جوعارىداعى جاڭالىقتى جانىبەكتىڭ كومانداسى وتە جاقسى قابىلدادى. ولار: «بۇگىن WBO تۇجىرىمى مەكسيكالىق داڭقتى بوكسشى مۋنگيا مەن جانىبەكتىڭ جەكپە-جەك وتكىزۋى تۋرالى شەشىم شىعاردى. ولار چەمپيوندىق تيتۋلعا تالاسۋعا ءتيىس. ەندى 10 كۇندە ءبىراز نارسە انىقتالادى. ەكى تاراپ كەلىسىمگە كەلىپ, مەكسيكالىق تا اندرادە سەكىلدى باسقا سالماققا اۋىسىپ كەتپەسە, ءبىز ءۇشىن بۇل سۋپەر جەكپە-جەك بولماق. سەبەبى اتاعى جاعىنان حايمە مەكسيكادا «كانەلودان» كەيىنگى ورىندا. ول – بوكس الەمىندەگى تانىمال تۇلعا. جەڭىلمەگەن جۇلدىز! ءبىز دايىنبىز! بۇيىرتسا, ءبىز بيىل جاسىنداي جارقىلداپ, QAZAQ STYLE-ءىن الەمگە ايگىلەيمىز!» دەگەن جازبا جاريالادى ينستاگرامم-اككاۋنتىنا.
راسىندا دا, ءالىمحان ۇلى ءۇشىن بۇل تاماشا مۇمكىندىك. سەبەبى حايمە نەبارى 25 جاستا بولسا دا, سپورتتىڭ بۇل تۇرىندە زور بەدەل جيناپ ۇلگەردى. ول 17 جاسقا تولماعان شاعىندا كاسىپقوي رينگتەگى العاشقى كەزدەسۋىن وتكىزدى. سول 2013 جىلدان بەرى 39 جەكپە-جەك وتكىزىپ, بارلىعىندا جەڭىسكە جەتتى. 31 قارسىلاسىن نوكاۋتقا جىبەردى. تومەنگى كاليفورنيا شتاتىنا قاراستى تيحۋانا قالاسىنىڭ تۋماسى باستاپقى باسەكەلەرىنىڭ بارلىعىن تەك ءوز وتانىندا عانا وتكىزسە, سوڭعى كەزدەرى اقش-تا ءجيى-ءجيى جۇدىرىقتاسىپ ءجۇر. مەكسيكانىڭ مارقاسقاسى كەزىندە تالاي مىقتىنى سابادى. 2018 جىلدىڭ كوكتەمىندە نيۋ-يوركتە امەريكالىق سادام ءاليدى ءتورتىنشى راۋندتا ەسىنەن تاندىرىپ, WBO نۇسقاسى بويىنشا ءبىرىنشى ورتا سالماقتىڭ چەمپيوندىق بەلبەۋىن يەلەندى. ودان كەيىن ليام سميت, برەندون كۋك, تاكەسي ينوۋە, دەننيس حوگان, پاتريك اللوتتي, گارري O'سالليۆان, تۋرەانو دجونسون, كاميل شەرەمەتا جانە گابريەل روسادو سەكىلدى تانىمال بوكسشىلاردى ۇتتى. ءوزىنىڭ سوڭعى كەزدەسۋىن ول بيىلعى 19 اقپاندا تيحۋانادا وتكىزىپ, امەريكالىق ديميتريۋس باللاردتى وڭدىرماي سابادى جانە ايقىن جەڭىسكە قول جەتكىزدى.
حايمە مۋنگيانىڭ اكەسى دە كەزىندە مىقتى بوكسشى بولعان. اسا اۋىر سالماقتا ايقاسقان ول كەزىندە اقش چەمپيونى اتانىپ, باسقا دا حالىقارالىق دودالاردا جۇلدە العان. ونىڭ مىقتى بىلعارى قولعاپ شەبەرى بولىپ قالىپتاسۋىنا ۋاقىتىندا بىرنەشە بەلدى نۇسقالار بويىنشا الەم چەمپيونى اتانعان ايگىلى انتونيو مارگاريتونىڭ دا ۇلكەن سەپتىگى ءتيدى. ەكەۋى ءبىر زالدا جاتتىعىپ, ساقا سپورتشى جاس ورەنگە كوپ نارسە ۇيرەتتى.
ءبىر كەزدەرى ءدۇيىم جۇرت مۋنگيانى ءبىزدىڭ گەننادي گولوۆكينمەن كۇش سىناسقانىن تاعاتسىزدانا كۇتكەن ەدى. ءدال وسى سيپاتتاعى اڭگىمەلەر 2017-2018 جىلدارى قاتتى ءوربىدى. ولار WBC, WBA جانە IBF نۇسقالارىنىڭ التىن بەلبەۋى ءۇشىن تالاسۋعا ءتيىس ەدى. بىراق نەۆادا شتاتىنىڭ اتلەتيكالىق كوميسسياسى مەكسيكالىق ورەننىڭ تاجىريبەسى ءالى از دەپ ەسەپتەپ, ونى GGG-گە قارسى شىعارمادى. سونداي-اق «انە-مىنە قانات يسلاممەن جۇدىرىقتاسادى» دەگەن دە سىبىستار شىققان. بىراق مۋنگيا ءبىزدىڭ بوكسشىنى مەنسىنبەدى مە الدە قانات ودان قايمىقتى ما, ول جاعى بىزگە بەيمالىم, ايتەۋىر بۇل باسەكە وتپەي قالدى.
اۋەسقوي رينگتە اۋىز تولتىرىپ ايتارلىقتاي تابىستارعا قول جەتكىزگەن جانىبەك ءالىمحان ۇلى كاسىپقوي رينگتە دە قىسقا عانا مەرزىم ارالىعىندا ءبىراز بەدەل جيناپ ۇلگەردى. جۇدىرىقتاسۋ ونەرىنىڭ جىلىك مايىن شاققان مايتالمان مامانداردان باستاپ, ساراپشىلار مەن باپكەرلەر, جۋرناليستەر مەن جانكۇيەرلەرگە دەيىن قازاقتىڭ قايسار ۇلىنىڭ مىقتىلىعىن ءبىراۋىزدان مويىنداپ وتىر. كوپشىلىك ونى بوكس الەمىندە جارقىراعان جۇلدىزداردىڭ ءبىرى ءارى بىرەگەيى سانايدى. ولاي بولسا, QAZAQ STYLE-ءىن تورتكۇل دۇنيەگە تانىت, جانىبەك! كۇللى الاش جۇرتى سەنەن تەك جارقىن جەڭىستەر كۇتەدى!
