قازىرگىدەي قاۋىپ-قاتەرگە تولى زاماندا, تاۋەلسىزدىگىمىزدى ەندى بەكەمدەي تۇسەمىز دەگەن ۋاقىتتا دۇنيە قايتادان دۇربەلەڭگە ءتۇسىپ جاتىر. بۇگىنگى بۋىننىڭ, قازىرگى ۇرپاقتىڭ موينىندا تۇرعان باستى مىندەت – سول بابالاردىڭ اماناتىن, قاسيەتتى جەرىمىزدى ساقتاپ قالۋ, تاۋەلسىزدىگىمىزدى قورعاپ قالۋ. بۇل مىندەت بەيبىت جولمەن, كەلىسىممەن جانە تۇراقتىلىقپەن ىمىراعا كەلۋ ارقىلى عانا شەشىلەدى.
«ەلىمىزدىڭ ەگەمەندىك العانىنا 30 جىل ءوتتى. بىراق كوپ نارسە ءالى دە جاسالعان جوق دەگەندى» ءجيى ايتامىز. حالىق اراسىندا وسىنداي قاناعاتسىزدىققا تولى اڭگىمەلەر الەۋمەتتىك جەلى مەن اۋىزەكى تىلدە وتە ءجيى ايتىلىپ ءجۇر. جەكە باسىم وسىنداي پىكىرلەرگە قوسىلا المايمىن. سەبەبى تاريحي تۇرعىدان العان كەزدە 30 جىل دەگەن مەملەكەت ءۇشىن وتە قىسقا مەرزىم. كەز كەلگەن مەملەكەتتىڭ تاريحىنا كوز جۇگىرتىپ قارايتىن بولساق تا 30 جىل وتە از ۋاقىت. ادام ءومىرى 60-80 جىل بولاتىن بولسا, مەملەكەتتەردىڭ عۇمىرى 300-500, ءتىپتى 800 جىلعا دەيىن كەتەدى. تاريحى 2 مىڭ جىلدى قامتيتىن مەملەكەتتەر دە بار. ال 500-800 جىلدىق عۇمىرى بار مەملەكەت ءۇشىن 30 جىل دەگەنىڭىز تۇك تە ەمەس. سوندىقتان دا تاۋەلسىز قازاق ەلىنىڭ گۇلدەنۋى, ءوزىنىڭ كەمەلىنە كەلۋ ۋاقىتى ءالى الدا دەپ سانايمىن. سول سەبەپتى دە ءبىز قازاقستان ءوزىنىڭ كەمەلىنە كەلگەنشە جاتپاي-تۇرماي, شارشاماي ەڭبەك ەتۋىمىز قاجەت. ول ۋاقىتتى كورۋ ءبىزدىڭ ۇل-قىزدارىمىزعا, ۇرپاعىمىزعا بۇيىرسا دەيمىز. سوندىقتان ءبىز بابالارىمىز امانات ەتكەن اسىل مۇراسىن كەلەر ۇرپاققا, بولاشاعىمىزعا امان-ەسەن تابىستاپ كەتۋىمىز كەرەك. سوندا عانا ۇلى دالاداعى ميسسيامىز تولىق ورىندالادى دەپ ەسەپتەيمىن.
قازىر قوعامدا «30 جىلدا ەشقانداي جەتىستىككە جەتكەن جوقپىز» دەگەن سياقتى اپاتيالىق كوڭىل كۇي بايقالادى. وسى رەتتە تاريحقا تاعى ءبىر كوز جۇگىرتىپ, بىزدەن 30 جىل بۇرىن تاۋەلسىزدىكتەرىن العان افريكانىڭ بىرقاتار ەلىن مىسالعا الۋعا بولادى. ولار بۇرىنعى كۇيىنەن دە ايىرىلىپ قالدى. بۇل – شىندىق. كوبى ءالى كۇنگە دەيىن كەدەيشىلىك پەن قايىرشىلىقتان كوز اشا الماي كەلە جاتىر. 60-جىلدارى تاۋەلسىزدىگىن العان افريكانىڭ كوپ ەلىندە سوعىس وتى تۇتاندى. ياعني ەلدىڭ دامۋى تاۋەلسىزدىككە نەشە جىل تولعانىنا قاتىستى ەمەس. مەملەكەتتىڭ ءوسىپ-وركەندەۋى ۋاقىتتى دۇرىس پايدالانۋعا جانە ىشكى بىرلىككە بايلانىستى قۇبىلىس.
ءبىزدىڭ وتىز جىلداعى جەتكەن جەتىستىكتەرىمىز از ەمەس. سونىڭ ىشىندە ەڭ ماڭىزدىسى شەكارامىزدى شەگەندەۋ ەكەنى بەلگىلى. بۇل بىزگە كوپ ماسەلەنىڭ ءتۇيىنىن تارقاتىپ بەردى. قازىرگى گەوساياسي قاقتىعىستاردىڭ باسىم بولىگى وسى تەرريتوريالىق داۋ-دامايدان باستالىپ وتىرعانىن دا كورىپ وتىرمىز.
وسىنداي قاقتىعىسقا سەبەپ بولاتىن ەكىنشى ماسەلە – ەتنوستىق شيەلەنىس. بىزدە وتىز جىلدا تۇتاس رەسپۋبليكانى قامتىعان ۇلكەن ەتنوستىق قاقتىعىس بولا قويعان جوق. وسى باعىتتاعى الاۋىزدىقتىڭ الدىن الۋ ءۇشىن ەلدىڭ بىرلىگى, تۇتاستىعى اۋاداي قاجەت. سول سەبەپتى تاتۋلىق پەن تىنىشتىقتى دارىپتەپ, ودان ءارى دامىتۋىمىز كەرەك. بۇل ءبىزدىڭ الەمگە كورسەتكەن جولىمىز, قازاقستاندىق ۇلگى رەتىندە بولاشاق بۋىنعا قالدىرعان اماناتىمىز بولارى ءسوزسىز.
ۋايىس ەرسايىن ۇلى,
ۇلتتىق قوعامدىق سەنىم كەڭەسىنىڭ مۇشەسى
