شىنىندا دا حالىق داۋرىقپا سوزدەن شارشادى, ءار ادام جەكە باسى كۇن سايىن جاقسى وزگەرىستى سەزىنبەيتىن بولسا, بولاشاققا سەنىمى دە بولمايدى. مەن ءاربىر اۋىلدىق وكرۋگتىڭ ءوز قاراجاتى بولاتىنى, اۋداندىق جانە قالالىق ءماسليحات دەپۋتاتتارىن حالىقتىڭ پارتيالىق ءتىزىم بويىنشا ەمەس, تىكەلەي سايلايتىنى جونىندەگى اقپاراتتى ەستىپ قۋاندىم. شىنىندا دا قازىر دەپۋتاتتاردى حالىق تانىماي دا قالدى. ويتكەنى دەپۋتات پارتيا بەكىتكەن لينيادان شىعا الماي, ءوزىنىڭ جەكە پىكىرىن ايتا المايتىن دارەجەگە جەتتى عوي. ەندى وسى ايتىلعان وزگەرىستەردى تەزىرەك جۇزەگە اسىرۋ قاجەت. تەز ارادا, مۇمكىن جارتى جىل ىشىندە ەلىمىزدىڭ سايلاۋ تۋرالى زاڭدارىنا ءتيىستى وزگەرىستەر ەنگىزىلسە, جاڭا سايلاۋلار وتە باستايدى. كاسىبي سايلاۋ كوميسسيالارى قۇرىلاتىنى, بايقاۋشىلاردىڭ مارتەبەسى زاڭمەن بەكىتىلىپ, قورعالاتىنى سايلاۋ ساپاسىن ارتتىرا تۇسەتىنى انىق. مىسالى قازىر وبلىستىق سايلاۋ كوميسسياسىنىڭ شتاتىندا ەكى-اق ادام بار. بۇل ارينە, جەتكىلىكسىز ەكەنى تۇسىنىكتى عوي. ايتا كەتەيىن, بىزدە تۇراقتى سايلاۋ وتكىزۋمەن اينالىساتىن كاسىبي كوميسسيا كەڭەس كەزىندە دە بولعان ەمەس.
تاعى ءبىر ماسەلە – ءار ءوڭىردىڭ وزىنە ءتان ەرەكشەلىگى, قالىپتاسقان الەۋمەتتىك-ەكونوميكالىق الەۋەتى سارالانىپ, ناقتى ىسكە كىرىسۋ كەرەك. باتىس قازاقستان وبلىسىنىڭ الدىندا تۇرعان ەڭ ۇلكەن ماسەلە – اۋىل حالقىنىڭ تۇرمىسىن جاقسارتۋ دەر ەدىم. ءبىزدىڭ اۋىلداردىڭ تولىق الەۋەتى ءالى اشىلماي جاتىر. پرەزيدەنت ءوز جولداۋىندا ازىق-ت ۇلىك ماسەلەسىنىڭ وتە ماڭىزدى ەكەنىن ايتتى. ال بۇل ماسەلە اۋىلدى تۇلەتۋمەن عانا شەشىلەدى. اۋىل حالقىنىڭ تۇرمىسى جاقسارسا, ولار قالاعا كوشپەس ەدى, قالانىڭ ينفراقۇرىلىمىنا ارتىق سالماق تۇسپەس ەدى. ءار ازاماتتىڭ ادال كاسىپ ەتۋىنە, اۋىلدا قالۋىنا جاعداي جاساۋ كەرەك. ەلدى ازىق-ت ۇلىكپەن قامتاماسىز ەتۋ ستراتەگيالىق مىندەتى اۋىل ارقىلى عانا جاسالادى. ءبىزدىڭ حالىقتىڭ تامىرى اۋىلدا. بىراق بىزدە, سونىڭ ىشىندە باتىس قازاقستان وبلىسىندا اۋىل شارۋاشىلىعى قازىر ءوز دەڭگەيىندە ەمەس. حالىق مالىن وسىرەدى, بىراق قالاي ساتارىن بىلمەيدى. ءجۇن مەن تەرى وڭدەلمەيدى. قۇس باعىلمايدى. وسى مال شارۋاشىلىعى ونىمدەرىنىڭ ءبارى اۋىلدا وڭدەلىپ, دۇكەن سورەسىنە دايىن ءونىم قالپىندا تۇسەتىندەي ەتىپ جاساۋىمىز كەرەك. اۋىلدا ەگىن تەحنولوگياسى دا دۇرىس قولدانىلمايدى. ديقاندارىمىزدىڭ كوبى كوككە قاراپ, تەك جاڭبىرعا سەنىپ وتىرادى. ال شەتەلدە تابيعي جاعدايى بىزدەن دە قيىن جەرلەردە مول ءونىم الۋدىڭ الگوريتمدەرى ابدەن قالىپتاسقان. سول ءۇردىستى الىپ كەلۋ كەرەك. ۇنەم مەن جوعارى تەحنولوگيانى اۋىلعا كەڭىنەن ەنگىزسەك, اۋىلدىڭ ەكىنشى تىنىسى اشىلارى ءسوزسىز. مەن بۇل ءسوزدى كوپ جىل اۋدان اكىمى بولىپ, شارۋاشىلىق باسقارعان تاجىريبيەمنەن ايتىپ وتىرمىن.
عايسا قاپاقوۆ,
باتىس قازاقستان وبلىستىق سايلاۋ كوميسسياسىنىڭ توراعاسى
