ماڭىزدى تەمىرجول قۇرىلىسى مەرزىمىندە بىتەدى

ارقالىق – شۇباركول جانە جەزقازعان – سەكسەۋىل تەلىمدەرىندە تەمىرجول توسەمىن توسەۋ بويىنشا نەگىزگى جۇمىس اياقتالدى. بىراق, بۇل جەلى قۇرىلىسى ءبىتتى دەگەندى بىلدىرمەيدى. بۇدان كەيىن دە اتقارىلاتىن جۇمىس كوپ. وقىرماندارىمىزدىڭ ەسىنە وتكەن جىلدىڭ جەلتوقسان ايىندا سالىنىپ جات­قان جەزقازعان – سەكسەۋىل جانە ارقالىق – شۇباركول جەلىلەرىنىڭ تەمىرجول توسەم­دەرىنىڭ تۇيىستىرىلگەندىگى تۋرالى سالا كە­تەيىك. وسىنداي ماڭىزدى وقيعانىڭ «جول جون­دەۋشى» كومپانياسى» جشس الەۋمەتتىك-ەكو­نوميكالىق كورسەتكىشتەرىنە قالاي اسەر ەتتى؟ – وتكەن جىل ءبىز ءۇشىن وتە تابىستى بول­عانى ەشقانداي ءشۇبا كەلتىرمەيدى. ەكى جەلىنىڭ دە توسەمىن تۇرعىزىپ, ونى تۇيىس­تىرۋمەن اياقتاۋدى قول جەتكەن جەتىستىگىمىز رەتىندە اتاپ وتكىم كەلەدى, – دەيدى «جول جوندەۋشى» كومپانياسى» جشس باس ديرەكتورىنىڭ ورىنباسارى ۆيكتور بوگاچەۆ (سۋرەتتە). – جوسپارلانعان جۇمىستى مەرزىمىندە ءبىتىرۋ ءبىزدىڭ تابىستى كومپانيا رەتىندە كۇردەلى عانا ەمەس, ءتىپتى اسا كۇردەلى مىندەتتەردى ورىنداي الاتىنداي ابىرويىمىزدى ارتتىرا ءتۇستى. بىلىكتىلىكپەن قۇرىلعان عىلىمي-تەحنيكالىق شەشىم, وزىق مەنەدجمەنت ءوز دەگەنىنە جەتكىزدى – ءبىز ۇجىمىمىزدىڭ قول جەتكەن تابىسىمەن ماقتانا الامىز. جەزقازعان – سەكسەۋىل جانە ارقالىق – شۇباركول تەمىرجول جەلىسى قۇرىلىسىنا بارلىعى 11 مىڭ ادام مەن وتە كوپ ارنايى تەحنيكا تارتىلدى. جەزقازعان – سەكسەۋىل جەلى بويىنداعى ەڭ ۇلكەن جانە ەڭ كۇردەلى تەلىم. وسى ارالىقتاعى جۇمىستىڭ 70%-ىن «جول جوندەۋشى» كومپانياسى» جشس اتقاردى. 16 ايدا جۇمىس بارىسىندا 30 ملن. تەكشە مەتر توپىراق ءۇيىلىپ, 244 سۋ وتكىزەتىن قۇبىر توسەلىپ, 12 كوپىر سالىنىپ, 547 شاقىرىم جول توسەمى تۇرعىزىلدى. ەكى جەلى بويىنداعى وسىنداي وراسان زور جۇمىستى مەرزىمىندە ءبىتىرىپ, ساپالى ورىنداپ شىعۋدا «جول جوندەۋشى» كومپانياسى» جشس-ءنىڭ قىزىلوردا, قاراعاندى, پاۆلودار, قوستاناي, الماتى فيليالدارى جول جوندەۋ ديرەكتسيالارىنىڭ ەڭبەگى ەرەكشە. جۇمىستىڭ ساۋاتتى ۇيىمداستىرىلۋى مەن كادرلاردىڭ بىلىكتىلىكپەن ىرىكتەلىپ الىنۋى ماڭىزدى ءرول اتقاردى. قىزمەتكەرلەردىڭ ايتۋىنا قاراعان­دا, 2013 جىلدى كومپانيا جاقسى كورسەت­كىشتەرمەن اياقتاعان. ارينە, جۇمىس بولعان سوڭ كەيبىر كەمشىلىك تە بار. بىراق, ول جۇمىستىڭ جالپى جاعدايىنا بالەندەي ءبىر كەرى اسەر ەتپەيدى. – كومپانيامىزدىڭ قول جەتكىزگەن جەتىس­­­تىگى تۋرالى وتكەن ماتەريالداردا ايتقان مالى­مەتتەردى قايتالاپ جاتقانىمىزدىڭ ءجونى جوق دەپ ويلايمىن, – دەپ اڭگىمەسىن جالعاستىردى ۆيكتور نيكولاەۆيچ. – «جول جوندەۋشى» كومپانياسى بەلگىلى ءبىر جۇمىستى بەلسەندى تۇردە جۇزەگە اسىرا وتىرىپ ۇيىمداستىرۋ مەن باقى­لاۋ قىزمەتىن قاتار اتقارعانىن اتاپ وتكىم كەلە­دى. 33 مەردىگەرلىك ۇيىمنىڭ جۇمىسىن تالاپقا ساي ۇيىمداستىرۋدىڭ ءوزى نەگە تۇرادى دەسەڭىزشى. «جول جوندەۋشى» كومپانياسى» جشس تەمىرجول جوندەۋ مەن ونىڭ قۇرىلىسى نارىعىندا ءبىراز جىلدان بەرى سان سالالى قىزمەت اتقارىپ كەلەدى. «جول جوندەۋشى» تەحنيكانى ۇنەمى جاڭالاپ جانە جاڭعىرتىپ وتىرۋى ناتيجەسىندە ەداۋىر وندىرىستىك قوردى يەلەنىپ وتىر. كومپانيانىڭ بارلىق فيليالدارى كىرمە جولدارمەن, قۋاتتى وندىرىستىك-قويما بازالارىمەن, رەلس-شپال ءورىمىن قۇراستىرۋ مەن تارقاتۋعا, جۇك ءتۇسىرۋ-تيەۋ جۇمىسىن جۇزەگە اسىرۋعا قاجەتتى مەحانيزمدەردىڭ تولىق كەشەنىمەن قامتاماسىز ەتىلگەن. رەلس-شپال توسەۋدە پايدالانىلاتىن كراندار, موتورلى پلاتفورمالار, تۇزەتكىش-نىعىزداعىش, ارلەگىش ماشينالار, ەلەكترباللاستەر جانە باسقا دا جول ماشينالارى مەن مەحانيزمدەرىنىڭ قاجەتتى تولىق كەشەنى بار. بۇدان باسقا, تەمىرجولدى پايدالانۋعا بەرگەنگە دەيىنگى تەحنولوگيالىق ءۇردىستى تولىق ورىنداۋعا مۇمكىندىك بەرەتىن ارنايى قوزعالمالى قۇرام (سايكەستەندىرىلگەن المالى-سالمالى قۇرال-جابدىقپەن جابدىقتالعان پلاتفورمالار, حوپپەر-دوزاتورلىق جانە قىزمەتتىك-تەحنيكالىق ۆاگوندار), اۆتوموبيلدەر مەن تراكتورلار, مەحانيكالاندىرىلعان جانە جول جوندەۋشىنىڭ كۇندەلىكتى قۇرال-جابدىعىمەن جەتكىلىكتى قامتىلعان. ۇجىم جەزقازعان – سەكسەۋىل جا­نە ارقالىق – شۇباركول تەمىرجول قۇرى­لىسىندا باس مەردىگەر قىزمەتىن اتقارۋدا بىلىكتىلىگىن دالەلدەپ, ءوزىن جاقسى جاعىنان كورسەتە ءبىلدى. وسىنىڭ ءوزى وتكەن جىلدا قول جەتكەن باستى تابىس بولىپ تابىلادى. 2012-2013 جىلداردا «جول جوندەۋشى» كومپانياسى» جشس مەن ونىڭ ارىپتەستەرى «بازيس», «BI Group» جانە «نايزا قۇرىلىس» كومپانيالارى قۇرىلىسى ءجۇرىپ جاتقان ەكى تەمىرجول توسەمىنە 44,1 ملن. تەكشە مەتر توپىراق ءۇيىپ, 20 كوپىر سالدى, 405 سۋ وتكىزەتىن قۇبىر ورناتتى, 757 شاقىرىم رەلس-شپال ءورىمىن قۇراستىرىپ, جول بويىنا توسەپ شىقتى, سونىمەن قاتار 258 شاقىرىم ەلەكتر جەلىسىن تارتىپ, 227 شاقىرىمعا تالشىقتى-وپتيكالىق جەلى جۇرگىزدى. بۇل وتە جاقسى كورسەتكىش. مەرزىمىندە سالىنىپ بىتكەن جەلى بۇدان كەيىنگى قۇرىلىس جۇرگىزۋگە قاجەتتى ماتەريالدى قىس كەزىندە جەتكىزۋگە مۇمكىندىك بەرىپ وتىر. دەگەنمەن, بيىلعى جىلدىڭ قارى قالىڭ ءتۇسىپ, ايازدى بولعان قىسى جۇمىس بارىسىنا وزىندىك ىقپال ەتتى. جەزقازعان – سەكسەۋىل جانە ارقالىق – شۇباركول جەلىسى بويىندا كەي جەردە تەرەڭدىگى 17 مەترگە دەيىن جەتەتىن كوپتەگەن ويىقتاردىڭ بولۋىنا بايلانىستى جۇمىسشى پويىزداردىڭ قوزعالىسىن ۇيىمداستىرۋدا قيىندىق تۋدى. قارلى بوران ناتيجەسىندە ويىقتاردى قار باسىپ قالدى. سوندىقتان دا قۇرىلىسقا قاجەتتى ماتەريال جەتكىزۋ ناۋرىز ايىنان باستالدى. وتكەن جىلى نەگىزگى كۇش پەن قارجىلاندىرۋدىڭ باسىم بولىگى نەگىزگى جولدى تۇيىستىرۋگە باعىتتالعاندىقتان, قاردان قورعايتىن قورعانىشتار قۇرىلىسى 2014 جىلعا جوسپارلانعان بولاتىن. جالپى العاندا, تەمىرجول سالۋ بارىسىندا كەزدەسەتىن ويىقتار ۇلكەن كەدەرگى بولادى. ولاردى قار كوشكىنىنەن قورعايتىن جوبا دا بار جانە ول بيىلعى جىلى جۇزەگە اسىرىلادى. قازىرگى كەزدە ۇجىم ماڭىزدى جۇمىس اتقارىپ جاتىر. بىرىنشىدەن, ەرىگەن قار سۋى تولىپ قالماۋى ءۇشىن ويىقتار قاردان تازارتىلۋدا. ەكىنشىدەن, كوكتەمگى تاسقىننىڭ الدىن الىپ, جولدى سۋ شايىپ كەتپەۋى ءۇشىن سۋ وتكىزەتىن قۇبىرلار اشىلىپ, كوپىرلەردىڭ استى تازارتىلۋدا. تەمىرجولشىلاردىڭ تىلىمەن ايتقاندا, ەرىگەن قار سۋىنىڭ سەلگە اينالىپ كەتپەۋىنىڭ الدىن الۋ شارالارى جۇرگىزىلۋدە. سونىمەن, جاڭا سالىنعان جەلىنىڭ بەرىكتىگىن سىناپ بايقاعان العاشقى قىس تا اياقتالدى. ۇشىنشىدەن, باعىتتامالىق بۇرمالار ورناتىلۋدا, باللاست پريزماسى قالىڭدىعى نورماعا سايكەستەندىرىلۋدە, بايلانىس جانە بەلگى بەرۋ, ەنەرگيامەن جابدىقتاۋ ديستانتسيالارىنىڭ قىزمەتكەرلەرى قاجەتتى اپپاراتۋرا قوندىرىپ, ەلەكتر جەلىسىن تارتىپ, جۇمىسىن توقتاتقان جوق. رەلس-شپال ءورىمىن توقۋ جالعاسۋدا. ولاي بولسا, جۇمىس قارقىندى ءجۇرىپ جاتىر. تەمىرجولدا جۇمىس قاشان دا كوپ. سونىڭ وزىندە قازىرگى كەزدە جاز بويى اتقارىلاتىن جۇمىستىڭ قامى جاسالۋدا. ال, الداعى ۋاقىتتا اتقارىلاتىن جۇمىس قىرۋار. 2014 جىلى تاپسىرىس بەرۋشى – «قازاقستان تەمىر جولى» ۇلتتىق كوم­پا­نياسى ەكى تەمىرجول جەلىسى بويىن­شا دا جىلدىڭ اياعىنا دەيىن جۇك تاسى­مالى قوزعالىسىن قامتاماسىز ەتۋگە مۇمكىندىك بەرەتىن كەشەننىڭ ءبىرىنشى كەزەگىن پايدالانۋعا بەرۋ مىندەتىن قويىپ وتىر. «جول جوندەۋشى» كومپانياسى» جشس ۇجىمى قازىرگى كەزدە جوسپارلاۋ جانە ينجەنەرلىك دايىندىق جۇمىسىن جۇزەگە اسىرۋمەن اينالىسۋدا. تاعى دا ارنايى تەحنيكا مەن ادام كۇشىن تارتىپ, قوسىمشا رەسۋرستاردى جۇمىلدىرۋدا. كومپانيا الدىنا قويىلعان مىندەتتى ورىنداۋعا تاس ءتۇيىن دايىن وتىر. ۇزىندىعى 762 شاقىرىمدىق جول بويىنداعى توپىراق ءۇيىندىسى مەن جاساندى قۇرىلىستاردى تۇرعىزۋدى ءبىتىرىپ, ستانتسيا تارامدارىن توسەپ, بايلانىس جانە بەلگى بەرۋ, ورتالىقتاندىرۋ جانە بلوكتاۋ قۇرىلعىلارىن ورناتىپ, ەتس قوسىندارىن سالۋدا. بۇدان باسقا جەلى بويىن تۇتاستاي ەلەكتر ەنەرگياسىمەن قامتاماسىز ەتىپ, وندىرىستىك عيماراتتار مەن يماراتتار سالۋ قاجەت. «جول جوندەۋشى» كومپانياسى» جشس ءۇشىن جەزقازعان – سەكسەۋىل جانە ار­قالىق – شۇباركول تەمىرجول جەلىسى قۇرى­لىسىنىڭ جوباسىن جۇزەگە اسىرۋ ۇلكەن جاۋاپكەرشىلىككە اينالعان. ۇجىم ۇلكەن تاجىريبە جيناپ, مەنەدجمەنتىن جاقسارتىپ, قىزمەتكەرلەرىنىڭ بىلىكتىلىگىن ارتتىرىپ, ءوسىپ, وركەندەپ دامىدى. بۇرىن دا ايتىلىپ كەلگەندەي, اتالعان جوبانى جۇزەگە اسىرۋ ورتالىق قازاقستاننان جانە قىتايمەن شەكارالاس دوستىق ستانساسىنان اقتاۋ تەڭىز پورتى جانە ودان ارى ەۋروپا ەلدەرىنە تۋرا شىعۋدى قامتاماسىز ەتەدى. ونىڭ باستى ارتىقشىلىعى – ەڭ توتە جول ەكەندىگىندە. قىتايدان ەۋروپا ەلدەرىنىڭ پورتتارىنا دەيىن تاسىمالداناتىن جۇكتىڭ جولداعى ۋاقىتى 40 كۇننەن 12 كۇنگە دەيىن قىسقارادى. بۇل ءوز كەزەگىندە دوستىق ستانساسى مەن اقتاۋ پورتى ارالىعىندا تاسىمالداناتىن جۇك كولەمىن ءۇش ەسەگە دەيىن ارتتىرۋعا مۇمكىندىك بەرەدى. وتاندىق جولاۋشى جانە جۇك تاسىمالدايتىن قۇرامدار ءۇشىن اراقاشىقتىق بىردەن 1100 شاقىرىمعا قىسقارادى. بۇگىنگى كۇنى قىتاي شەكاراسىنداعى دوستىق ستانساسى مەن ەلىمىزدىڭ باتىسىندا ورنالاسقان اقتاۋ پورتىنا دەيىنگى اراقاشىقتىق 4165 شاقىرىم بولسا, قورعاس ستانساسىنان اقتاۋ پورتىنا دەيىنگى اراقاشىقتىق 3594 شاقىرىم. جاڭا سالىنىپ جاتقان تەمىرجول پايدالانۋعا بەرىلگەننەن كەيىن وسى اراقاشىقتىق العاشقى مارشرۋت بويىنشا – 3027, ەكىنشى مارشرۋت بويىنشا 3110 شاقىرىمدى قۇرايدى. ليۋبوۆ گوۆورۋحينا, «ترانس-ەكسپرەسس قازاقستان» جۋرنالىنىڭ رەداكتورى.