الەم • 07 ناۋرىز، 2022

كورەيا الاپات ورمان ءورتىن اۋىزدىقتاي الماي وتىر

وڭتۇستىك كورەيا پرەزيدەنتى مۋن چجە ين جەكسەنبى كۇنى جاپپاي ورمان ورتىنەن زارداپ شەككەن شىعىس جاعالاۋ ءوڭىرىن «ەرەكشە اپات ايماعى» دەپ جاريالادى جانە زارداپ شەككەندەرگە ۇكىمەتتىك قولداۋ كورسەتۋگە ۋادە بەردى. بۇل تۋرالى Egemen.kz YONHAP اگەنتتىگىنە سىلتەمە جاساپ حابارلايدى.

ارمان ماناربەك ۇلى

پرەزيدەنت كەڭسەسىنىڭ مالىمدەۋىنشە، مۇنداي شەشىمدى مۋن سەۋلدەن وڭتۇستىك-شىعىسقا قاراي 330 شاقىرىم جەردە ورنالاسقان ۋلجين قالاسىنداعى ۋاقىتشا باسپانادا تۇرىپ جاتقان ادامدارمەن كەزدەسكەننەن كەيىن قابىلداعان.

ءورت وتكەن جۇما كۇنى باستالعان. ءتىلسىز جاۋدى اۋىزدىقتاۋعا 44 تىكۇشاق پەن 4000 ادام جۇمىلدىرىلعان.

«ۇكىمەتتىڭ تۇرعىنداردى قولداۋىنىڭ ەڭ جىلدام جولى - ارنايى اپات ايماعىن جاريالاۋ جانە قالپىنا كەلتىرۋ جۇمىستارىنا قاتىسۋ»، - دەدى مۋن زارداپ شەككەندەرگە.

ءورت سالدارىنان ەۆاكۋاتسيالانعان 7400-گە جۋىق ادامنىڭ 1000-ى وڭىردەگى قوعامدىق نىساندار مەن مەكتەپتەردە ورناتىلعان ۋاقىتشا باسپانالارعا ورنالاستىرىلدى.

ورمان شارۋاشىلىعى جانە ورتكە قارسى قىزمەت ورگاندارىنىڭ مالىمەتىنە قاراعاندا، جالىن قاتتى جەل مەن قۇرعاق اۋا-رايى سالدارىنان تۋىنداعان.

تاڭعى ساعات 11-دەگى جاعداي بويىنشا ۋلجين مەن وعان كورشىلەس سامچەوك قالاسىندا شامامەن 14 222 گەكتار ورمان وتقا ورانعان.

«قازىرگى ۋاقىتتا ەڭ باستىسى - ءورتتى ءسوندىرۋ»، - دەدى ورمان شارۋاشىلىعى باسقارماسىنىڭ وكىلى. ء«ورت تولىعىمەن سوندىرىلگەن بويدا مامانداردىڭ جەتەكشىلىگىمەن تولىققاندى تەرگەۋ جۇمىستارىن باستايمىز».

شىعىس جاعالاۋداعى گانگنەۋنگ قالاسىنىڭ سوتى ءبىر كۇن بۇرىن سەۋلدەن شىعىسقا قاراي 240 شاقىرىم جەردە ورنالاسقان قالانى جانە ونىڭ كورشىلەس اۋداندارىن ورتەپ جىبەردى دەگەن كۇدىكپەن 60 جاستاعى ەر ادامدى قاماۋعا الۋ تۋرالى شەشىم شىعاردى.

بۇگىنگى كۇنگە دەيىن الاپات جالىن 1850 گەكتار ورمان مەن ونداعان عيماراتتى شارپىعان. ءورت سوندىرۋشىلەر ازىرگە ونى اۋىزدىقتاي الماي وتىر.