وسى تاريحي كۇنى ءبىزدىڭ جاڭا تاۋەلسىز مەملەكەتىمىز الەمدىك قوعامداستىقتىڭ تولىق قۇقىقتى مۇشەسى جانە حالىقارالىق قۇقىقتىڭ تولىققاندى سۋبەكتىسى رەتىندە تانىلدى. وسى كۇننەن باستاپ بىرىككەن ۇلتتار ۇيىمى جاس مەملەكەتىمىزدىڭ ەگەمەندىگىنىڭ كەپىلى جانە حالىقارالىق تۇعىرناماسىنا اينالدى. بۇۇ-عا مۇشەلىك جاڭا مەملەكەتتىڭ الەمدىك ارەنادا ۇدەمەلى قالىپتاسۋىنا, ونىڭ ۇلتتىق قاۋىپسىزدىگىن نىعايتۋعا ىقپال ەتتى. قازاقستان ۇيىمعا مۇشە بولىپ, ونىڭ جۇمىسىنا بەلسەندى اتسالىسا وتىرىپ, وزەكتى حالىقارالىق ماسەلەلەردى شەشۋگە, كوپتەگەن ماسەلەلەر بويىنشا, ەڭ الدىمەن ەلىمىز ءۇشىن ومىرلىك ماڭىزى بار مۇددەلەر اياسىنا كىرەتىن تاسىلدەر مەن شەشىمدەردى تۇجىرىمداۋعا ءوز ۇلەسىن قوسۋعا قۇقىق پەن ناقتى مۇمكىندىك الدى. شىن مانىندە, قازاقستان بۇۇ-نىڭ بارلىق مۇشەلەرى سەكىلدى ءوزىنىڭ ۇلتتىق مۇددەلەرىن قورعاۋدى قامتاماسىز ەتۋگە, اسىرەسە ءوزىنىڭ دامۋى جانە حالىقارالىق قوعامداستىق پەن الەمدىك ەكونوميكا جۇيەسىنە تولىققاندى ىقپالداسۋى ءۇشىن قولايلى جاعدايلار جاساۋعا ۇمتىلدى.
تاعدىردىڭ جازعانىمەن, مەن تۇڭعىش پرەزيدەنت ن.ءا.نازارباەۆتىڭ تاپسىرماسى بويىنشا قازاقستاننىڭ بۇۇ-عا مۇشەلىگىنە قابىلدانۋىن دايىنداپ, وسى باستى حالىقارالىق ۇيىممەن ىنتىماقتاستىعىمىزدىڭ نەگىزىن قالاپ, وندا سەگىز جىل بويى مەملەكەتىمىزدىڭ اتىنان وكىلدىك ەتتىم.
1991 جىلعى 20 جەلتوقساندا مەن بۇۇ-نىڭ شتاب-پاتەرى ورنالاسقان نيۋ-يورك قالاسىنا كەلدىم جانە كسرو-نىڭ (كەيىن رەسەي فەدەراتسياسىنىڭ) بۇۇ جانىنداعى تۇراقتى وكىلدىگىندە اعا كەڭەسشى – قازاقستان رەسپۋبليكاسى وكىلىنىڭ قىزمەتىنە قابىلداندىم.
شىن مانىندە, 1991 جىلدىڭ جەلتوقسان ايىنىڭ سوڭىنداعى ۇمىتىلماس كۇندەر كەڭەس وداعىنىڭ ىدىراۋىنا, قىرعي قاباق سوعىستىڭ اياقتالۋىنا جانە الەمنىڭ ساياسي كارتاسىندا جاڭا تاۋەلسىز مەملەكەتتەردىڭ پايدا بولۋىنا اكەلىپ, الەمدىك ارەناداعى گەوساياسي وزگەرىستەردىڭ كۇردەلى ساتىنە اينالدى. تاۋەلسىز مەملەكەتتەر دوستاستىعىن قۇرعان ەگەمەن مەملەكەتتەر باسشىلارىنىڭ 21 جەلتوقساندا الماتىداعى كەزدەسۋىندە رەسەي فەدەراتسياسىنىڭ كسرو-نىڭ بۇۇ-عا مۇشەلىگىن جالعاستىرۋ جانە بۇۇ-عا جاڭا تاۋەلسىز مەملەكەتتەردىڭ كىرۋى تۋرالى شەشىم قابىلداندى. 24 جەلتوقساندا بۇۇ-دا كسرو تۋىنىڭ ورنىنا قاۋىپسىزدىك كەڭەسىنىڭ تۇراقتى مۇشەسى بولعان رەسەي فەدەراتسياسىنىڭ تۋى كوتەرىلدى. سونىمەن قاتار, كەيىنىرەك افريكا ەلشىلەرى ماعان اقش-تىڭ بۇۇ جانىنداعى ەلشىسىنەن قاۋىپسىزدىك كەڭەسىنىڭ تۇراقتى مۇشەلەرى اراسىندا وكىلدىگى جوق افريكاعا وسى ورىندى بەرۋدى سۇراعانىن, بىراق وتىنىشتەرى قابىل الىنباعانىن ايتتى. مەن سول 24 جەلتوقسان كۇنى مەملەكەت باسشىسىنا ۇيىمنىڭ حاتشىلىعىنان العان بۇۇ-عا كىرۋ تۋرالى ءوتىنىمنىڭ جوباسىن جىبەردىم.
1991 جىلعى 31 جەلتوقساندا قازاقستان رەسپۋبليكاسىنىڭ بۇۇ-عا مۇشەلىگىنە قابىلداۋ تۋرالى ءوتىنىشى فاكسپەن الىندى جانە مەن ونى ۇيىمنىڭ باس حاتشىسىنا ۇسىندىم. 1992 جىلعى 3 قاڭتاردا باس حاتشى ءوتىنىشتى بۇۇ-نىڭ قاۋىپسىزدىك كەڭەسىنە ۇسىندى جانە بارلىق مۇشە مەملەكەتتەرگە جىبەرىلدى. سول كۇنى قاۋىپسىزدىك كەڭەسى ونى قاراۋعا كىرىستى.
بەلگىلەنگەن ەرەجەلەرگە سايكەس, ەڭ الدىمەن قاۋىپسىزدىك كەڭەسى بۇۇ-عا مۇشە بولعىسى كەلەتىن مەملەكەتتىڭ ءوتىنىشىن قارايدى, سونداي-اق ول مەملەكەتتىڭ بەيبىتشىل جانە بۇۇ-نىڭ جارعىسى بويىنشا مىندەتتەمەلەردى ورىنداۋعا قابىلەتتى ەكەندىگىن شەشەدى. كەڭەس وڭ شەشىم قابىلداعان جاعدايدا باس اسسامبلەياعا وسى مەملەكەتتى بۇۇ-عا مۇشەلىگىنە قابىلداۋدى ۇسىنادى.
بۇۇ-نىڭ قاۋىپسىزدىك كەڭەسى 1992 جىلعى 23 قاڭتاردا ءبىزدىڭ ءوتىنىشىمىزدى قاراعاننان كەيىن باس اسسامبلەياعا قازاقستان رەسپۋبليكاسىن بۇۇ-نىڭ مۇشەلىگىنە قابىلداۋدى ۇسىندى. توراعا كەڭەس مۇشەلەرىنىڭ اتىنان جاساعان مالىمدەمەسىندە بۇل شەشىمدى شىن مانىندە تاريحي وقيعا دەپ اتادى جانە قازاقستان بۇۇ-نىڭ جارعىسىندا كورسەتىلگەن مىندەتتەمەلەردى ورىنداۋعا قابىلەتتى جانە ءازىر بەيبىتسۇيگىش مەملەكەت بولا وتىرىپ, جارعىنىڭ ماقساتتارى مەن قاعيداتتارىن جۇزەگە اسىرۋعا بەلسەندى جانە سىندارلى تۇردە ىقپال ەتەتىنىنە, ۇيىم جۇمىسىنىڭ بارلىق سالالارىنا ماڭىزدى ۇلەس قوسا الاتىنىنا سەنىم ءبىلدىردى. قازاقستان ەڭ ءبىرىنشى ءوتىنىشىن بەرىپ, قاۋىپسىزدىك كەڭەسىنىڭ ۇسىنىمىن العاشقى بولىپ الدى, بىراق باس اسسامبلەيانىڭ پلەنارلىق وتىرىسىن وتكىزۋ ءۇشىن بەلگىلەنگەن راسىمدەردەن وتكەن باسقا دا مەملەكەتتەردى كۇتۋ قاجەت بولدى.
مەن ءۇشىن 1992 جىلعى قاڭتار كۇندەرى قاجىرلى جۇمىسىمەن ەرەكشەلەندى – قاۋىپسىزدىك كەڭەسىنىڭ توراعاسىمەن, باس اسسامبلەيانىڭ 46-شى سەسسياسىنىڭ پرەزيدەنتىمەن, باس حاتشىمەن جانە ونىڭ ورىنباسارلارىمەن, بۇۇ-عا مۇشە مەملەكەتتەردىڭ ەلشىلەرىمەن, حاتشىلىق قىزمەتكەرلەرىمەن كەزدەسۋلەر وتكىزۋ, قاۋىپسىزدىك كەڭەسى مەن باس اسسامبلەيا وتىرىستارىنا قۇجاتتار دايىنداۋ. ولار ەلىمىزدىڭ بۇۇ-عا مۇشەلىگىنە قابىلدانۋىنا تىلەكتەستىك قارىم-قاتىناستا بولدى. جالعىز تۋىنداعان ماسەلە – ەرىكسىز مۇراعا قالعان يادرولىق قارۋعا قاتىستى بولدى, بىراق مەن «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» زاڭىندا جانە ەلدىڭ جوعارى باسشىلىعىنىڭ مالىمدەمەسىندە ايتىلعان مەملەكەتىمىزدىڭ يادرولىق قارۋدى تاراتپاۋ قاعيداتىن بەرىك ۇستانۋى تۋرالى تۇپكىلىكتى تۇسىنىكتەمە بەردىم.
رەسەيدىڭ بۇۇ جانىنداعى تۇراقتى وكىلدىگىنىڭ ەلشىسى مەن ديپلوماتتارىنىڭ ماعان كورسەتكەن ۇلكەن كومەگى مەن قولداۋىن ريزاشىلىقپەن اتاپ وتكىم كەلەدى. مەن اقش-تىڭ بۇۇ جانىنداعى ميسسياسىنىڭ ەلشىسى مەن ديپلوماتتارى, سونداي-اق ۇيىم حاتشىلىعىنىڭ باسشىلىعى مەن قىزمەتكەرلەرى تاراپىنان قولداۋ الدىم.
1992 جىلعى 2 ناۋرىزدا بۇۇ باس اسسامبلەياسىنىڭ 46-سەسسياسىنىڭ تاريحي پلەنارلىق وتىرىسى ءوتتى, وندا قازاقستان رەسپۋبليكاسى بىرىككەن ۇلتتار ۇيىمىنىڭ مۇشەلىگىنە ءبىراۋىزدان قابىلداندى. بۇۇ-عا ەلىمىزبەن بىرگە تمد-نىڭ تاعى جەتى جاڭا مەملەكەتى, سونداي-اق الەمدەگى ەڭ كونە رەسپۋبليكا – سان-مارينو مۇشە بولىپ قابىلداندى. پلەنارلىق وتىرىستان كەيىن ۇيىمنىڭ شتاب-پاتەرىنىڭ الدىندا سالتاناتتى راسىمدە بۇۇ-عا مۇشە جاڭا مەملەكەتتەردىڭ مەملەكەتتىك تۋلارى كوتەرىلدى. وسىلايشا, ەلىمىزدىڭ مەملەكەتتىك ەگەمەندىگى مەن تاۋەلسىزدىگى حالىقارالىق دەڭگەيدە مويىندالدى. ءبىز ۇيىمنىڭ 168-ءنشى مۇشەسى اتاندىق, سول كۇنى ونىڭ قۇرامى 175 مۇشەگە دەيىن ءوستى.
مەن سول تاريحي كۇنى پرەزيدەنت پەن قازاقستان حالقىنىڭ اتىنان ءسوز سويلەپ, ەلىمىزدىڭ مەملەكەتتىك تۋى الەمنىڭ ەڭ بەدەلدى حالىقارالىق ۇيىمىنىڭ شتاب-پاتەرىنىڭ ۇستىندە قالاي كوتەرىلىپ جاتقانىن كورىپ, عاجاپ رۋحاني ورلەۋ مەن قۋانىش جانە ءوز ەلىم ءۇشىن ەرەكشە ماقتانىش سەزىمىن باستان كەشكەنىم ءۇشىن تاعدىرىما شەكسىز ريزامىن.
قازاقستان بۇۇ-عا مۇشە بولعان العاشقى كۇندەرىنەن باستاپ ۇيىمنىڭ كۇن تارتىبىندەگى ەڭ وزەكتى حالىقارالىق پروبلەمالار مەن ماسەلەلەردى شەشۋدە بەلسەندى پوزيتسيا ۇستاندى. الەمدەگى قۋاتى بويىنشا ەرىكسىز مۇراعا قالعان ءتورتىنشى يادرولىق ارسەنالدان ءوز ەركىمەن باس تارتۋى جانە سەمەي پوليگونىنىڭ جابۋى, بۇۇ-دا جاڭا تاۋەلسىز مەملەكەتتىڭ قارۋسىزدانۋعا, يادرولىق قارۋدى تاراتپاۋ رەجيمىن نىعايتۋعا جانە عالامشارداعى يادرولىق سىناقتاردى توقتاتۋعا قوسقان ناقتى ۇلەسىن جوعارى باعالادى. قازاقستاننىڭ 1992 جىلى بۇۇ باس اسسامبلەياسىنىڭ 47-سەسسياسىندا ۇسىنىلعان ازياداعى ءوزارا ءىس-قيمىل جانە سەنىم شارالارى جونىندەگى كەڭەستى شاقىرۋ تۋرالى ءبىرىنشى حالىقارالىق باستاماسى بەلسەندى ديپلوماتيالىق كۇش-جىگەردىڭ ناتيجەسىندە بۇگىندە 27 مەملەكەتتى بىرىكتىرەتىن ازيا قۇرلىعىنداعى قاۋىپسىزدىك پەن ىنتىماقتاستىقتى نىعايتۋدىڭ ناقتى فاكتورىنا اينالدى.
قازاقستان قوسىلعان العاشقى حالىقارالىق شارتتار – يادرولىق قارۋدى تاراتپاۋ تۋرالى شارت جانە بالا قۇقىقتارى تۋرالى كونۆەنتسيا بولدى. قازاقستان سولتۇستىك جارتى شارداعى العاشقى وسىنداي جالعىز ايماق رەتىندە 2009 جىلى كۇشىنە ەنگەن ورتالىق ازياداعى يادرولىق قارۋدان ازات ايماقتىڭ باستاماشىلارىنىڭ ءبىرى بولىپ تابىلادى. بۇۇ باس اسسامبلەياسى قازاقستاننىڭ يادرولىق قارۋسىزدانۋعا قوسقان ۇلەسىن مويىنداي وتىرىپ, 29 تامىزدى – سەمەي پوليگونى جابىلعان كۇندى – يادرولىق سىناقتارعا قارسى ءىس-قيمىلدىڭ حالىقارالىق كۇنى دەپ جاريالادى.
قازاقستان بۇۇ-نىڭ قارۋسىزدانۋ جونىندەگى ءىس-شارالارىنا اتسالىسا وتىرىپ, ءاردايىم يادرولىق سىناقتارعا تىيىم سالۋعا قاتىستى ءوزىنىڭ قاعيداتتىق ۇستانىمىن بەرىك قورعاپ كەلەدى. مەن 1990 جىلى بىرىككەن ۇلتتار ۇيىمى باس اسسامبلەياسىنىڭ 45-سەسسياسىندا قازكسر سىرتقى ىستەر ءمينيسترى رەتىندە كسرو اتىنان ءسوز سويلەپ, بۇۇ-عاا مۇشە مەملەكەتتەردىڭ وكىلدەرىن سول كەزدەگى رەسپۋبليكامىزدىڭ اۋماعىندا يادرولىق سىناقتاردى توقتاتۋ بويىنشا جۇرگىزىلىپ جاتقان جۇمىستارمەن تانىستىردىم. 1996 جىلى بۇۇ-نىڭ مۇشەسى بولا تۇرا, قازاقستان العاشقى مەملەكەتتەردىڭ ءبىرى بولىپ جەر شارىندا يادرولىق سىناقتارعا جاپپاي تىيىم سالۋ تۋرالى شارتقا قول قويدى. مۇنداي بەلسەندى ۇستانىم بىزگە 1997 جىلى حالىقارالىق قوعامداستىق تاراپىنان سەمەي پوليگونىنداعى كوپجىلدىق سىناقتاردىڭ سالدارىن ەڭسەرۋدە كومەك كورسەتۋ بويىنشا بۇۇ باس اسسامبلەياسىنىڭ ارنايى قارارىن قابىلداۋعا قول جەتكىزۋگە مۇمكىندىك بەردى, ول 25 جىل قاتارىنان باس اسسامبلەيانىڭ سەسسيالارىندا تۇراقتى تۇردە قارالىپ كەلەدى.
بۇۇ-نىڭ مۇمكىندىكتەرى مەن بىرەگەي تاجىريبەسىن پايدالانۋ جاس رەسپۋبليكامىزدا ەكونوميكالىق رەفورمالاردى جۇزەگە اسىرۋعا ۇلكەن ىقپال ەتتى. ءبىز 1993 جىلى بۇۇ با-نىڭ 48-ءشى سەسسياسىندا تەڭىزگە شىعا المايتىن ەلدەرگە ترانزيتتىك-كولىك جۇيەلەرىن دامىتۋعا جانە الەمدىك نارىقتارعا شىعۋدى قامتاماسىز ەتۋگە كومەك كورسەتۋ جانە جاردەمدەسۋ بويىنشا ارنايى قارار قابىلداۋعا باستاماشىلىق جاسادىق. ەلىمىزدىڭ بەلسەندى اتسالىسۋىمەن كوپتەگەن جىلدار بويى بۇل جۇمىس بۇۇ قىزمەتىندەگى جەكە باعىتقا اينالدى.
قازاقستاننىڭ بۇۇ-مەن جان-جاقتى ىنتىماقتاستىعى ۇيىم قىزمەتىنىڭ باسقا دا سالالارىنا, سونىڭ ىشىندە بىتىمگەرشىلىك, قورشاعان ورتانى قورعاۋ, ادام قۇقىقتارىن قورعاۋ جانە كوتەرمەلەۋ, گۋمانيتارلىق قىزمەت, حالىقارالىق قۇقىقتى دامىتۋ سالالارىنا دا قاتىستى. قازاقستان 2017–2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلاندى, وسى بەيبىتشىلىك پەن قاۋىپسىزدىكتى قولداۋ جونىندەگى باستى ورگاننىڭ جۇمىسىنا الدىن الۋ ديپلوماتياسى مەن جانجالداردى رەتتەۋ, سەنىم شارالارى مەن ايماقتىق قاۋىپسىزدىكتى نىعايتۋدان جيناقتالعان شىنايى تاجىريبەسىن ەنگىزدى.
بىرىككەن ۇلتتار ۇيىمى ءوز تاريحىنىڭ ءارتۇرلى كەزەڭدەرىندە ارقاشان وعان مۇشە مەملەكەتتەر اراسىنداعى قارىم-قاتىناستارداعى گەوساياسي وزگەرىستەردىڭ كورىنىسى بولدى. حح عاسىردىڭ سوڭعى ونجىلدىعىنداعى داۋىرلىك وزگەرىستەر قىرعي-قاباق سوعىس كەزىندەگى اۋىر قاراما-قايشىلىق جاعدايىنان جاھاندىق قوعامداستىقتىڭ وتكىر ماسەلەلەردى شەشۋدەگى تۇتاس ءوزارا ارەكەتتەسۋىنە كوشۋ مۇمكىندىگىن تۋدىردى. قىرعي قاباق سوعىستىڭ اياقتالۋى بۇۇ-دا بەلگىلى ماساتتانۋ سەزىمىن تۋدىردى جانە قىمبات قارۋلانۋ جارىسىنىڭ اياقتالۋىنان «بەيبىتشىلىك ديۆيدەنتىنە» نەگىزدەلگەن ەكونوميكالىق جانە الەۋمەتتىك پروگرەسكە ءۇمىت بەردى. الەمدىك كوشباسشىلاردىڭ 1992 جىلى ۇيىمنىڭ باس اسسامبلەياسىنىڭ 47-سەسسياسىنىڭ جالپى ساياسي دەباتتارىنداعى سويلەگەن سوزدەرى ەسىمدە, بۇل مۇشە مەملەكەتتەردىڭ تەكەتىرەستەن كەيىنگى كەزەڭنىڭ باستالۋىنىڭ دامىپ كەلە جاتقان اقيقاتتارىن, ولاردىڭ جاڭا الەمدىك ءتارتىپتى ءساتتى دامىتۋعا دەگەن جالپى نيەتتەستىگىن بىلەتىندىگىن كورسەتتى. الايدا, وپتيميستىك كوزقاراستار ورىندالمادى جانە 1990-شى جىلدارى تۇتانعان ەتنيكالىق جانە ءدىني نەگىزدەگى شيەلەنىسكەن ايماقتىق قاقتىعىستار مەملەكەتتەردىڭ حالىقارالىق ماسەلەلەردى شەشۋدە كۇش قولدانۋدىڭ ءارتۇرلى تاسىلدەرىن بەيبىتشىلىك پەن قاۋىپسىزدىكتى ساقتاۋ ماقساتىندا عانا ەمەس, سونىمەن بىرگە «گۋمانيتارلىق سەبەپتەر» بويىنشا دا ارالاسۋ قۇقىعىن كورسەتتى.
ءۇشىنشى ونجىلدىققا اياق باسقان ءححى عاسىر حح عاسىردىڭ اياعىنداعى الەمدىك ارەناداعى جاھاندىق گەوساياسي وزگەرىستەردى كۇشەيتتى. الەمدەگى ستراتەگيالىق يادرولىق تۇراقتىلىققا نۇقسان كەلتىرەتىن قارۋ-جاراق جارىسى جانە جاڭا بەلگىسىزدىك فاكتورلارى, جەتەكشى دەرجاۆالار اراسىنداعى ءوزارا سەنىم دەڭگەيىنىڭ تومەندەۋى, حالىقارالىق قۇقىقتىڭ بۇزىلۋى, جاھاندانۋ جاعدايىندا مەملەكەتتەردىڭ ءوزارا تاۋەلدىلىگىنىڭ كۇشەيۋى جانە COVID-19 پاندەمياسى سياقتى زاماننىڭ جاڭا سىن-قاتەرلەرى الەمدىك ساياساتتىڭ نەگىزگى انىقتايتىن كۇشتەرىنە اينالدى. جاڭا عاسىردىڭ العاشقى ونجىلدىقتارىنداعى كۇردەلى حالىقارالىق ساياسي احۋال حالىقارالىق قاتىناستاردى رەتتەۋدىڭ ىرگەلى قۇرالى رەتىندە ديپلوماتيانىڭ ءرولى مەن ماڭىزىن ايتارلىقتاي ارتتىرادى.
بۇل جاعدايدا كوپجاقتى ديپلوماتيانىڭ ءرولى مەن ماڭىزدىلىعىن ارتتىرۋ زاڭدى قۇبىلىس, ال 76 جىل بويى نەگىزگى قۇرالى بولىپ كەلگەن بۇۇ, وكىلەتتىگى مەن قۇرامى جاعىنان جان-جاقتى امبەباپ حالىقارالىق ينستيتۋت بولىپ قالۋدا. دۇنيەجۇزىلىك ۇيىمنىڭ قىزمەت ەتۋىنىڭ ۇزاق جىلدار بويى ۇزدىكسىز سىنعا ۇشىراۋىنا قاراماستان, بۇۇ جاڭا قاۋىپتەر مەن سىن-قاتەرلەرگە جاۋاپ رەتىندە مۇشە مەملەكەتتەردىڭ بىرلەسكەن ءىس-قيمىلدارىنىڭ مويىندالعان جاھاندىق ورتالىعى بولدى جانە بولىپ قالا بەرەدى.
قازاقستان امبەباپ ۇيىمعا مۇشەلىگىنىڭ 30 جىلى ىشىندە ونىڭ وزەكتى الەمدىك ماسەلەلەردى شەشۋدەگى, مەملەكەتارالىق ءوزارا ءىس-قيمىل مەن ىنتىماقتاستىقتىڭ حالىقارالىق-قۇقىقتىق نەگىزدەرىن نىعايتۋداعى ورتالىق ءرولىن دايەكتى تۇردە قولداپ كەلەدى.
پرەزيدەنت ق.ك. توقاەۆ 2020 جىلعى قىركۇيەكتە بۇۇ باس اسسامبلەياسىنىڭ 75-ءنشى مەرەيتويلىق سەسسياسىندا الەم كوشباسشىلارى الدىندا سويلەگەن سوزىندە: «قازاقستان بارلىق ۇلتتى جارقىن ءارى باقىتتى بولاشاققا باستايتىن بۇۇ-نىڭ تۇراقتى مۇشەسى بولىپ قالا بەرەدى», – دەپ اتاپ ءوتتى.
قازاقستان رەسپۋبليكاسىنىڭ بۇۇ-عا مۇشەلىگىنە 1992 جىلعى 2 ناۋرىزدا كىرۋى تاۋەلسىز مەملەكەتىمىزدىڭ تاريحىنا التىن ارىپتەرمەن ماڭگى جازىلدى.
اقمارال ارىستانبەكوۆا,
قازكسر جانە قازاقستان رەسپۋبليكاسىنىڭ بۇرىنعى سىرتقى ىستەر ءمينيسترى,
قازاقستاننىڭ بۇۇ جانىنداعى العاشقى تۇراقتى وكىلى.
