«ەلدىڭ ەنەرگەتيكالىق تەڭگەرىمىندە جاڭا گەنەراتسيا نۇكتەسى رەتىندە قۋاتى 2,4 گۆت بولاتىن اتوم ەلەكتر ستانساسىن سالۋ قاراستىرىلىپ وتىر», دەدى بولات اقشولاقوۆ.
مينيستر قازاقستاندا اەس سالۋدىڭ ارتىقشىلىقتارى مەن الەمدەگى اتوم ەنەرگەتيكاسىنىڭ نارىعى تۋرالى مالىمەتتەرگە توقتالدى.
«اتوم ەنەرگەتيكاسىنىڭ تاريحى جارتى عاسىردان استام ۋاقىتتى قامتيدى. وسى ۋاقىت ىشىندە ول ەنەرگەتيكانىڭ ءداستۇرلى سالالارىنىڭ بىرىنە اينالدى. قازىر الەمدەگى 31 ەل اتوم ەلەكتر ستانتسيالارىن پايدالانادى. وسى جىلدىڭ اقپان ايىنداعى جاعداي بويىنشا الەمدە شامامەن 439 ەنەرگيا رەاكتورى, ياعني جالپى قۋاتى شامامەن 390 گۆت بولاتىن اتوم رەاكتورى بار. 19 ەلدە تاعى 52 رەاكتور سالىنىپ جاتىر. اتوم ەنەرگەتيكاسى بۇگىندە شامامەن جاھانداعى بۇكىل گەنەراتسيانىڭ 10%-ىن الادى», دەپ ءتۇسىندىردى ۆەدومستۆو باسشىسى.
مينيستر اتوم ەنەرگياسى جونىندەگى حالىقارالىق اگەنتتىك 2050 جىلعا قاراي اەس گەنەراتسياسى 1,8 ەسە وسەدى دەپ بولجاعانىن اتاپ ءوتتى.
«تابيعي ۋران ءوندىرۋ بويىنشا الەمدە ءبىرىنشى ورىندا ەكەنىمىزدى ايتا وتىرىپ, يادرولىق وتىن ءوندىرۋ بويىنشا ءوز قۇرامداستارىمىز دا بار. وتكەن جىلى ءۇلبى مەتاللۋرگيا زاۋىتىندا اتوم ەلەكتر ستانتسياسىنا ارنالعان يادرولىق وتىن وندىرەتىن زاۋىت اشىلدى. كادرلىق الەۋەتكە كەلەتىن بولساق, جاقىندا اتوم ەنەرگەتيكاسى سالاسىندا مامان دايارلاۋ بويىنشا مەموراندۋمعا قول قويىلدى. ستانتسيانىڭ قاۋىپسىز جانە سەنىمدى جۇمىس ىستەۋى كوپتەگەن كادرلاردى قاجەت ەتەدى. ءبىز ەكى ەنەرگەتيكالىق بلوگى بار ءبىر ستانتسياعا اۋىسىمدىق جۇمىستى ەسكەرە وتىرىپ, شامامەن 2 مىڭ ادام قاجەت بولادى دەپ توپشىلادىق. بۇل 2 مىڭ ادامدى تەك وقىتىپ قانا قويماي, ولاردىڭ وسى سالادا بەلگىلى ءبىر جۇمىس تاجىريبەسى بولۋى كەرەك», دەپ تۇيىندەدى بولات اقشولاقوۆ.
