ءىس-شارا بارىسىندا سپيكەرلەر تابىسقا جەتۋ جانە جەكە ءوسۋ داعدىلارىن دامىتۋ بويىنشا پايدالى كەڭەستەرىمەن ءبولىستى. قاتىسۋشىلار وزدەرىن قىزىقتىرعان سۇراقتارىن قويىپ, اۋىلدىق دەڭگەيدە جاستار ساياساتىن جەتىلدىرۋدىڭ وزەكتى تاقىرىپتارىن تالقىلادى.
سونىمەن قاتار «اسسامبلەيا جاستارى» ۇيىمىنىڭ كوشباسشىلارى «تازا ورتا» جوبالىق باعىتى اياسىندا ەكولوگيالىق اكتسيا وتكىزدى. ۇيعىر اۋدانىنىڭ ورتالىعىندا جەرگىلىكتى جاستارمەن بىرلەسىپ, «دوستىق اللەياسىنا» اعاش وتىرعىزدى. بۇل كۇنى بەلسەندىلەر 50 قىلقان جاپىراقتى اعاش كوشەتىن ەكتى. ولار كەلەشەكتە اۋداننىڭ كوز تارتار كورىكتى جەرىنە اينالارى ءسوزسىز.
«بۇعان دەيىن مەملەكەت باسشىسى 2 ملرد اعاش وتىرعىزۋ تۋرالى باستاما كوتەرگەن. بىزدەر – جاستار ءوز كۇشىمىزبەن ەلىمىزدى كوگالداندىرۋعا كومەكتەسۋگە تىرىسامىز. ءبىز ۇيعىر اۋدانىنداعى دوستىق اللەياسىن ءتۇرلى ەتنوس وكىلدەرىنىڭ: قازاق, ۇيعىر, تاتار, ورىس جانە ت.ب. كۇشىمەن ورناتتىق. ال وسىنداي بىرلەسكەن جاسامپازدىق ءىس-شارالار جاستارىمىزدىڭ بىرىگۋىنە ىقپال ەتەدى جانە بۇل اللەيا اۋدان تۇرعىندارى ءۇشىن جاقسى سىيلىق بولادى دەپ ۇمىتتەنەمىز», دەدى «اسسامبلەيا جاستارى» رقب توراعاسى تيمۋر جۇمىرباەۆ.
ءىس-شاراعا قاتىسۋشىلار وسىنداي جاستار باستامالارىن ىسكە اسىرۋ باسقا وڭىرلەردە دە جالعاساتىنىن اتاپ ءوتتى. ەستەرىڭىزگە سالا كەتەيىك, ەكولوگيانى ساقتاۋ جانە قورشاعان ورتانى قورعاۋ – «اسسامبلەيا جاستارى» ۇيىمى قىزمەتىنىڭ ماڭىزدى باعىتتارىنىڭ ءبىرى. سونداي-اق ۇيىم بەلسەندىلەرىنىڭ جوسپارىندا باسقا وڭىرلەردە «حالىق دوستىعى» ساياباقتارىنا اعاش وتىرعىزۋ دا بار. بۇل باستامانى بىلتىر قازان ايىندا قحا كەڭەسىنىڭ كەڭەيتىلگەن وتىرىسىندا مەملەكەت باسشىسى ۇسىنعان.
الماتى وبلىسىندا وتكەن ءىس-شارالارعا «اسسامبلەيا جاستارى» رقب توراعاسى ت.جۇمىرباەۆ, ASAR-UME قورىنىڭ نەگىزىن قالاۋشى جانە پرەزيدەنت جانىنداعى جاستار ساياساتى جونىندەگى كەڭەستىڭ مۇشەسى ا.نۇرماشەۆ, قازاقستان ۇيعىر جاستارى وداعىنىڭ توراعاسى ر.قايرىەۆ, «اسسامبلەيا جاستارى» رقب الماتى وبلىسىنداعى وكىلدىگىنىڭ توراعاسى ر.ۋسانوۆا جانە جاستار ۇيىمدارىنىڭ وكىلدەرى, ەرىكتىلەر مەن جەرگىلىكتى تۇرعىندار قاتىستى.
