«2022 جىلعى 20 ناۋرىزدا پەتروپاۆل جەو-2 №1 ءتۇتىن قۇبىرى جارتىلاي قۇلاعانعا دەيىن 4 قازاندىق جۇمىس ىستەدى. تەحنولوگيالىق تۇرعىدا بۇزىلعاننان كەيىن, 2 قازاندىق قالدى. جىلۋ ەنەرگياسىن بەرۋدىڭ تومەندەۋى ناتيجەسىندە جىلۋ جەلىلەرىندەگى تەمپەراتۋرا +40°س-عا دەيىن تومەندەدى», دەلىنگەن مينيسترلىك مالىمەتىندە.
بەلگىلى بولعانداي, 2022 جىلعى 21 ناۋرىزدا ساعات 9:30-دا 3-ءشى قازاندىق ىسكە قوسىلدى, جىلۋ جەلىلەرىندە تەمپەراتۋرا كوتەرىلە باستادى.تۇستەن كەيىن 4 قازاندىقتى قوسۋ جوسپارلانۋدا, بۇل جىلۋ جەلىلەرىنىڭ تەمپەراتۋرالىق رەجيمىن بەلگىلەنگەن مولشەرگە دەيىن قالپىنا كەلتىرۋگە مۇمكىندىك بەرەدى.
«سونىمەن قاتار, ءتۇتىن مۇرجاسىنىڭ بۇزىلۋىنان ۇيىندىلەردى تازارتۋ, سونىڭ ىشىندە ەلەكتر ستانتسياسىنىڭ ءماشينيستىن ىزدەۋ بويىنشا جۇمىستار جالعاسىپ جاتىر. سونداي-اق بۇزىلۋدىڭ ماسشتابىن جانە قالپىنا كەلتىرۋ جۇمىستارىنىڭ كولەمىن باعالاۋ جۇرگىزىلىپ جاتىر», دەپ اتالىپ وتكەن حابارلامادا.
ەسكە سالا كەتەيىك, پەتروپاۆلدا جىلۋ ەلەكتر ورتالىعىنىڭ ءبىر مۇرجاسى قۇلادى.
پەتروپاۆلداعى جىلۋ-ەلەكتر ورتالىعىنداعى اپاتقا بايلانىستى قىلمىستىق ءىس قوزعالدى. جۇمىسشىلاردىڭ بىرەۋى تابىلماي جاتىر.
