ايماقتار • 16 ناۋرىز، 2022

الماتىدا «جاڭا قازاقستان» جاستار قوزعالىسى قۇرىلادى

172 رەت كورسەتىلدى

16 ناۋرىز كۇنى الماتى بەلسەندىلەرىنىڭ ۇيىمداستىرۋىمەن «جاڭا قازاقستان» تاقىرىبىندا جاستار قوزعالىسىن ۇيىمداستىرۋ ماسەلەسىن تالقىلاۋ جونىندەگى وتىرىس ءوتتى، دەپ حابارلايدى Egemen.kz.

جيىنعا قوعام بەلسەندىسى، مەتسەنات سىرىمبەك تاۋ، شىعارماشىل جاستار وكىلى وڭداسىن ك ۇلىمبەت، G-38 ستۋدەنتتىك قوزعالىسىنىڭ نەگىزىن قالاۋشى ايسۇلۋ ەرنيازوۆا، سپورت شەبەرى جانقوش تۇراروۆ، ءال-فارابي اتىنداعى قازۇۋ پرورەكتورى ءاليا ماساليموۆا، اباي اتىنداعى قازۇپۋ پرورەكتورى شىڭعىس نۇرلانوۆ، قبتۋ پرورەكتورى ەكاتەرينا سمولياكوۆا، حبك پرورەكتورى قايىرجان مەڭدىعاليەۆ پەن وزگە دە جوو-داردىڭ وكىلدەرى قاتىستى.

وتىرىس بارىسىندا سپيكەرلەر جاستار مەن ستۋدەنتتەردىڭ بەلسەندىلىگىن ارتتىرۋ ماقساتىندا قوعام بەلسەندىلەرى تاراپىنان قانداي ءىس-شارالار ۇيىمداستىرىلاتىنىن ايتتى.

18 ناۋرىز كۇنى ساعات 14:00-دە الماتى جاستارىنا جاقسى سەرپىلىس بەرۋ ءۇشىن «الماتى ارەنادا» جەكە كاسىپكەرلەردىڭ قولداۋىمەن كونتسەرت وتكىزىلەتىنى حابارلاندى. بۇل كونتسەرتكە تانىمال ونەر جۇلدىزدارى مەن بەلگىلى ازاماتتار قاتىسادى، ولار مەرەكەلىك باعدارلامامەن قوسا، ونەگەلى اڭگىمە ايتىپ، ءوز تاجىربيەسىمەن بولىسەدى.

«سوڭعى ۋاقىتتا اينالامىز نەگاتيۆكە تولىپ كەتتى. ستۋدەنتتەرىمىز ونلاين وقۋ فورماتىنا كوشكەلى بەرى، قوعامدىق ىستەرگە بەلسەندى ات سالىسا الماي ءجۇر. سوندىقتان ءبىز جاستارعا جاقسى كوڭىل-كۇي سىيلاپ، ولارعا ءوز تاجىربيەمىزبەن بولىسسەك دەگەن نيەتتەمىز. ماقساتىمىز پارتيا قۇرىپ، ساياسي مانساپ باستاۋ ەمەس. ازاماتتىق ءارى اعالىق جاۋاپكەرشىلىگىمىزدى سەزىنىپ، جاستاردى جاقسى ىستەردىڭ باسىندا بىرىكتىرمەكپىز»، دەدى وتىرىستىڭ ۇيىمداستىرۋشىسى سىرىمبەك تاۋ.

 «جاستاردى قولداۋعا باعىتتالعان بۇل شارانى ءبىزدىڭ ستۋدەنتتەر جاقسى قابىلدادى. قازىردىڭ وزىندە 10-نان استام جوو باسشىلىعى ايتىلعان جۇمىستارعا ۇلەس قوسۋعا ءوز نيەتتىلىكتەرىن ءبىلدىردى. وسى وتىرىستى ۇيىمداستىرۋدىڭ ماقسات-مۇددەسى بۇگىنگى پرەزيدەنت جولداۋىنا ايتىلعان ماسەلەلەرمەن تۇسپا-تۇس كەلەدى. مەملەكەت باسشىسى قاسىم-جومارت توقاەۆ «قازاقستان بىزدەن باسقا ەشكىمگە كەرەك جوق» دەدى. ۇكىمەت تاپسىرماسىنان بولەك قوعام بەلسەندىلەرىنىڭ بىرىگىپ ەل دامۋىنا قادام جاساۋى، پرەزيدەنت سوزدەرىن دۇرىس ءتۇسىنۋىمىزدىڭ بەلگىسى»، دەدى حبك پرورەكتورى قايىرجان مەڭدىعاليەۆ.

جيىن سوڭىندا شارا ۇيىمداستىرۋشىلارى بۇدان كەيىن دە جاستاردى قولداۋعا ارنالعان وزگە دە اتقارىلاتىن جۇمىستار جوسپارلانعانىن حابارلادى.

سوڭعى جاڭالىقتار

تمد ءسامميتى قازان ايىندا وتەدى

پرەزيدەنت • بۇگىن، 19:56

بۇگىنگى ۆاليۋتا باعامى

قارجى • بۇگىن، 10:17

ۇقساس جاڭالىقتار