جىتىقاراداعى «كوماروۆ تاۋ-كەن كاسىپورنىندا» وسىدان ءبىر جىل بۇرىن جاساقتالعان ايەلدەر بريگاداسىنىڭ قۇرامىندا 91 تونناعا دەيىن جۇك كوتەرەتىن Komatsu-785 كولىگىن جۇرگىزەتىن اسەل تۇياقوۆا, نادەجدا چۋپاحينا, اجار جاقسىباەۆا, ءاليا ەسەنوۆا سىندى ارۋلار شاحتانىڭ تەرەڭ قويناۋىندا قوپارىلعان جىنىس قىرتىستارىن جەر ۇستىنە شىعارادى. كەنشى ايەلدەر ەكى-ەكىدەن, اۋىسىم بويىنشا ءبولىنىپ جۇمىس ىستەيدى. اسەل مەن اجار تاڭەرتەڭنەن كەشكە دەيىن رۋلدە, ال تۇنگە قاراي ولاردى ءاليا مەن نادەجدا اۋىستىرادى.
تۇرقىنا قاراساڭ, وڭايلىقپەن قوزعالا قويمايتىنداي بولىپ كورىنەتىن الىپ ماشينانىڭ ءتىلىن ايەلدەردىڭ قاي-قايسىسى دا جەتىك مەڭگەرىپ العان. ءتورت ارۋ بۇعان دەيىن دە كولىك جۇرگىزگەن. نادەجدانىڭ رۋلگە وتىرعانىنا بيىل جيىرما جىلدان اسىپتى. ال اجاردىڭ 18 جىل جۇرگىزۋشىلىك ءوتىلى بار.
قالاي دەسەك تە, كەنىش كولىگىن جۇرگىزۋ اسا جاۋاپتى ءارى اۋىر جۇمىس.
– سىزدەردى مۇنداي جۇمىسقا ۇيدەگى وتاعالارىڭىز قالاي جىبەرىپ ءجۇر؟, دەپ ەدىك, جۇرگىزۋشى كەلىنشەكتەر: – جولداستارىمىز دا وسىندا جۇمىس ىستەيدى, ءبىز قايدا بارامىز؟, دەپ كۇلە جاۋاپ قاتتى. اسەلدىڭ جۇبايى عانا باستاپقىدا زايىبىنىڭ كەنىشتە كولىك جۇرگىزۋىنە قارسى بولىپتى, الايدا كەيىن جۇمسارعان كورىنەدى. ال نادەجدانىڭ جۇبايى «كوماروۆ» كاسىپورنىندا «گازەل» كولىگىن جۇرگىزەدى. – كەيدە ەكەۋمىز جول ۇستىندە كەزدەسىپ قالامىز. ونداي ساتتەردە شاپ-شاعىن كولىگى كوزىمە شىرپىنىڭ قورابىنداي بولىپ كورىنسە دە, قوراشسىنباي جەكە باسىن سىيلاپ, تاۋداي ماشينەمدى شەتكە بۇرىپ جۇبايىما جول بەرەمىن, – دەپ قۋلانا جىميىپ قويدى Komatsu جۇرگىزۋشىسى.
قوستاناي وبلىسى
