قر ءسىم گۋمانيتارلىق قىزمەت قازاقستاننىڭ سىرتقى ساياسي ستراتەگياسىنىڭ ماڭىزدى باعىتى بولىپ تابىلاتىنىن ايتتى.
ء«بىزدىڭ ەلىمىز ءار ءتۇرلى جاعدايلارعا بايلانىستى حالقى قيىن گۋمانيتارلىق جاعدايعا تاپ بولعان ەلدەرگە مۇمكىندىگىنشە قولداۋ كورسەتۋگە تىرىسادى», دەلىنگەن قر ءسىم ءباسپاسوز قىزمەتى تاراتقان حابارلامادا.
قازاقستان ءداستۇرلى تۇردە باسقا مەملەكەت تاراپىنان رەسمي ۇندەۋگە جاۋاپ رەتىندە گۋمانيتارلىق كومەك كورسەتەدى. ۋكراينا تاراپىنان وسىنداي ءوتىنىش تۇسكەن سوڭ پرەزيدەنت قاسىم-جومارت توقاەۆ ۋكراين حالقىنا شۇعىل گۋمانيتارلىق كومەك كورسەتۋ جونىندە ناقتى تاپسىرما بەردى.
«گۋمانيتارلىق كومەكتىڭ سالماعى 82 توننانى قۇرايدى. قازىرگى ۋاقىتتا بۇل جۇكتى مەجەلى جەرگە جەتكىزۋ ماسەلەسى پىسىقتالۋدا. ايتا كەتسەك, ۋكراينا اۋماعىنا جۇكتەردى جەتكىزۋ وتە قيىن پروتسەسس. وسىعان بايلانىستى قازاقستان ۇكىمەتى ۋكرايناعا حالىقارالىق گۋمانيتارلىق كومەك الۋ جانە ءبولۋ ءۇشىن حابتار ورنالاستىرىلعان كورشى مەملەكەتتەرمەن ۋاعدالاسادى», دەپ قوستى قر ءسىم ءباسپاسوز قىزمەتى.
