ەلوردا • 09 ناۋرىز، 2022

زاڭسىز وسىرىلگەن جارىق باعاسى تۇرعىندارعا قايتارىلادى

68 رەت كورسەتىلدى

«استاناەنەرگوسبىت» جشس-نە 6 ملن تەڭگەدەن استام ايىپپۇل سالىنۋى مۇمكىن جانە تۇتىنۋشىلارعا قاراجاتتى قايتارۋ ۇيعارىلدى، دەپ حابارلايدى Egemen.kz قر ۇلتتىق ەكونوميكا مينيسترلىگىنە سىلتەمە جاساپ.

بەلىگىلى بولعانداي، ەلوردالىق تۇتىنۋشىلاردىڭ وتىنىشتەرى نەگىزىندە، قازاقستان رەسپۋبليكاسى ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتىنىڭ نۇر-سۇلتان قالاسى بويىنشا دەپارتامەنتى «استاناەنەرگوسبىت» جشس-نا قاتىستى قازاقستان رەسپۋبليكاسىنىڭ كاسىپكەرلىك كودەكسى تالاپتارىنىڭ ساقتالۋىنا قاتىستى جوسپاردان تىس تەكسەرۋ جۇرگىزگەن بولاتىن.

جوسپاردان تىس تەكسەرۋ بارىسىندا قازاقستان رەسپۋبليكاسىنىڭ كاسىپكەرلىك كودەكسىنىڭ نورمالارىن بۇزۋ فاكتىلەرى انىقتالدى.

وسىلايشا، «استاناەنەرگوسبىت» جشس 2021 جىلعى قاراشا، جەلتوقسان ايلارىندا جانە 2022 جىلعى قاڭتار ايىندا تۇتىنۋشىلارعا ەلەكتر ەنەرگياسىن پايدالانۋ قاعيدالارىنىڭ 64-تارماعىنا سايكەس ورتاشا تاۋلىكتىك ەسەپتەۋ بويىنشا كورسەتكىشتەر قويعان (قازاقستان رەسپۋبليكاسى ەنەرگەتيكا ءمينيسترىنىڭ 2015 جىلعى 25 اقپانداعى № 143 بۇيرىعىمەن بەكىتىلگەن).

ال، قازاقستان رەسپۋبليكاسىنىڭ ازاماتتىق كودەكسى، «ەلەكتر ەنەرگەتيكاسى تۋرالى» قر زاڭى جانە تۇرمىستىق تۇتىنۋشىلارعا ارنالعان ەلەكترمەن جابدىقتاۋدىڭ ۇلگىلىك شارتى تۇتىنۋشىلاردىڭ تۇتىنىلعان ەلەكتر ەنەرگياسى ءۇشىن اقى تولەۋى كوممەرتسيالىق ەسەپكە الۋ اسپاپتارىنىڭ ناقتى كورسەتكىشتەرى نەگىزىندە جۇرگىزىلەتىنىن ايتادى.

ناتيجەسىندە، «استاناەنەرگوسبىت» جشس-عا قاتىستى قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 167-بابى بويىنشا، 6 126 000 تەڭگە كولەمىندە ايىپپۇل قاراستىرىلعان اكىمشىلىك قۇقىق بۇزۋشىلىق تۋرالى حاتتاما تولتىرىلدى.

سونىمەن قاتار تمركد قازاقستان رەسپۋبليكاسىنىڭ زاڭناماسىن بۇزۋشىلىقتاردى جويۋ تۋرالى ورىندالۋى مىندەتتى نۇسقاما شىعاردى، وندا ەلەكتر ەنەرگياسىن كوممەرتسيالىق ەسەپكە الۋ اسپاپتارىنىڭ ناقتى كورسەتكىشتەرى بويىنشا تۇتىنۋشىلارعا قايتا ەسەپتەۋ جۇرگىزۋ كوزدەلگەن.

الايدا «استاناەنەرگوسبىت» جشس اكىمشىلىك قۇقىق بۇزۋشىلىق تۋرالى حاتتامامەن كەلىسپەي، ماتەريالداردى نۇر-سۇلتان قالاسىنىڭ اكىمشىلىك قۇقىق بۇزۋشىلىق جونىندەگى مامانداندىرىلعان اۋدانارالىق سوتىنا قاراۋعا بەرۋ تۋرالى ءوتىنىش جاسادى.

بۇدان باسقا، قازاقستان رەسپۋبليكاسىنىڭ زاڭناماسىن بۇزۋشىلىقتاردى جويۋ تۋرالى دەپارتامەنت شىعارعان نۇسقاماعا قازاقستان رەسپۋبليكاسىنىڭ اكىمشىلىك راسىمدىك-پروتسەستىك كودەكسىنە سايكەس، جوعارى تۇرعان ورگانعا شاعىم جاسالدى.

سوڭعى جاڭالىقتار

ۇقساس جاڭالىقتار