«قازاقستان حالقىنا» قورىنىڭ قامقورشىلىق كەڭەسى قاڭتار وقيعاسى كەزىندە قازا تاپقان جانە اۋىر جارالانعان اسكەري قىزمەتشىلەردىڭ, ىشكى ىستەر جانە ۇلتتىق قاۋىپسىزدىك ورگاندارى قىزمەتكەرلەرىنىڭ, سونداي-اق كەزدەيسوق قۇربان بولعان ازاماتتاردىڭ وتباسىلارىنا, كوز جۇمعان جانە جارالانعان بالالاردىڭ وتباسىلارىنا ماتەريالدىق كومەك كورسەتۋ تۋرالى شەشىم قابىلدادى.
«قازا تاپقان اسكەري قىزمەتشىلەردىڭ, ىشكى ىستەر ورگاندارى قىزمەتكەرلەرىنىڭ, ۇلتتىق قاۋىپسىزدىك ورگاندارى قىزمەتكەرلەرىنىڭ, كەزدەيسوق قازا بولعان ازاماتتاردىڭ وتباسىنا 7 ميلليون تەڭگە ماتەريالدىق كومەك كورسەتىلەدى. ال اۋىر جاراقات العان اسكەري قىزمەتشىلەرگە, ىشكى ىستەر جانە ۇلتتىق قاۋىپسىزدىك ورگاندارى قىزمەتكەرلەرىنە, سونداي-اق جارالانعان بالالاردىڭ وتباسىنا 3 ميلليون تەڭگەدەن بولىنەدى», دەلىنگەن قور حابارلاماسىندا.
سونداي-اق قور جاپپاي تارتىپسىزدىكتەر كەزىندە قازا بولعان قۇقىق قورعاۋ ورگاندارى قىزمەتكەرلەرى مەن كامەلەتكە تولماعان بالالارى بار بەيبىت تۇرعىنداردىڭ وتباسىلارىنا قوسىمشا قايىرىمدىلىق كومەك كورسەتۋ بويىنشا جۇمىس جۇرگىزىپ جاتىر.
