پرەزيدەنتتىك جاستار كادرلىق رەزەرۆى – بۇگىندە مەملەكەتتىڭ بولاشاعىنا بەيجاي قارامايتىن جاستارعا زور مۇمكىندىك بەرەتىن جانە ونى جۇيەلى تۇردە جۇزەگە اسىرۋعا جول اشاتىن قۇرال. ستراتەگيالاردى قۇرۋ مەن ەل دامۋىنىڭ ۆەكتورىن بەلگىلەۋدە ۇزاقمەرزىمدى جوسپارلاۋ جانە ناقتى ماقسات قويۋدىڭ ماڭىزى زور. ءدال وسى ماڭىزدى مىندەتتەر ەل مۇددەسى ءۇشىن قىزمەت ەتۋدىڭ جاڭا ماعىنالارىن قالىپتاستىرادى. مۇنىڭ بارلىعىن ادامزات عاسىرلار بويى «پروگرەسس» دەپ اتاپ كەلدى. وسى مەجەگە قول جەتكىزۋ ءۇشىن ءتۇرلى يدەيالاردى ىسكە اسىرىپ, قانداي دا ءبىر تۇردە ستراتەگيالىق ماقساتتاردى انىقتادى. بىراق بىزدە ءبىر ماسەلە بار. ونى مەملەكەت باسشىسى قاسىم-جومارت توقاەۆ Nur Otan پارتياسىنىڭ كەزەكتەن تىس XXII سەزىندە «جاس جانە قابىلەتتى كادرلارعا جول بەرمەۋ ۇلكەن كەمشىلىك ەكەنىن اتاپ كورسەتتى. ء«بىر عانا ماسەلە – الەۋمەتتىك ءليفتىنىڭ جوقتىعى. ءبىز جاس جانە قابىلەتتى كادرلارعا جول بەرمەيمىز, بۇل – ءبىزدىڭ ۇلكەن كەمشىلىگىمىز», دەدى مەملەكەت باسشىسى.
ماسەلەن, مەن بارىنە كومەكتەسكىم كەلەدى. مۇمكىن بولسا ۇلتىنا, جاسىنا, بىلىمىنە, الەۋمەتتىك جاعدايىنا, تۇرعان جەرىنە قاراماي قولىمنان كەلگەنشە كومەك قولىن سوزسام دەيمىن. ءبىز ءبارىمىز ءبىر-بىرىمىزگە كومەكتەسكىمىز كەلەدى. ادام بالاسىنىڭ بولمىسى وسىنداي. ءبىز باقىتتى قوعامدا ءومىر سۇرگىمىز كەلەدى. ءبىز ءبىر-ءبىرىمىزدى جەك كورگىمىز نە كوكىرەگىمىزدى كوككە كوتەرىپ جۇرگىمىز كەلمەيدى. بۇل الەمدە بارىنە ورىن بار. ءبىزدىڭ جەرىمىز باي, قازاقستان ءبارىن قامتاماسىز ەتە الادى. ءومىر جولى ەركىن جانە ادەمى بولۋى مۇمكىن, بىراق ءبىز ونداي ومىردەن الشاقتامىز. ويتكەنى ساراڭدىق ادامداردىڭ جانىن ۋلادى, الەمدى جەككورۋشىلىك قورشادى, حالىقتى قاسىرەت پەن قانتوگىسكە يتەرمەلەدى. ءبىز جىلدامدىقتى دامىتتىق, بىراق ءوزىمىزدى جاۋىپ تاستادىق. مولشىلىق بەرەتىن يندۋستريا ءبىزدى مۇقتاجدىقتا قالدىردى. بىلىمسىزدىك ءبىزدى نادان ەتتى. ءبىزدىڭ رۋحىمىز قاتال جانە مەيىرىمسىز. ءبىز تىم كوپ ويلايمىز جانە تىم از سەزىنەمىز. ماتەريالدىق جاعدايدان گورى بىزگە ادامزات قاجەت بولۋى كەرەك. بىزگە ماقتانۋدان گورى مەيىرىمدىلىك پەن ادامگەرشىلىك قاجەت. مۇنداي قاسيەتتەر بولماسا, ءومىر زورلىق-زومبىلىققا ۇشىرايدى جانە ءبارى جوعالادى. قازاق جوعالىپ كەتەدى. ۇشاق پەن ينتەرنەت ءبىزدى جاقىنداستىردى. وسى ونەرتابىستاردىڭ تابيعاتى ادامداردى ىزگىلىككە, جالپى باۋىرلاستىققا شاقىرادى.
قازىرگى جاستاردىڭ مۇمكىندىگى زور. ولاردىڭ سونى تەحنولوگيالاردى جاساۋعا كۇشتەرى, ءبىلىمى, كاسىبيلىگى جەتەدى. بۇگىنگى جاستاردىڭ باقىتتى ەل قۇراتىن كۇشى بار. بىزدەردىڭ, قازاق ەلىنىڭ كەلەشەكتى, بۇگىنگى قوعامدى, ءومىردى ەركىن جانە ادەمى ەتۋگە كۇش-جىگەرىمىز مول. ول ءۇشىن دەموكراتيا جولىندا وسى كۇش-قۋاتىمىزدى وڭ ماقساتقا پايدالانۋىمىز قاجەت. ءبارىمىز بىرىگىپ, مەملەكەت باسشىسى ايتقان جاڭا قازاقستاننىڭ جاڭا جولىن سالۋعا اتسالىسۋىمىز قاجەت. جاستارعا جۇمىس ىستەۋگە مۇمكىندىك بەرەتىن لايىقتى قوعام – جاستارعا بولاشاققا سەنىمدىلىك, قارتتارعا ساليقالى قارتايعان شاق قامتاماسىز ەتەتىن جاڭا الەم ءۇشىن كۇرەسەيىك. ول ءۇشىن بىزگە ساراڭدىقتى, جەككورۋشىلىك پەن توزىمسىزدىكتى جويۋ قاجەت. عىلىم مەن پروگرەسس – بۇكىل ادامزاتتى باقىتقا جەتەلەيتىن جول. جاڭا قازاقستاننىڭ جاستارى وسى جولدى تاڭداعاندا عانا, وسى ماقساتتىڭ اينالاسىندا بىرىككەندە عانا دىتتەگەن مەجەگە جەتە الامىز.
سول سەبەپتى بارشاڭىزدى عىلىم مەن پروگرەسكە اكەلەتىن جولدى تاڭداۋعا, جاستاردى تۇسىنۋگە شاقىرامىن. بۇل رەتتە ادام رەسۋرستارى ەڭ ماڭىزدى العىشارت بولۋى كەرەك. ويتكەنى مەملەكەتتىڭ ەڭ قۇندى بايلىعى – ەلىمىزدىڭ بولاشاعىن جاسايتىن جاستار. الايدا وسى تۇستا «اتاق-داڭقى مەن قوماقتى اقشاسى جوق, قاراپايىم وتباسىندا تاربيەلەنگەن جاس جىگىت ستراتەگيا تۋرالى, اسىرەسە جاھاندىق ماسەلەگە قاتىستى نە ىستەي الادى؟» دەگەن زاڭدى سۇراق تۋىندايدى. الايدا ەشبىر قولداۋ, قارجىسىز العا ۇمتىلعان جاستىڭ ءوزى – ۇلكەن كۇش!
ءانۋار نۇرتازين,
ەكونوميكالىق شولۋشى,
ساياساتتانۋشى, پرەزيدەنتتىك جاستار كادرلىق رەزەرۆىنىڭ مۇشەسى
