توماش يۋرچو 1992 جىلدىڭ 28 جەلتوقسانىندا بۇرىنعى چەحوسلوۆاكيانىڭ كوشيتسە قالاسىندا دۇنيەگە كەلدى. بالا كەزىنەن حوككەيگە قىزىققان ول 16 جاسىندا كاناداعا اتتانىپ, ءتۇرلى ورتاڭقول كلۋبتاردا ونەر كورسەتتى. ارادا ءتورت جىل وتكەننەن سوڭ ۇلتتىق حوككەي ليگاسىنداعى (ۇحل) مايتالمان مامانداردىڭ قىراعى نازارىنا ىلىكتى. سودان بەس ماۋسىم بويى «دەترويت رەد ۋينگز» بەن «چيكاگو بلەكحوكستىڭ» نامىسىن قورعادى. 2019-2020 جىلدار ارالىعىندا يۋرچو «ەدمونتون ويلەرزدە» وينادى. ۇحل-دا ول بارلىعى 223 رەت مۇز ايدىنىنا شىعىپ, 54 ۇپاي (23 گول+31 پاس) جيدى. امەريكالىق حوككەي ليگاسىندا (احل) 240 كەزدەسۋ وتكىزىپ, 169 ۇپايدى (82+87) ەنشىلەدى.
بىلتىر توماش «بارىستىڭ» جەيدەسىن كيدى. قازاقستانعا كەلگەن بەتتە ورەلى ونەرىمەن كوزگە ءتۇسىپ, سان رەت جەرگىلىكتى جانكۇيەرلەردى قۋانتتى. ونىڭ قۇرلىقتىق حوككەي ليگاسىنداعى (قحل) ايشىقتى ويىنى ماماندار تاراپىنان وڭ باعالانۋدا. سول كەزدەن بەرى 17 مارتە مۇز ايدىنىنا شىققان سلوۆاكيالىق شابۋىلشى قارسىلاستار قاقپاسىن 3 رەت ءدال كوزدەپ, 8 رەت ناتيجەلى پاس بەردى. بارلىعى – 11 ۇپاي.
ءوز ەلىنىڭ ۇلتتىق قۇراماسى ساپىندا توماش يۋرچو 2014 جىلى سوچيدە الاۋى تۇتانعان وليمپيا ويىندارىنا قاتىستى. ول جارىستا سلوۆاكيا 11-ورىندى قاناعات تۇتتى. يۋرچو ءتورت باسەكەدە ءبىر رەت نىسانانى ءدال كوزدەدى. 2015, 2016 جانە 2018 جىلدارى ۇيىمداستىرىلعان الەم چەمپيوناتتارىندا باق سىناعان حوككەيشى 11 ماتچتا (2+7) 9 ۇپاي جيدى. ودان بولەك, توماش جاسوسپىرىمدەر مەن جاستار اراسىنداعى دۇنيەجۇزىلىك دودالاردا دا ونەر كورسەتتى.
وسىعان دەيىن وليمپيا ويىندارىنا جەتى مارتە قاتىسقان سلوۆاكيا ەڭ ۇزدىك ناتيجەگە 2010 جىلى ۆانكۋۆەردە قول جەتكىزدى. جارتىلاي فينالدا كانادالىقتاردان (2:3) ۇتىلعان ولار قولا مەدال ءۇشىن تارتىستا فينلياندياعا (3:5) جول بەرگەن ەدى. 2006 جىلى تۋريندە بەسىنشى ورىن السا, 1994 جىلى ليللەحاممەردە التىنشى ساتىعا تابان تىرەدى.
بەيجىڭدە سلوۆاكيا قۇراماسىنىڭ باعى جاندى. توپتىق تۋرنيردە فيندەر (2:6) مەن شۆەدتەرگە (1:4) ەسە جىبەرىپ, لاتۆيانى (5:2) ويسىراتا ۇتتى. سوڭعى ويىندا يۋرچو ءبىر گول سوعىپ, ءبىر رەت ناتيجەلى پاس بەردى. پلەي-وفف سايىسىندا ولار گەرمانيانىڭ قاقپاسىنا جاۋاپسىز ءتورت شايبا سالدى. شيرەك فينالدا اقش-تان (3:2) بۋلليت سوعۋ بارىسىندا باسىم ءتۇستى. جارتىلاي فينالدا فيندەرگە (0:2) الدەرى جەتپەدى. ال ءۇشىنشى ورىن ءۇشىن باسەكەدە شۆەتسياعا (4:0) شاڭ قاپتىرىپ كەتتى. وسىلايشا, سلوۆاكيا حوككەيشىلەرى وليمپيا ويىندارىنىڭ قولا جۇلدەگەرى اتاندى. ءداپ قازىرگى كەزدە قازاقستاندىق جانكۇيەرلەر دە عالامدىق دودادا ءۇشىنشى ورىنعا تابان تىرەگەن كوماندانىڭ ساپىنداعى «بارىستىڭ» ويىنشىسى توماش يۋرچونى بەيجىڭدەگى تولاعاي تابىسىمەن قۇتتىقتاۋدا.
