سولاردىڭ ءبىرى – جابىلىپ قالعان وبلىستاردى قايتا اشۋ. بۇل ماسەلەنى شەشۋدى حالقىمىز ۇزاق جىلدار قوزعاپ ءجۇردى. ول مىنە, شەشىمىن تاپتى. اشىلعالى وتىرعان وبلىستارعا جانە ونىڭ ورتالىقتارىنا تاريحي اتاۋ بەرۋ تۋرالى ايتقان پرەزيدەنت پىكىرى حالقىمىزدى رۋحتاندىردى جانە تەڭدەسى جوق جاڭالىق بولدى.
تالدىقورعاننان الىس ەلدى مەكەندەرگە, سەمەي مەن جەزقازعان ءوڭىرىنىڭ تۇرعىندارىنىڭ وبلىس ورتالىقتارىنا بارىپ قايتۋى قيىنداپ كەتتى. الىس ەلدى مەكەندەردە جۇمىسسىزدىق پايدا بولا باستادى. بۇل تاريحي شەشىم. بىزدەر وسى جۇمىستىڭ باياندى بولۋىنا ءبىر كىسىدەي اتسالىسۋىمىز كەرەك. سونداي-اق جولداۋدا «كۇشتى پرەزيدەنت, ىقپالدى پارلامەنت, ەسەپ بەرەتىن ۇكىمەت» قاعيداتىن باسشىلىققا الامىز, دەدى پرەزيدەنت.
سونىمەن قاتار جولداۋدا ايتىلعان باعىتتاردى ىسكە اسىرۋ ءۇشىن كونستيتۋتسياعا 30-دان استام وزگەرىس ەنگىزىلەتىنىن جانە 20-عا تارتا زاڭدار قابىلداۋ كەرەكتىگىن اتاپ ءوتتى.
مەملەكەت باسشىسى قازاقستاندا جاڭا كونستيتۋتسيالىق سوت قۇرۋدى ۇسىنىپ, ادام قۇقىقتارى جونىندەگى ۋاكىل قازىرگى سوتتاردىڭ شەشىمىمەن كەلىسپەگەن جاعدايدا, وسى سوتقا جۇگىنۋگە بولاتىنىن ايتتى.
ق.توقاەۆ ەلدى باسقارىپ وتىرعان پرەزيدەنت پارتياعا مۇشە بولماۋى كەرەك دەپ, زاڭعا ءتيىستى وزگەرىستەر ەنگىزۋ كەرەك ەكەنىن دە اتاپ ءوتتى. «قازىر ءبارى دەرلىك پرەزيدەنتكە باعىنعان جانە بۇل تەرىس نارسە. بىرتىندەپ مۇنداي تاجىريبەدەن كەتۋ كەرەك. مەن ءۇشىن مەملەكەتتىڭ ۇزاقمەرزىمدى مۇددەسى بيلىكتەگى قوسىمشا ءبىر ۇستەمدىكتەن ارتىق. سوندىقتان, پرەزيدەنت سايلانعان مەرزىمى ىشىندە پارتياعا مۇشە بولماسىن دەگەن وزگەرىس ەنگىزۋدى ۇسىنامىن. بۇل ساياسي باسەكەلەستىكتى كۇشەيتىپ, بارلىق پارتيالاردىڭ دامۋىنا جاعداي جاسايدى», دەدى ق.توقاەۆ.
سونىمەن قاتار پرەزيدەنت زاڭعا ءتيىستى وزگەرىس ەنگىزە وتىرىپ, ەندى اكىمدەر مەن ولاردىڭ ورىنباسارلارى پارتيا فيليالدارىن باسقارۋدى توقتاتۋى كەرەك دەدى. ەندى اكىمدەردەن بولەك ەسەپ كوميتەتىنىڭ توراعاسى, ورتالىق سايلاۋ كوميسسياسىنىڭ توراعاسى سياقتى وتە ماڭىزدى قىزمەت اتقاراتىن ادامدار دا پارتياعا مۇشە بولمايدى.
ءابدالى نۇراليەۆ,
سەناتور
