بۇل – بيلىكتىڭ پارتياسى. بىراق وسى ءبىر باسىمدىقتى پارتيا ەلدىڭ الەۋمەتتىك-ەكونوميكالىق دامۋى جولىندا دۇرىس پايدالانعان ەمەس. سوندىقتان جاڭارعان پارتيادان حالىق كوپ ءۇمىت كۇتەدى.
پارتيا ەندىگى جەردە جاڭا پرينتسيپتەردى ۇستانۋى كەرەك. بۇل جەردە پارتيا مۇشەلەرىنىڭ سانى ەمەس, ساپاسى ۇلكەن ماڭىزعا يە. پارتيا بيلىك پەن بۇقارانىڭ اراسىنا شىن ماعىناسىندا التىن كوپىر بولۋى كەرەك. ياعني بۇرىنعىداي مەملەكەتتىك قىزمەتشىلەردى, مۇعالىمدەردى, بيۋدجەتتىك سالا قىزمەتكەرلەرىن ماجبۇرلەپ, مىندەتتەپ پارتياعا قابىلداۋدىڭ قاجەتى جوق. بۇل ۇشپاققا شىعاراتىن جول ەمەس. ادامدار پارتياعا ساياسي كوزقاراسىنا بايلانىستى ءوز ەركىمەن كەلۋگە ءتيىس.
مەن بۇل پارتيانىڭ مۇشەسى ەمەسپىن. بۇعان دەيىنگى باستامالارىن دا اسا ءبىر قولداعان جوقپىن. ول ەندى باسقا اڭگىمە. دەسە دە ەلدىڭ ازاماتى رەتىندە ەندىگى جەردە وڭ وزگەرىستەر كۇتەمىن. پارتياعا مۇشە بولۋ ادەپكى دۇنيە ەمەس, ابىرويلى قادامعا اينالۋى كەرەك. ياعني پارتياعا مۇشە بولىپ قابىلداناتىن ءاربىر ادام ء«لابباي, تاقسىرلاپ» ەمەس, ەلدى, قوعامدى وزگەرتە الاتىنداي ناقتى ماقسات-مۇددەمەن, ۇسىنىس-تىلەكپەن كەلۋى كەرەك.
پارتيا حالىقپەن تىعىز جۇمىس ىستەپ, ەل ىشىندەگى الەۋمەتتىك-ەكونوميكالىق ماسەلەلەردى شەشۋگە بەلسەنە ارالاسۋى كەرەك. ول ءۇشىن پارلامەنتتەگى, جەرگىلىكتى ماسليحاتتارداعى ىقپالىن ءتيىمدى پايدالانۋى كەرەك. ەگەر پارتيا بۇرىنعى قالپىنان وزگەرمەي جۇمىس ىستەسە, بيۋروكراتيالىق كەدەرگىلەرمەن كۇرەسپەي, حالىقتان الىستاي بەرسە, بولاشاعى دا ب ۇلىڭعىر بولماق.
ءدال قازىرگى ۋاقىتتا Amanatqa شىنايى حالىقتىق پارتياعا اينالاتىن تاماشا مۇمكىندىك تۋىپ تۇر. سونى دۇرىس پايدالانادى دەگەن ويدامىز.
تالعات دەمەسىنوۆ,
ەكونوميست
