سپورت كەشەنىنىڭ اشىلۋ راسىمىندە وبلىس اكىمى ارحيمەد مۇحامبەتوۆ قۇتتىقتاۋ ءسوز سويلەپ, ايماقتاعى سپورتتىڭ دامۋىن تىلگە تيەك ەتتى.
– سوڭعى ۋاقىتتا وبلىس تۇرعىندارىنىڭ 38 پايىزى نەمەسە 297 مىڭنان استام ادام, ونىڭ ىشىندە 80 مىڭ ءجاسوسپىرىم دەنە شىنىقتىرۋمەن, سپورتپەن تۇراقتى شۇعىلدانادى. پرەزيدەنت تاپسىرماسى بويىنشا ايماقتا ءبىرازدان بەرى سپورت باعىتىنداعى مەملەكەتتىك تاپسىرىستار جۇزەگە اسىرىلىپ جاتىر. وعان وبلىس بيۋدجەتىنەن شامامەن 500 ملن تەڭگە قاراستىرىلعان. بۇل وتكەن جىلمەن سالىستىرعاندا 2,5 ەسە ارتىق. جاتتىقتىرۋشى-وقىتۋشىلارعا قوسىمشا 146 جۇمىس ورنى قۇرىلىپ, 7 مىڭنان استام جاس جەتكىنشەك, ونىڭ ىشىندە كوپبالالى جانە از قامتىلعان وتباسىلاردان شىققان ورەندەر سپورت سەكتسيالارىنداعى تەگىن ساباقتارعا بارىپ ءجۇر, – دەدى ا.مۇحامبەتوۆ.
ىرگەتاسى 2020 جىلى قالانعان جاڭا سپورت نىسانىنىڭ قۇرىلىسىن مەملەكەت-جەكەمەنشىك ارىپتەستىگى اياسىندا «استاناگراجدانستروي» كومپانياسى جۇرگىزگەن. جوبانىڭ قۇنى 2 ملرد تەڭگەدەن اسادى. جۇمسالعان اقشانىڭ 30%-ى بيۋدجەتتەن بەرىلسە, 70%-ىن بانك قارجىلاندىردى.
سپورت كەشەنىنىڭ جالپى اۋدانى 8 مىڭ شارشى مەتر بولادى. جاڭا عيمارات قاجەتتى تەحنيكالاردىڭ وزىق تۇرلەرىمەن جابدىقتالعان. باسسەيندەگى سۋ حالىقارالىق ستاندارتارعا سايكەس تازارتىلىپ وتىرادى.
سالتاناتتى جيىننىڭ سوڭى سۋدا جۇزۋدەن وبلىس چەمپيوناتىنا ۇلاستى. №1 سپورت مەكتەبىنىڭ جاتتىقتىرۋشىسى سەرگەي گوروششەنيا جاڭا باسسەيندە جاتتىققان سپورتشىلاردىڭ كوپ كەشىكپەي جوعارعى ناتيجەلەرگە قول جەتكىزەتىنىنە سەنىمدى.
– بۇعان دەيىنگى 25 مەترلىك قىسقا باسسەيندە سپورتشىلاردى جوعارعى دەڭگەيدە جاتتىقتىرۋعا مۇمكىندىك بولماي كەلدى. سوندىقتان 50 مەترلىك باسسەيندە جاتتىعاتىن وزگە وڭىرلەردەگى سپورتشىلارمەن جارىسقا ءتۇسۋ قيىن. ۇزىن باسسەيندەگى جاتتىعۋ سپورتشىنىڭ ءجۇزۋ جىلدامدىعىن ارتتىرىپ, تەحنيكاسىن شىڭداۋعا وتە قولايلى, – دەدى جاتتىقتىرۋشى.
قوستاناي وبلىسى
