ستۋديانىڭ قوناعى بولعان بايان بايراموۆا - مۇمكىندىگى شەكتەۋلى جان. كومەككە مۇقتاج ايەل بۇيرەك پروبلەمالارىنا بايلانىستى جۇمىس ىستەي المايدى. 13 جىل بويى وتباسىمەن باسپانا جالداۋعا ءماجبۇر بولعان بايان بايراموۆا پاتەراقىسىن تولەۋگە اقشاسى جەتەر-جەتپەستەي ەدى. ءۇش بالانىڭ اناسى بۇگىن جاڭا ءۇيدىڭ يەسى بولامىن دەپ كۇتپەگەن ەكەن.
- مەن ءۇش بالانىڭ اناسىمىن, كىشى قىزىم بالالار ميلىق سالدانۋ دياگنوزىمەن دۇنيەگە كەلدى. ءوزىم دە 3-ءشى توپتاعى مۇگەدەكپىن, بۇيرەكتەن اۋىرامىن. ءبىز 13 جىل بويى پاتەر جالداپ تۇردىق, ارينە, وتە قۋانىشتىمىز! بۇل كۇتپەگەن جاعداي. سىيلىق ءۇشىن «حارەكەت» قورىنا راقمەت, - دەدى بايان بايراموۆا.
ەستەرىڭىزگە سالا كەتەيىك, العىس ايتۋ كۇنىنە وراي بۇگىن «حابار» ارناسىندا تەلەمارافون ءوتتى. ارنايى جوبانىڭ جۇرگىزۋشىلەرى قوعام پايداسى ءۇشىن قىزمەت ەتىپ كەلە جاتقان قازاقستاندىقتار تۋرالى ءسوز قوزعادى. ولاردىڭ بارلىعى جانقيارلىق ەڭبەكتەرىمەن قيىن جاعدايعا تاپ بولعان ادامدارعا كومەكتەسەدى. قازاقستاننىڭ تۇكپىر-تۇكپىرىنەن جانە الەمنىڭ بىرنەشە ەلىنەن جينالعان 15 قاتىسۋشى مەرەكەلىك شىعارىلىمنىڭ باستى كەيىپكەرلەرىنە اينالدى. ولاردىڭ اراسىندا بالالار دا بار. ستۋديا قوناقتارى وزدەرىنىڭ وقيعالارىمەن ءبولىسىپ, جەكە ەسكيز بويىنشا جاسالعان «العىسىم شەكسىز» دەپ اتالاتىن مۇسىنشەلەرگە يە بولدى. ولاردىڭ ءبىرى «حارەكەت» قايىرىمدىلىق قورىنىڭ وكىلىنە تابىستالدى.
- كوكتەمنىڭ تاماشا كۇنىندە «حابار» ارناسىنىڭ ەفيرىندە بايراموۆتار وتباسىنا ءۇش بولمەلى پاتەردىڭ كىلتىن سىيلادىق. ناۋرىز ايىنىڭ 30 كۇندىگىندە 70 وتباسىعا باسپانالى بولۋعا كومەكتەسۋدى جوسپارلاپ وتىرمىز. وسىنىڭ بارلىعى ءبىزدىڭ قوردى قولدايتىن جاناشىر قازاقستاندىقتاردىڭ ارقاسىندا مۇمكىن بولىپ وتىر. ولاردىڭ ارقايسىسىنا العىسىمدى بىلدىرەمىن, - دەدى نۇر-سۇلتان قالاسىنداعى «حارەكەت» قايىرىمدىلىق قورىنىڭ وكىلى اقتورە ەركىن.
