اتالعان شارا قايراتكەردىڭ ءومىرى مەن شىعارماشىلىعىنا ارنالدى. كونفەرەنتسياعا جامبىل وبلىسى اكىمىنىڭ ورىنباسارى داۋلەت كارىبەك, د.قوناەۆ اتىنداعى حالىقارالىق قوردىڭ ۆيتسە-پرەزيدەنتى بولات بايبول, وبلىستىق «قوناەۆ قورىنىڭ» توراعاسى الىمبەك جۇماباەۆ, تالاس اۋدانىنىڭ اكىمى قاناتبەك مادىبەك جانە ارداگەرلەر مەن زيالى قاۋىم وكىلدەرى قاتىستى.
جيىندا جازۋشى, قازاقستاننىڭ ەڭبەك سىڭىرگەن قايراتكەرى كوسەمالى ءساتتىباي ۇلى, فيلولوگيا عىلىمدارىنىڭ دوكتورى, پروفەسسورلار سامەن قۇلباراق, مەرۋەرت كوپباەۆا, تاريح عىلىمدارىنىڭ كانديداتى, دوتسەنت ەرمەك سەرىكباەۆ جانە تالاس اۋداندىق بيلەر كەڭەسىنىڭ توراعاسى ساۋلەمباي ابسادىق ۇلى بايانداما جاساپ, د.قوناەۆتىڭ جالپى ءومىر جولىنداعى ونەگەلى ىستەرى مەن ەل ءۇشىن سىڭىرگەن ەڭبەگىن اتاپ ءوتتى. سونداي-اق د.قوناەۆ اتىنداعى حالىقارالىق قوردىڭ ۆيتسە-پرەزيدەنتى بولات بايبول قايراتكەردىڭ ونەگەلى ءومىرىن جاستارعا ۇلگى ەتۋ, ناسيحاتتاۋ قاجەتتىلىگىن ايتسا, وبلىس اكىمىنىڭ ورىنباسارى داۋلەت كارىبەك ەل ەكونوميكاسى مەن مəدەنيەتىن دامىتۋ جولىندا ايانباي ەڭبەك ەتكەنىن جەتكىزدى. كونفەرەنتسيا سوڭىندا بىرقاتار ازاماتتار دىنمۇحامەد قوناەۆتىڭ 110 جىلدىق مەرەكەلىك مەدالىمەن ماراپاتتالدى.
بۇدان كەيىن قاراتاۋ قالاسىنىڭ ورتالىعىنان دىنمۇحامەد قوناەۆ اتىنداعى مۋزەي اشىلدى. نىسان زاماناۋي ۇلگىدە سالىنعان. مۇندا كورنەكتى تۇلعانىڭ ءوزى پايدالانعان بىرقاتار زاتتارىمەن قاتار, قايراتكەردىڭ ءومىر جولىنان سىر شەرتەتىن فوتوسۋرەتتەر, كىتاپتار جانە وزگە دە قۇجاتتار قويىلعان. نىساننىڭ جالپى اۋدانى 216 شارشى مەتردى قۇرايدى. عيمارات ءۇش بولمەدەن تۇرادى. اتالعان مۇراجايدىڭ لەنتاسىن وبلىس اكىمىنىڭ ورىنباسارى داۋلەت كارىبەك, د.قوناەۆ اتىنداعى حالىقارالىق قوردىڭ ۆيتسە-پرەزيدەنتى بولات بايبول مەن وبلىستىق «قوناەۆ قورىنىڭ» توراعاسى الىمبەك جۇماباەۆ قيدى. سونداي-اق مۋزەيدىڭ اشىلۋ سالتاناتىنا ارنايى كەلگەن بولات بايبول دىنمۇحامەد احمەت ۇلىنىڭ كيىمدەرىن, چەمودانى مەن قولدانعان ىدىس-اياقتارىن جانە كورنەكتى تۇلعانىڭ جازعان كىتاپتارىن مۇراجايعا تارتۋ ەتتى.
جامبىل وبلىسى
