ايماقتار • 22 ناۋرىز، 2022

پەتروپاۆلداعى اپات: ۇيىندىلەردىڭ استىندا جۇمىسشى ايەلدىڭ دەنەسى تابىلدى

138 رەت كورسەتىلدى

پەتروپاۆلدا جىلۋ-ەلەكتر ورتالىعىنداعى اپات كەزىندە حابار-وشارسىز كەتكەن ماشينيست-قاراۋشى ايەلدىڭ دەنەسى ۇيىندىلەردىڭ استىندا تابىلدى، دەپ حابارلايدى Egemen.kz.

سقو دەنساۋلىق ساقتاۋ باسقارماسىنىڭ ءباسپاسوز قىزمەتى جىلۋ-ەلەكتر ورتالىعىندا ءتۇتىن مۇرجاسى وپىرىلىپ تۇسكەن كەزدە ءۇيىندى استىندا قالعان ماشينيست-قاراۋشىنىڭ دەنەسى تابىلعانىن مالىمدەدى.

سقو توتەنشە جاعدايلار دەپارتامەنتىنىڭ مالىمەتىنشە، كەزەكشى اۋىسىم قىزمەتكەرلەرىنىڭ بار-جوعىن انىقتاۋ كەزىندە قازاندىق تسەحىنىڭ جابدىقتارىن قاراۋشى ماشينيست، 1984 جىلى تۋعان ايەلدىڭ حابار-وشارسىز كەتكەنى انىقتالدى. سقو تجد قىزمەتكەرلەرى وقيعا ورنىندا دەرەۋ ىزدەستىرۋ-قۇتقارۋ جۇمىستارىن باستادى. كەيىن ولارعا نۇر-سۇلتان قالاسىنىڭ جەدەل-قۇتقارۋ جاساعىنىڭ قۇتقارۋشىلارى دا قوسىلدى.

ىزدەۋ جۇمىستارى 2 تاۋلىكتەن استام ۋاقىت جۇرگىزىلدى. بۇل جۇمىسقا كينولوگيالىق قىزمەت تە تارتىلدى. اۋىر ينجەنەرلىك تەحنيكانى پايدالانۋ مۇمكىندىگى بولماعاندىقتان قۇتقارۋشىلار ۇيىندىلەردى قولمەن شانتس جانە گيدراۆليكالىق قۇرالداردى پايدالانا وتىرىپ قوپاردى.

22 ناۋرىز كۇنى ساعات 10:32-دە قۇرىلىس كونسترۋكتسيالارىنىڭ ۇيىندىلەرىنىڭ استىنان ايەلدىڭ دەنەسى تابىلدى. ساعات 12:05-تە مۇردە ۇيىندىلەردىڭ استىنان شىعارىلىپ، سوت-مەديتسينالىق ساراپتاما جۇرگىزۋ ءۇشىن ءتيىستى مەكەمەگە جەتكىزىلدى. 

قازىرگى ۋاقىتتا سقو تجد پسيحولوگيالىق قىزمەت توبى مارقۇمنىڭ تۋىستارىمەن جۇمىس ىستەپ جاتىر.

مەرت بولعان جۇمىسشىنىڭ اتى-ءجونى - ناتاليا ولەگوۆنا چەفونوۆا.

«سەۆكازەنەرگو» اق باسشىلىعى مەن ۇجىمى پەتروپاۆل «2-جىلۋ-ەلەكتر ورتالىعى» جشس-دە مەرت بولعان ناتاليا چەفونوۆانىڭ وتباسىنا جانە تۋىستارىنا قايعىرىپ كوڭىل ايتتى.

«سەۆكازەنەرگو» اق ءباسپاسوز قىزمەتىنىڭ مالىمەتىنشە، كومپانيا باسشىلىعى ن.چەفونوۆانىڭ وتباسىنا تۇرعىن ءۇي جاعدايىن جاقسارتۋعا، قايتىس بولعان جۇمىسشىنىڭ بەس جىلدىق ەڭبەكاقىسى مولشەرىندە وتباسىنا قارجىلىق وتەماقى تولەۋ تۇرىندە قولداۋ كورسەتىپ، مەرت بولعان ايەلدىڭ بالاسىنا ءبىلىم الۋ اقىسىن  تولەۋ تۇرىندە كومەك كورسەتەدى. جەرلەۋدى ۇيىمداستىرۋعا بايلانىستى بارلىق شىعىنداردى جۇمىس بەرۋشى ءوز موينىنا الماق.

اپاتتىڭ سەبەبى مەملەكەتتىك كوميسسيانىڭ قورىتىندىسىنان كەيىن بەلگىلى بولادى.

ەسكە سالا كەتسەك، 20 ناۋرىز كۇنى ساعات 19:20-دا پەتروپاۆلداعى جىلۋ-ەلەۋتر ورتالىعىنىڭ ءبىر مۇرجاسى قۇلادى. ورتالىقتاعى اپاتقا بايلانىستا قىلمىستىق ءىس قوزعالدى. جەو-داعى ءتۇتىن مۇرجاسىنىڭ جارتىلاي قۇلاۋىنا بايلانىستى وبلىس اكىمى جەدەل شتاب قۇردى.

وسى وقيعا بويىنشا پرەزيدەنت وبلىس ورتالىعى مەن باسقا دا ەلدى مەكەندەردىڭ تۇرعىندارىن تەز ارادا جىلۋمەن قامتاماسىز ەتۋدى تاپسىردى.

ال 21 ناۋرىز كۇنى اپات بولعان جىلۋ ورتالىعىنىڭ ديرەكتورى مەن باس ينجەنەر ۋاقىتشا ۇستاۋ يزولياتورىنا قامالدى.

سوڭعى جاڭالىقتار

ەرلىككە تولى ەڭبەك

قازاقستان • كەشە

شيراز بۇلب ۇلى

ادەبيەت • كەشە

اتا جۇرتتا

ادەبيەت • كەشە

اباي وبلىسىنىڭ اتى وزدى

ايماقتار • كەشە

ۇقساس جاڭالىقتار