ءيا, «قازاق زاعيپتار قوعامى» قوعامدىق بىرلەستىگىنىڭ قاراعاندى وقۋ-وندىرىستىك كاسىپورنى» جشس-نىڭ بۇل تسەحتارىندا كوزى كورمەيتىندەر مەن ناشار كورەتىن جاندار جۇمىس ىستەيدى. اتالعان كاسىپورىننىڭ ديرەكتورى باقىتبەك بەيسەباەۆ قازاق زاعيپتار قوعامىنىڭ كووپەراتسيا ادىسىمەن جۇمىس جۇرگىزۋگە بەيىم ءوندىرىس ساياساتىن ۇستاناتىنىن ايتادى.
– بۇگىندە ەلىمىز بويىنشا قوعامدىق بىرلەستىكتىڭ 29 كاسىپورنى جۇمىس ىستەيدى. كەيبىرەۋلەرى جارتىلاي فابريكات نەمەسە شيكىزات وندىرەدى, وزگەلەرى دايىن ءونىم شىعارادى. ءبىز پاللەتتەر, ءارتۇرلى كۇردەلىلىكتەگى قوراپشالار, كرافت قاپتاماسىن جاسايمىز. وبلىس كولەمىندە كليەنتتەرىمىز جەرگىلىكتى. ءوڭىرىمىز ونەركاسىپتى بولعاندىقتان, وتكىزۋ نارىعى وتە اۋقىمدى, – دەيدى ول.
سونىمەن قاتار كاسىپورىن تەپلوۆوزدار, جۇك كولىكتەرى, تراكتورلار سياقتى تەحنيكا تۇرلەرىنە قاجەتتى ماي جانە وتىن سۇزگىلەرىن جاسايدى. بۇل ونىمگە كومپانيالار تاراپىنان عانا ەمەس, باسقا دا تۇتىنۋشىلار جاعىنان سۇرانىس كوپ. مىسالى, جەكە اۆتوكولىك يەلەرى دە مۇندا ءجيى ات باسىن بۇرىپ تۇرادى.
سۇزگى شىعاراتىن تسەحتا اندرەي لوتارەۆ قولمەن سيپاپ جۇمىس ىستەۋگە داعدىلانعان. وسىندا وتىز جىلدان اسا ۋاقىت جۇمىس ىستەيتىن شەبەر سۇزگىلەردى شىعارۋعا ارنالعان قۇرىلعىنىڭ قۇلاعىندا وينايدى. ءوزى قاتارداعى جۇمىسشىدان تسەح باستىعىنا دەيىن كوتەرىلگەن. ا.لوتارەۆ جاسىنىڭ ەگدە تارتقانىنا قاراماستان, ءبىلىم الۋعا قۇشتارلىق تانىتىپ ءجۇر ەكەن. بيىل ول كوللەدجدى قارجىگەر ماماندىعى بويىنشا ءبىتىرىپ, ديپلوم الماقشى. تاياۋدا ول جاڭا ءونىمدى – كوشەت وتىرعىزاتىن سەبەت جاساۋ تۋرالى ۇسىنىس ەنگىزدى. قاراپايىم عانا بۇيىمنىڭ اتقارار جۇمىسى اسا ءتيىمدى. سىمنان قاڭقاسى جاسالىپ, ىشىنە اگروماتا ماتەريالىنان تىگىلگەن قاپشىق سالىنعان بۇل سەبەتكە ولشەمىنە قاراي گۇل نەمەسە اعاش كوشەتتەرىن وتىرعىزۋعا بولادى.
– اگروماتا ىلعالدى جاقسى ساقتايدى جانە وسىمدىكتىڭ تامىر الۋىن جەڭىلدەتەدى, – دەيدى كاسىپورىنعا قاراستى جىلىجاي مەڭگەرۋشىسى ماريا زولوتىح.
جىلىجاي دەمەكشى, قازىرگى ۋاقىتتا جازعى ماۋسىمعا دايىندىق قىزۋ ءجۇرىپ جاتىر. ويتكەنى كاسىپورىن قالانى كوگالداندىرۋ جۇمىستارىنا بەلسەنە قاتىسادى. مۇنداعى جىلىجايلاردا وسەتىن گۇل كوشەتتەرىن باعباندار دا, جەكەلەگەن ۇيىمدار دا كوپتەپ ساتىپ الادى ەكەن.
م.زولوتىح كوشەتتەردى ءوسىرۋ اقپان ايىندا باستالىپ, ناۋرىزدا جينالىپ, مامىر ايىنان باستاپ ساتىلىمعا شىعارىلاتىنىن ايتادى.
– بىزدە شىرايگۇل دەپ اتالاتىن وسىمدىكتىڭ ونعا جۋىق ءتۇرى بار. سونىمەن قاتار بىزدە وسىرىلگەن ماريگولد, كاتارانتۋس, ۆيولا, سالۆيا جانە باسقا دا گۇل سۇرىپتارىن جازدىگۇنى قالا گۇلزارلارىنان كورۋگە بولادى. ءبىز تەك ابدەن تەكسەرىلگەن كاسىبي تۇقىمداردى عانا پايدالانامىز. بيىلعى جوسپارىمىزدا 200 مىڭ دانا شىرايگۇل مەن 100 مىڭعا جۋىق باسقا گۇلدەر ءوسىرۋ بار, – دەيدى ول.
جىلىجاي مەڭگەرۋشىسىنىڭ قاراماعىندا كوزى ناشار كورەتىن گۇل وسىرۋشىلەر جۇمىس ىستەيدى. قازىرگى ۋاقىتتا ەكى قىزمەتكەر جۇمىستىڭ ءبارىن تىندىرىپ ءجۇر. ال ناۋرىزدا قوسىمشا جۇمىس كۇشى قاجەت بولادى.
كاسىپورىنداعى ءونىمدى جۇمىس ىستەيتىن بولىمشەنىڭ ءبىرى – تىگىن تسەحى. مۇنداعى ىسمەرلەر توسەك-ورىن جايمالارىنان باستاپ ارنايى جۇمىس كيىمدەرىنە دەيىن تىگەدى. قولى التىن شەبەردىڭ ءبىرى تاتيانا وگنەۆايا زاعيپتارعا ارنالعان ينتەرناتتا وقىعان ەكەن. وقۋىن بىتىرگەننەن كەيىن سىنىپتاستارىنا قوسىلىپ, وسى جەرگە جۇمىسقا ورنالاسىپتى. ەڭبەك ەتىپ جۇرگەنىنە ءۇش جىلداي بولعان.
– جاعدايىمىز جامان ەمەس. ەڭ باستىسى – تابىس تابۋعا مۇمكىنشىلىك بار, – دەيدى ول توق كوڭىلمەن.
پريشاحتينسك ەلدى مەكەنىندەگى «قازاق زاعيپتار قوعامى» قوعامدىق بىرلەستىگىنىڭ قاراعاندى وقۋ-وندىرىستىك كاسىپورنىندا قازىرگى ۋاقىتتا 25 ادام جۇمىس ىستەپ, ناپاقا تاۋىپ ءجۇر. كاسىپورىن باسشىلارىنىڭ بولاشاققا دەگەن جوسپارى دا كوڭىلگە سەنىم ۇيالاتادى: كەرەگە كەڭىتىپ, تاعى دا جيىرما شاقتى ادامدى جۇمىسقا الماقشى.
قاراعاندى وبلىسى
