ.
كورمەگە ۋ.يسمايلوۆ, گ.جۇرقاباەۆا, ە.ايتۋاروۆ, م.بايتەنوۆ, ت.باتانوۆ, ب.اريپوۆ, ي.اچيلوۆ, د.نوگەر, س.ەرمەكوۆ, ج.قايرات, ا.سىرعاباەۆ, ءا.بايدينا, س.ىسقاقبەك, ن.قابەن, ج.سۇلەيمەنوۆا, ن.كيكيموۆا, ا.قادىرباەۆا, م.بايشۋاقوۆا, ۆ.لي, م.باقىتجان, ا.الپىسباەۆا, ل.ايتۋاروۆا سەكىلدى جالپاق ەلگە تانىمال قىلقالام شەبەرلەرىنىڭ جۇمىستارى قويىلدى.
سۋرەتشىلەر تۋىندىلارىندا ءارتۇرلى حالىقتاردىڭ ءومىرىن, تۇرمىسىن, مادەنيەتىن, ونەرىن, سالت-ءداستۇرىن, تابيعاتتىڭ اسەمدىگى مەن ۇلىلىعىن, جاڭارۋدى, بىرلىك پەن بەرەكەنى بەينەلەيتىن كوكتەم مەرەكەسى − ناۋرىزدىڭ باستالۋىن بوياۋ سىرىمەن كوركەم جەتكىزگەن.
ءىس-شاراعا ورتالىقتىڭ باسقارما توراعاسى ب.سارسەنباەۆ, قمدب توراعاسىنىڭ ورىنباسارى, نايب ءمۇفتي ە.وڭعاروۆ, ۋسپەن كافەدرالدى سوبورىنىڭ, قازاقستان پراۆوسلاۆيە شىركەۋىنىڭ استانا شىركەۋ وكرۋگىنىڭ پروتويەرەيى د.بايدەك, نۇر-سۇلتانداعى اۋليە ماريانىڭ ريم-كاتوليك ارحيەپارحياسىنىڭ ارحيەپيسكوپى ت.پەتا, سونداي-اق وزبەكستاننىڭ, تاجىكستاننىڭ, تۇركيانىڭ, ازەربايجاننىڭ, قىرعىزستاننىڭ جانە گرۋزيانىڭ قازاقستانداعى شەتەل ديپلوماتيالىق وكىلدىكتەرىنىڭ قىزمەتكەرلەرى قاتىستى.
باسقارما توراعاسى بولات سارسەنباەۆ قوناقتاردى ناۋرىز مەرەكەسىمەن قۇتتىقتاپ, ءبىر الاڭدا ءتۇرلى كونفەسسيالار مەن ەتنوس وكىلدەرىن بىرىكتىرە وتىرىپ, ءبىز ورتاق كۇش-جىگەرىمىزبەن قازاقستاندىق قوعامداستىقتا بەيبىتشىلىك, كەلىسىم جانە ىنتىماقتاستىق يدەيالارىن نىعايتۋعا ۇلەس قوسا الاتىنىمىزدى اتاپ ءوتتى. سونىمەن قاتار ب. سارسەنباەۆ ەلوردالىق سۋرەتشىلەر وداعىمەن بىرلەسىپ, تاياۋدا الەمدىك جانە ءداستۇرلى دىندەر كوشباسشىلارىنىڭ VII سەزىنە بالالار اراسىندا تولەرانتتىلىققا, بەيبىتشىلىك پەن كەلىسىمگە دەگەن ولاردىڭ كوزقاراسى تاقىرىبىندا بايقاۋ جاريالاناتىنىن ايتتى.
