جاقسىلىق جاساۋ – ادام بويىنداعى اسىل قاسيەتتەردىڭ ءبىرى ەكەنىن ءبىلدى. جاقسى ادام قول ۇشىن بەرۋگە, جاردەم ەتۋگە, جاناشىرلىق تانىتۋعا, كومەك كورسەتۋگە, قولداۋ جاساۋعا ءاردايىم دايىن تۇراتىنىن ءوز باسىنان وتكەردى. ەرەسەكتەردەن ەرەكشە ۇلگى الدى, ءوزى دە ەرتەڭگى كۇنى جاقسىلىق جاساۋعا جاقىن تۇراتىن بولادى. ال بۇگىندە ورازىمبەتتىڭ جومارت جاندارعا ايتار العىسى شەكسىز.
«باسپانا بولسا عوي, وسكەندە بەرگەندەرىڭدى قايتارىپ بەرەم, شىن ايتام» دەپ ارمانىن ايتقان 9 جاستاعى ورازىمبەتتىڭ ءسوزى كوپشىلىكتى تەبىرەنتكەنى, ويلاندىرعانى انىق. جۇرەگى نازىك, اسا سەزىمتال بالانى مۇڭدى ەتكەن احۋالعا تەرەڭدەمەي-اق قويالىق. كوپشىلىكتى جىلاتقان ورازىمبەت قارت اجەسىمەن, زاعيپ اناسىمەن, ەكى مۇگەدەك اعاسىمەن بىرگە تۇرادى. وتباسى قابىرعالارى ب ۇلىنگەن, سىلاعى تۇسكەن ءۇيدى جالعا الىپ وتىرعان. ءتورتىنشى سىنىپتا وقيتىن ورازىمبەتتىڭ اناسى باقىتگۇل – ءبىرىنشى توپ مۇگەدەگى, كوزى كورمەيدى. جاسى كىشى بولسا دا, ەرتە ەسەيگەن بالا مەكتەپتەن ەرتە شىعىپ, اناسىنا, ەكى اعاسىنا كومەكتەسەتىنىن ايتادى. قارنى اشقان كۇندەرى سىنىپتاستارىنان قارىز سۇرايتىنىن دا جاسىرمايدى. كوپشىلىككە جاريا بولعان كورسەتىلىمدە ول ءوزىنىڭ ءبىر-اق ارمانى بار ەكەنىن جەتكىزدى. «مەنىڭ ءبىر-اق ارمانىم بار, ونى ورىنداساڭىزدار, ءوزىم دە قايتارىپ بەرەم. تەك ءبىر عانا باسپانا الىپ بەرسەڭىزدەر, جەتەدى. انام دا, مەن دە قينالدىم. انامنىڭ كوزى كورمەيدى, اعام دا اۋىرادى, ەكىنشى اعام دا كەمتار. اجەم دە قارتايىپ كەلەدى, جاسى كەلىپ. ءوتىنىش, كومەكتەسىڭىزدەرشى. ءبىر باسپانا بولسا دا جەتەدى. وسكەن كەزىمدە قايتارىپ بەرەمىن. شىنىمدى ايتام», دەدى ول. «حارەكەت» قايىرىمدىلىق قورىنىڭ بەلسەندى مۇشەسى, اكتەر ماديار سەرىكباەۆتىڭ ايتۋىنشا, وعان تۇندەلەتىپ ۆيدەو-حابارلاما كەلگەن. اكتەر بەينەتۇسىرىلىمدى كورىپ, بەيجاي وتىرا الماعانىن ايتادى.
قازاق ەلىندە قايىرىمدى جان كوپ. سولاردىڭ باسىن قوسىپ, مۇقتاج جاندارعا قول ۇشىن بەرىپ جۇرگەن «حارەكەت» قايىرىمدىلىق قورى ورازىمبەتكە شىمكەنت قالاسىنان 5 بولمەلى ءۇي سىيلادى. ودان بولەك بالانىڭ اناسى باقىتگۇلدىڭ كوزىن تەگىن ەمدەتۋگە سەرتيفيكات تابىس ەتىلدى. سونداي-اق ورازىمبەتتىڭ وزىنە سۋ جاڭا كومپيۋتەر مەن 5 ميلليون تەڭگەگە سەرتيفيكات بەرىلدى. بۇل قاراجاتتى بالا 18 جاسقا تولعاننان كەيىن قاجەتىنە قاراي جاراتا الادى. وسىنداي جۇرت سۇيسىنەرلىك يگىلىكتى ءىس جاريا بولعان «تۇنگى حابار» باعدارلاماسىندا ەسىمى ەلگە ءمالىم ءانشى ساكەن مايعازيەۆ ورازىمبەتتىڭ ەرەسەك ازاماتتاردىڭ ءسوزىن ايتقانىن جەتكىزدى. «الەۋمەتتىك جەلى ارقىلى وزدەرىڭىز كوردىڭىزدەر, ءبارىمىز تەبىرەندىك. بالا ارمانى ورىندالسىن. ءبىر-اق نارسە ايتقىم كەلەدى, اللانىڭ قالاۋىمەن سول ارماندارىڭ ورىندالىپ جاتسا دا, ەل-جۇرت بولىپ جۇمىلىپ, جىلۋ جيناپ, ءوز اعايىندارىڭ, باۋىرلارىڭ وزەككە تەپپەي, كومەكتەسىپ جاتقان جاعدايدا دا, ول سىيلىق بولادى. ال ەندى سونى قايتارامىن دەگەن رايىڭنان قايت, اينالايىن. كۇللى قازاق ساعان سول دۇنيەنى قايتارىپ بەرۋ ءۇشىن ەمەس, اللانىڭ رازىلىعى ءۇشىن ءوزىمىزدىڭ اعايىن-تۋىسقاندار بەرىپ جاتىر دەپ قابىلدا», دەدى ساكەن مايعازيەۆ.
ارماندارىنىڭ ورىندالعانىنا سەنە الماعان ورازىمبەت كوز جاسىن جاسىرا المادى. بالا كوڭىل تولقىپ, ايتقىسى كەلگەن جۇرەك ءسوزىن تولىق جەتكىزە المادى. «بارشالارىڭىزعا راحمەت! اللادان قايتسىن», دەۋمەن بولدى. ال ورازىمبەتتىڭ ناعاشى اجەسى: «جەتىمدى جەبەگەننىڭ الدىنان جەتى پەيىشتىڭ ەسىگى اشىلادى. تىلەكتەرىڭ قابىل بولسىن!», دەپ انالىق باتاسىن بەرىپ, العىسىن ءبىلدىردى.
ورازىمبەت زاعيپ اناسىنىڭ قولىنان جەتەكتەپ, جاڭا ۇيدەگى بارلىق بولمەلەردى تانىستىرعان. ءۇيدىڭ سىرتىنداعى كەڭ اۋلاعا قيار, قىزاناق پەن باسقا دا كوكونىستەر جانە گۇل ەكپەك. ەرتەڭگى كۇنىنە سەنىمدى بالانىڭ ىسكە اسىرعىسى كەلەتىن جوسپارى كوپ.
شىمكەنت
