سالتاناتتى شارا بارىسىندا قۇتتىقتاۋ ءسوز سويلەگەن ايماق باسشىسى سوڭعى ەكى جىل ىشىندە وڭىردە 8 جاڭا سپورت نىسانى اشىلعانىن اتاپ ءوتتى.
– ەلىمىزدە بۇقارالىق سپورت تۇرلەرى دامىپ كەلەدى. ماسەلەن, بىلتىر پايدالانۋعا بەرىلگەن شاڭعى بازاسىندا رەسپۋبليكالىق دەڭگەيدەگى ءىرى جارىستار وتۋدە. بۇگىندە وبلىستا 300 مىڭعا جۋىق ەرەسەكتەر, 80 مىڭنان استام بالالار مەن جاسوسپىرىمدەر سپورتپەن اينالىسۋدا. مەملەكەتتىك سپورتتىق تاپسىرىس اياسىندا 7 مىڭنان استام بالا تەگىن ۇيىرمەلەرگە بارىپ ءجۇر. بۇل ماقساتقا وبلىس بيۋدجەتىنەن 500 ملن تەڭگە ءبولىندى. وسىدان جيىرما جىل بۇرىن قالا ورتالىعىندا سالىنعان مۇز سارايىنىڭ قۇرىلعىلارى ەسكىرىپ كەتكەندىكتەن, سپورت نىسانىن مامىردان قازان ايىنا دەيىن جاۋىپ قويۋعا تۋرا كەلەدى. ال بۇگىن پايدالانۋعا بەرىلگەن جاڭا مۇز ايدىنى ۋاقىت تالاپتارىنا ساي جىل ون ەكى اي جۇمىس ىستەيدى. ەڭ باستىسى, ەندى مۇندا ءوڭىر نامىسىن قورعاپ جۇرگەن ءوز سپورتشىلارىمىز جاتتىعاتىن بولادى, – دەدى ا.مۇحامبەتوۆ.
وبلىس اكىمىنەن سوڭ كسرو ەڭبەك سىڭىرگەن سپورت شەبەرى, شايبالى حوككەيدەن ەكى دۇركىن وليمپيادا, 8 دۇركىن الەم چەمپيونى سەرگەي ماكاروۆ مۇز ايدىنىنا شىقتى. كوپشىلىكپەن «اسسالاۋماعالەيكۇم!» دەپ مۇسىلمانشا امانداسقان ايگىلى سپورتشى جاڭا سارايدىڭ جاستار ءۇشىن پايداسى زور ەكەنىن, مۇنداي مۇز ايدىنى كەز كەلگەن وڭىردە بولا بەرمەيتىنىن ايتىپ, ەندى 5-6 جىلدان كەيىن قوستانايدا حوككەي شەبەرلەرىنىڭ جاڭا بۋىنى ءوسىپ شىعاتىنىنا سەنىم ءبىلدىردى.
جاڭا نىسانعا جينالعاندار ودان كەيىن پەتروپاۆل قالاسىنان كەلگەن «قۇلاگەر» حوككەي كومانداسى مەن رۋدنىيلىق «گورنياكتىڭ» اراسىنداعى جولداستىق كەزدەسۋدى تاماشالادى.
سلوۆاكيالىق ن+ن Technika كومپانياسىنىڭ وكىلى, اتالعان مۇز ارەناسىنىڭ ديرەكتورى تالعات ەرىشوۆ: «مۇز ارەناسى ەڭ سوڭعى ۇلگىدەگى زاماناۋي قۇرىلعىلارمەن جابدىقتالعان. مۇندا ناۋرىز ايىنان باستاپ №3 بالالار مەن جاسوسپىرىمدەر سپورت مەكتەبىنىڭ تاربيەلەنۋشىلەرى جاتتىعا باستايدى. قالا تۇرعىندارىنا دا ەسىك اشىق. مۇزايدىنعا كەلۋشىلەر ءۇشىن ارنايى كونكيلەر ساتىپ الىنعان. بۇل كونكيلەردى ەرەسەكتەر شامامەن 2 مىڭ تەڭگەگە, ال بالالار 1000 تەڭگەگە جالعا الا الادى», دەدى.
مۇز سارايىنىڭ 500 كولىككە ارنالعان اۆتوتۇراعى بار. كوكتەم شىعىپ, كۇن جىلىنعان سوڭ, جاڭا نىساننىڭ اينالاسىنا جاسىل جەلەك وتىرعىزىلىپ, اباتتاندىرىلاتىن بولادى.
قوستاناي
