قاسىم-جومارت توقاەۆ قازاق-مىسىر قاتىناستارىنىڭ تامىرى تەرەڭ بولعانىمەن, ەكى ەل اراسىنداعى زاماناۋي ديپلوماتيالىق قاتىناستاردىڭ ورناعانىنا بيىل 30 جىل تولعانىن اتاپ ءوتتى. وسى مەرزىم ىشىندە ەكىجاقتى ىنتىماقتاستىقتىڭ ءارتۇرلى سالاسى بويىنشا بىرقاتار جەتىستىكتەرگە قول جەتكىزىلدى.
قازاقستان پرەزيدەنتى ەكى ەل اراسىنداعى بايلانىستارىنىڭ الەۋەتى ءالى دە تولىق كولەمدە پايدالانىلماي وتىرعانىنا نازار اۋدارىپ, مىسىر تاراپىن ساۋدا-ەكونوميكا سالاسىنداعى ىقپالداستىقتى دامىتۋعا شاقىردى.
سونىمەن قاتار, مەملەكەت باسشىسى قاڭتار وقيعالارىنا قاتىستى الاڭداۋشىلىق تانىتىپ, نيەتتەستىك بىلدىرگەن مىسىر پرەزيدەنتى ابدەل فاتتاح اس-سيسي مەن بارشا مىسىر حالقىنا العىسىن جەتكىزدى.
قاسىم-جومارت توقاەۆ ەلىمىزدەگى جاعدايدىڭ تۇراقتالعانىن اتاپ ءوتىپ, الەۋمەتتىك-ەكونوميكالىق قايتا قۇرۋدىڭ جاڭا ستراتەگياسىن جۇزەگە اسىرۋ شارالارى قابىلدانعانىن ايتتى.
اڭگىمە سوڭىندا مەملەكەت باسشىسى مىسىر پرەزيدەنتىن قازاقستانعا وزىنە قولايلى مەرزىمدە ساپارمەن كەلۋگە شاقىردى.
