گەرمانيا تاراپىنىڭ باستاماسىمەن مەملەكەت باسشىسى قاسىم-جومارت توقاەۆ گەرمانيانىڭ فەدەرالدى پرەزيدەنتى فرانك-ۆالتەر شتاينمايەرمەن تەلەفون ارقىلى سويلەستى.
مەملەكەتتەر باسشىلارى ۋكرايناداعى احۋال جونىندە جان-جاقتى پىكىر الماستى.
فرانك-ۆالتەر شتاينمايەر رەسەي باسشىلىعىنىڭ ۋكرايناعا قارسى اسكەري ءىس-قيمىل باستاۋ جونىندەگى كۇتپەگەن شەشىمىنىڭ سەبەپتەرىنە قاتىستى ەۋروپا وداعىنىڭ بەلگىلى ۇستانىمىن جەتكىزدى. اسكەري ءىس-قيمىلدار بۇل ەلدى گۋمانيتارلىق اپاتقا الىپ كەلدى.
قاسىم-جومارت توقاەۆ بۇكىل مەملەكەتتىڭ بۇۇ جارعىسىنداعى نورمالار مەن قاعيداتتاردى بەرىك ۇستانۋعا ءتيىس ەكەنىن ايتتى.
پرەزيدەنت ۋكراينا داعدارىسىن وتە اۋىر دەپ سانايدى. سوندىقتان بەيبىت تۇرعىنداردىڭ بۇدان بىلاي جاپا شەكپەۋى جانە ۋكراينا اۋماعىنداعى ازاماتتىق ينفراقۇرىلىمنىڭ تولىق قيراۋىنا جول بەرمەۋ ءۇشىن قاقتىعىستى بەيبىت جولمەن شەشۋدىڭ جاڭا ديپلوماتيالىق مۇمكىندىكتەرىن قاراستىرۋ كەرەك.
قاسىم-جومارت توقاەۆتىڭ ايتۋىنشا, قازاقستان ۋكراينا حالقىنا ءدارى-دارمەك جانە باسقا دا قاجەتتى ازىق-ت ۇلىك جاعىنان گۋمانيتارلىق كومەك كورسەتۋگە دايىن. قازىرگى ۋاقىتتا ولاردى كوزدەلگەن جەرگە كولىكپەن جەتكىزۋ جولدارى قاراستىرىلىپ جاتىر.
سونىمەن قاتار قازاقستان ۇكىمەتى 435 ازاماتىمىزدى ءوز وتانىنا جانە 650-دەن استام ادامدى ەۋروپا ەلدەرىنە ەۆاكۋاتسيالاۋعا قول ۇشىن بەردى.
پرەزيدەنتتەر ۋكراينا پروبلەماسى بويىنشا ءوزارا بايلانىس جاساپ تۇرۋعا كەلىستى.
قاسىم-جومارت توقاەۆ پەن فرانك-ۆالتەر شتاينمايەر ەكى ەلدىڭ قارىم-قاتىناستارى تۇراقتى تۇردە ىلگەرىلەپ كەلە جاتقانىنا نازار اۋداردى. بۇعان قازاقستان پرەزيدەنتىنىڭ 2019 جىلى جەلتوقساندا گەرمانياعا جاساعان رەسمي ساپارى سەپتىگىن تيگىزدى.
مەملەكەتىمىزدىڭ باسشىسى گەرمانيا پرەزيدەنتىن وزىنە ىڭعايلى ۋاقىتتا قازاقستانعا ساپارمەن كەلۋگە شاقىردى. فرانك-ۆالتەر شتاينمايەر شاقىرۋدى ريزاشىلىقپەن قابىل الدى.
