بۇگىن, 29 ناۋرىز كۇنى فۋتبولدان قازاقستان پرەمەر-ليگاسىندا ءۇشىنشى تۋردىڭ ويىندارى وينالدى. ول وتكەن تۋرداعى بىردەي ۇپايمەن العا ۇمتىلعان 7 كوماندانىڭ 4-ءىن ىرىكتەپ شىعاردى. بۇل تۋرالى ras.kz حابارلادى.
بار-جوعى 4 گول سوعىلۋىن تىركەگەن وتكەن تۋرعا قاراعاندا, بۇل جولى الاڭدار بەرەكەلى بولدى. دالىرەك ايتقاندا, الدىڭعىدان 10 دوپ ارتىق سوعىلىپ, جالپى سان 14-كە جەتتى. بۇعان قوسا, ەكى ويىندا ءىرى ەسەپ ومىرگە كەلدى.
بۇگىنگى تۋر ساعات 15:00-دە «ەرتىس» - «اتىراۋ», «توبىل» - «جەتىسۋ» اراسىنداعى ماچتارمەن باستالدى. ءبىر قىزىعى, ەكى كەزدەسۋدە دە مەيمانداردىڭ مەرەيلەرى ۇستەم كورىندى. بۇلاردىڭ بىرىنشىسىندە اتىراۋلىقتار 11-مينۋتتا ميلوش ءتريفۋنوۆيچتىڭ سوققان گولى ارقاسىندا 1:0 ەسەبىمەن جەڭىسكە جەتتى. حازار تەڭىزىنىڭ جاعاسىنان كەلگەن فۋتبولشىلار بۇل ويىندا ايتارلىقتاي باسىمدىق تانىتتى. ال جەتىسۋ جىگىتتەرى جەڭىستىڭ ەسەبىن بۇدان دا گورى سەنىمدى ەتە ءبىلدى. ولار 45-مينۋتتا زارەچنىي, 74-مينۋتتى شافف سالعان دوپتاردىڭ كومەگىمەن 2:0 دەگەن ەسەپتى تابلودا جاندىردى. سوڭعى گول پەنالتيدەن سالىندى.
ارادا ءبىر ساعات وتكەندە, الاڭعا «تاراز» - «شاحتەر» كوماندالارى شىقتى. بۇل كەنشىلەردىڭ ناعىز «شىنجىردان بوسانىپ» كەتكەندەي داۋىلدى ويىنى بولدى. قاراعاندىلىقتار ويىننىڭ 70-مينۋتىندا الاڭ يەلەرىن 5:0 ەتىپ ۇتىپ تۇردى. سوڭعى گولدى تارازدىقتار 80-مينۋتتا سالىپ, ويىننىڭ وزدەرى ءۇشىن 1:5 ەسەبىمەن بولىپ اياقتالۋىنا قول جەتكىزدى. ال ەسەپ 15-مينۋتتا ءۆيچيۋستىڭ گولىمەن اشىلدى. 42-مينۋتتا قونىسباەۆ ەسەپتى 2:0-گە جەتكىزدى. سودان سوڭ ەكىنشى تايمدا سالوموۆ ەكى رەت (55, 67-مينۋتتار) الاڭ يەلەرى قاقپاشىسىنا داربازادان دوپ الدىرسا, 70-مينۋتتا فينونچەنكو كوزگە ءتۇستى.
كەلەسى ساعاتتا (17:00) «اقتوبە» - «سپارتاك», «استانا» - «قايسار» كوماندالارى ماتچتارىن باستادى. قازىر توپ باسىندا كەلە جاتقان اقتوبەلىكتەر چەمپيونات دەبيۋتانتىن 3:0 ەتىپ تىزە بۇكتىردى. ويىندا زەنكوۆيچ دۋبل (17, 58) جاساسا, شابالين (47) ءبىر گول سوقتى. ەكىنشى ويىننىڭ سوڭىندا جانجال تۋىپ كەتە جازدادى. الاڭ يەلەرى نەگىزگى ۋاقىتتان كەيىنگى قوسىمشا ۋاقىتتا اياق استىنان پەنالتيگە قول جەتكىزىپ, كەزدەسۋدى 1:0 ەتىپ, ءوز پايداسىنا شەشىپ كەتتى. 11 مەترلىك ايىپ دوبىن دامير (مەنىڭ اتتاسىم!) كوياشەۆيچ سالدى.
ال ءبارىنىڭ سوڭىنان, 18:00-دە ويىندارىن باستاعان «قايرات» پەن «ورداباسى» اراسىنداعى تەكەتىرەستە قوناقتاردىڭ جەڭىسكە جەتكەنى ايان بولدى. تۇستىكتەن كەلگەن مەيماندار 84-مينۋتتا يۋنۋزوۆيچ سالعان دوپتىڭ ارقاسىندا جەڭىس تويىن تويلادى.
ءۇش تۋردان كەيىن توپ باسىنا «اقتوبە», «استانا», «اتىراۋ» جانە «جەتىسۋ» كوماندالارى ءبولىنىپ شىقتى.
دامير قوجامقۇل.
