ال 25-26 اقپان كۇندەرى «قوستاناي پلازا» ساۋدا-ساۋىق ورتالىعىندا «ۇلتتىڭ ۇلى ۇستازى» اتتى ينتەراكتيۆتى ءىس-شارا وتەدى. بۇل كۇنى مەكتەپ وقۋشىلارى دايىنداعان ادەبي-كوركەم كومپوزيتسيا كوپشىلىك نازارىنا ۇسىنىلىپ, احاڭ ولەڭدەرى وقىلادى. سونداي-اق قالا تۇرعىندارى الاش ارىسىنىڭ مەرەيتويىنا وراي ۇيىمداستىرىلعان كونتسەرتتىك باعدارلاما مەن تەاترلاندىرىلعان ساحنالىق قويىلىمدى تاماشالايدى. مەرەكەگە كەلگەن كوپشىلىك ءۇشىن احمەت بايتۇرسىن ۇلىنىڭ ءومىرى مەن شىعارماشىلىعىنا ارنالعان ۆيكتورينا ويىندارىنا دا قاتىسا الادى.
سونىمەن قاتار ءدال وسى كۇنى «پويسك» تانىمدىق كۆەست ويىنى مەن «ماسا» Youtube-جوباسىنىڭ تۇساۋكەسەرى وتەدى.
احمەت جىلىنىڭ اشىلۋىنا ارنالعان نەگىزگى ءىس-شارالار الداعى دۇيسەنبىدە 28 اقپاندا باستالادى. ساعات 11.00-دە, ءبىر مەزگىلدە وبلىس قالالارى مەن اۋداندارىنداعى احمەت بايتۇرسىن ۇلى ەسكەرتكىشتەرىنە گۇل شوقتارى قويىلادى. ساعات 11.15-تە ا.بايتۇرسىنوۆ اتىنداعى قوستاناي وڭىرلىك ۋنيۆەرسيتەتىندە «ۇلت ۇستازى» اتتى دوڭگەلەك ۇستەل باستالادى. ءىس-شارا اياسىندا اقىن, عالىم سەرىكباي وسپانوۆتىڭ «ۇلت ۇستازى» كىتابىنىڭ تۇساۋكەسەرى وتەتىن بولادى.
تۇستەن كەيىن ا.بايتۇرسىنوۆ اتىنداعى قوستاناي وڭىرلىك ۋنيۆەرسيتەتىندە, ىبىراي التىنسارين مەموريالدىق مۋزەيىندە, ءى.وماروۆ اتىنداعى قازاق دراما تەاترىندا, «دوستىق ۇيىندە» جانە بالالار شىعارماشىلىق ۇيىندە احمەتتانۋ دارىستەرى وتەدى.
ال كەشكىلىك ساعات 16.00-دە جاستار سارايىندا احمەت بايتۇرسىن ۇلىنا ارنالعان مەرەيتويدىڭ اشىلۋ ءراسىمى باستالادى. سالتاناتتى ءىس-شارا شەڭبەرىندە وتەتىن ادەبي-سازدى كەشتە احاڭنىڭ ءان-كۇيلەرى ورىندالىپ, ولەڭدەرى وقىلادى. سونداي-اق ءى.وماروۆ اتىنداعى قوستاناي قازاق تەاترى دايىنداعان كەمەڭگەر ومىرىنەن الىنعان تەاترلاندىرىلعان قويىلىم كوپشىلىككە ۇسىنىلادى.
قوستاناي وبلىسى
