تاسقىنعا توسقىن جاساۋ ءۇشىن ءوتىپ جاتقان ءبىر ايلىق ءىس-شارالار بارىسىندا قار قالىڭ تۇسكەن توبىل وزەنىنىڭ جاعالاۋىنا جاقىن سايلى جەرلەردەگى ۇيلەردىڭ ماڭايى بارلانىپ, ارىق كوزدەرىن ارشۋ جۇمىستارى جۇرگىزىلۋدە.
قىزىل سۋدان قاۋىپ ءتونىپ تۇرعان توبولسكايا, پيونەرسكايا, كراسنىي كۋزنەتس, يۋنىي بوەتس, داچنايا سياقتى اتاۋى ەسكىرىپ كەتكەن كوشەلەر مەن درۋجبا اۋىلىنداعى, سونداي-اق «تەكستيلششيك» ساياباعىنداعى جەكە تۇرعىن ۇيلەردە 1,5 مىڭنان استام ادام تۇرىپ جاتىر. مۇنىڭ سىرتىندا, جەر استىنداعى سۋدىڭ دەڭگەيى كوتەرىلسە, 2-قوستاناي شاعىن اۋدانىنداعى ۇيلەردىڭ استىنان دا سۋ شىعۋى ابدەن مۇمكىن.
ءبىر ايلىق قاۋىپسىزدىك شارالارىنا ۆولونتەرلەر دە تارتىلىپ, قاۋىپتى شاعىن اۋداندارداعى ءتۇرلى كاسىپورىندارعا دا كۇن سايىن رەيد جۇرگىزىلىپ جاتىر.
– قازىر مەردىگەر مەكەمەلەردىڭ سۋ سوراتىن تەحنيكالارىنىڭ دايىندىعى مەن ينەرتتى ماتەريالدارىنىڭ جەتكىلىكتى ەكەندىگىنە كوز جەتكىزۋ ماقساتىندا تەكسەرۋ ءجۇرىپ جاتىر. قار شىعارۋعا ارنالعان پوليگونداردىڭ جاعدايى, گيدروتەحنيكالىق قۇرىلىستاردىڭ جارامدىلىعى تەكسەرىلەدى. بيىل سۋ باسۋ قاۋپى اسا جوعارى ەمەس, دەگەنمەن جاعدايدى الدىن الا باقىلاپ, قاۋىپسىزدىك شارالارىن ەرتەرەك قامداپ قويماسا بولمايدى, – دەدى قالا اكىمدىگىنە قاراستى ازاماتتىق قورعانىس ءبولىمىنىڭ ينسپەكتورى قانات قايىبجانوۆ.
ءبولىم ينسپەكتورىنىڭ ايتۋىنشا, قوستاناي كوكتەمگى سۋ تاسقىنىنا دايىن. قىزىل سۋعا قارسى شارالارعا جۇمىلدىرىلاتىن مەردىگەر مەكەمەلەر بۇگىنگە دەيىن 1 600 توننا ينەرتتى ماتەريال, 6 500 قۇم تولتىرىلعان قاپ جانە 7,3 توننا جانارماي دايىنداپ قويعان. قوستانايدىڭ سىرتىنداعى پوليگوندارعا 350 مىڭ تەكشە مەتر قار شىعارىلعان.
سونىمەن قاتار قالانىڭ وڭتۇستىگىندەگى 7, 8, 9-شاعىن اۋداندارداعى, 2-قوستانايداعى, باتىس, اەروپورت شاعىن اۋداندارىنداعى جانە قالا شەتىندەگى وندىرىستىك كاسىپورىنداردىڭ ماڭايى مەن درۋجبا اۋىلىنداعى سۋ ارنالارىن تازارتۋ جۇمىستارى قىزىپ جاتىر.
– سۋ تاسقىنى كەزەڭى باستالعانشا ۇزىندىعى 95 شاقىرىم بولاتىن 335 سۋ ارناسى مەن كارىزدەر تازارتىلادى. كوكتەمگى سۋ تاسقىنىنا دايىندىق ءالى دە جالعاساتىن بولادى, – دەدى قوستاناي قالالىق تجب باستىعى, ازاماتتىق قورعانىس پولكوۆنيگى الماس تولەندين.
«قازگيدرومەت» رمك وبلىستىق فيليالىنىڭ مالىمەتى بويىنشا, بيىل وڭىردەگى قار قاباتىنىڭ قالىڭدىعى 28 سم بولادى. ماماندار قاردىڭ قۇرامىنداعى سۋ مولشەرى 85 مم ەكەنىن انىقتاپ وتىر.
قوستاناي
