سۋرەتشىلەر مەن مۇسىنشىلەردىڭ شىعارماشىلىعىنا شابىت سىيلاعان ايەل تۋرالى تاقىرىپتىق كورمە جادىراعان كوڭىل حوشىنان تۋعان وپتيميستىك مۇراتقا نەگىزدەلگەن ءارى شابىتتى شىعارمالاردىڭ وزەگىندەگى سۇيىسپەنشىلىك پەن ماحابباتتى تانۋعا شاقىرادى. تامارا ۆولكوۆانىڭ «ساۋكەلە كيگەن قىز», «كوكتەم», «كەشكى الماتى», تىلەك چۋدەنوۆتىڭ «ايەل قۇدىرەتى», پەريزات ەسنازاروۆانىڭ «دالا مادونناسى», زەينەلحان مۇحامەتجاننىڭ «اۋەن-2», ءادىلحان جارقىنبەكوۆتىڭ «جاستىق», راۋان سۇلەيمەنوۆتىڭ «ناۋرىز-دۋمان» اتتى تۋىندىلارى بوياۋ تۇسىمەن ەرەكشەلەنىپ, سۋرەت ونەرىنىڭ ءتۇرلى ستيلىندە ورىندالسا دا, ايەلگە دەگەن ماحاببات, سۇلۋلىققا ىڭكارلىك ولاردىڭ بارىنە ورتاق يدەيا قىزمەتىن اتقارادى.
گوبەلەن, گرافيكا, اكۆارەل, قولدانبالى ونەر تۇرىندەگى كەسكىندەمەلەردەگى ءارتۇرلى جاستاعى, ءار الەۋمەتتىك توپتاعى ايەل جانارىندا تۇنعان ماحاببات پەن باقىت شۋاعى, وي تۇڭعيىعى ونىڭ كەڭىستىكتىڭ جۇمباق ءبىر بولشەگى ەكەنىنە, ونى شەشۋدىڭ مۇمكىن ەمەسىن تۇسپالداپ تۇرعانداي. ادەمى ايەلدەردى توپتاستىرعان كورمەنى ارالاپ جۇرگەن ادام ىشتەي وزىنە: «ەڭ ادەمىسى قايسى؟» دەپ جاسىرىن ساۋال قويعانىن اڭدامايدى جانە وعان: «جۇرەكتە ءومىر ءسۇرىپ جۇرگەنى ەمەس پە؟» دەپ جىلدام جاۋاپ قاتىپ, شەبەر قىلقالام يەسىن شابىتتاندىرعان شىعارما الدىنا قايىرا كەلىپ, تەرەڭىرەك ءۇڭىلىپ, ءوز ىشىندەگى پاراسات پالساپاسىمەن ۇندەستىرە, قايتا زەر سالادى.
الماتى
