ماقتاارال اۋداندىق شەكارا باسقارماسىنىڭ كەلىسىمىمەن وزبەكستان رەسپۋبليكاسىمەن شەكتەسەتىن شەكارانىڭ بەيتاراپ اۋماعىنداعى «شىعىس» كوللەكتورىنىڭ ەكى جاعىندا ورناتىلعان تەمىر تورلارى الىنىپ, سۋ وتكىزگىش قابىلەتتى ارتتىرىلدى. اتاكەنت كەنتىنىڭ ەگىستىك القاپتاردىڭ اياق جاعىنان ونىمدىلىگى ساعاتىنا 100 تەكشە مەتر سۋ سورعى ناسوستار ورناتىلىپ, ك-18 كانالىنا تاستالدى. سونداي-اق بۇل كۇنى قاتتى جاۋىن-شاشىن سالدارىنان اتاكەنت كەنتى, ماقتاارال, ج.نۇرلىباەۆ, دوستىق, جاڭاجول, جامبىل اۋىلدىق وكرۋگتەرى اۋماعىندا جەر استى سۋى دەڭگەيى كوتەرىلىپ, بىرنەشە ۇيلەردىڭ اۋلاسىنا سۋ تولعاندىعى جونىندە اۋداندىق ءورت ءسوندىرۋ بەكەتتەرىنىڭ بايلانىس بولىمىنە تۇرعىنداردان حابارلاما تۇسكەن. ول بويىنشا جەرگىلىكتى اتقارۋشى جانە توتەنشە جاعداي ءبولىمىنىڭ قىزمەتكەرلەرى تاراپىنان اۋماقتان سۋ سورىپ شىعارۋ جۇمىستارى جۇرگىزىلدى. اۋدان اكىمدىگىنىڭ حابارلاۋىنشا, 60-قا جۋىق سۋ سورعىشتار كوشەلەر مەن ءۇيدىڭ اۋلالارىنا تولعان سۋدى شىعارۋ جۇمىستارىمەن اينالىستى.
جالپى, تۇركىستان وبلىسىندا سۋ تاسقىنىنا قارسى قاۋىپسىزدىك جۇمىستارى جوسپارعا ساي جۇرگىزىلۋدە. توتەنشە جاعدايلار دەپارتامەنتى باستىعىنىڭ ورىنباسارى ە.سارىباەۆتىڭ ايتۋىنشا, قازىرگى تاڭدا وبلىس اۋماعىندا سۋ تاسقىنى بويىنشا جاعداي ءبىر قالىپتى, تۇراقتى باقىلاۋدا. سۋ تاسقىنىنىڭ الدىن الۋ ماقساتىندا تۇركىستان وبلىسىندا 1 200 شاقىرىمنان استام 680 ارىق, كانال قوقىستان تازارتىلدى, 61 500 دانا قاپ, 482 توننا ينەرتتى ماتەريال ازىرلەنگەن. جەرگىلىكتى اتقارۋشى ورگاندار مەن توتەنشە جاعدايلار دەپارتامەنتى تاراپىنان جالپى 2 065 ادام, 400 بىرلىك تەحنيكا, 6 قايىق, 294 موتوپومپا دايىندىققا كەلتىرىلگەن. سۋ قويمالارى مەن وزەندەردىڭ سۋ رەجىمىنە كۇندەلىكتى مونيتورينگ جۇرگىزىلۋدە. وبلىس بويىنشا سۋ قويمالارىنىڭ ورتاشا تولۋى 45-50%-دى قۇرايدى. ياعني تاسقىن سۋلاردى قابىلداۋعا جەتكىلىكتى ورىن بار.
تۇركىستان وبلىسى
