عىلىمدى دامىتۋعا مەملەكەت تاراپىنان جاسالىپ وتىرعان قامقورلىق جاس عالىمداردىڭ سانىنىڭ ارتۋىنا جانە عىلىمي ىزدەنىستەردە دارىندى جاستاردىڭ زياتكەرلىك الەۋەتىن كەڭىنەن پايدالانۋعا مۇمكىندىك بەرەدى. ونىڭ دالەلى, بيىل ەلىمىزدىڭ 500 عالىمى الەمنىڭ ەڭ ۇزدىك عىلىمي ورتالىقتارى مەن جوعارى وقۋ ورىندارىندا «بولاشاق» باعدارلاماسى بويىنشا عىلىمي تاعىلىمدامادان وتۋگە مۇمكىندىك الدى. سولاردىڭ قاتارىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنەن 14 عالىمنىڭ بولۋى – پروفەسسور-وقىتۋشىلار قۇرامىنىڭ عىلىمي الەۋەتىنىڭ جوعارى ەكەندىگىنە دالەل بولا الادى. بۇل ءبىر جاعىنان مەملەكەت تاراپىنان ءبىلىم مەن عىلىمعا دەگەن قولداۋدىڭ ەرەكشە ەكەنىن كورسەتەدى.
جوعارى بىلىكتى كادرلار دايارلاۋداعى سونى سەرپىلىس – عىلىمي-زەرتتەۋ ينستيتۋتتارى مەن جوعارى وقۋ ورىندارىنىڭ ينتەگراتسياسىن ءتيىمدى ەتۋ جولىندا ءبىلىم جانە عىلىم ءمينيسترى اسحات ايماعامبەتوۆتىڭ باستاماسىمەن قابىلدانعان بىرقاتار ماڭىزدى شارالار دەر ەدىك. ۇسىنىلعان شارالاردىڭ باستى ارتىقشىلىعى – عزي مەن ۋنيۆەرسيتەتتەردىڭ كادرلىق, ماتەريالدى-تەحنيكالىق, زياتكەرلىك الەۋەتىن ساپالى مامان دايارلاۋدا بارىنشا بىرلەسىپ پايدالانۋعا جاعداي جاساۋى. مۇنداي ينتەگراتسيا جوعارى وقۋ ورنى جۇيەسىنىڭ ستۋدەنتتەرگە ءبىلىم بەرىپ قانا قويماي, ولاردىڭ مۇمكىندىكتەرىن عىلىمي سالادا ىسكە اسىرۋىنا ىقپال ەتۋ, عىلىمي-زەرتتەۋ ينستيتۋتتارىمەن بىرگە ءبىلىم بەرۋ باعدارلامالارىن ازىرلەۋ, ديسسەرتاتسيالىق كەڭەس جۇمىسىن بىرلەسە جۇرگىزۋگە قول جەتكىزەدى. ۋنيۆەرسيتەتتىڭ فيلولوگيا جانە كوپتىلدى ءبىلىم بەرۋ ينستيتۋتى وسى رەتتە ا.بايتۇرسىنوۆ اتىنداعى ءتىل ءبىلىمى ينستيتۋتىمەن, م.اۋەزوۆ اتىنداعى ادەبيەت جانە ونەر ينستيتۋتىمەن ينتەگراتسيالىق ىنتىماقتاستىق جاساۋ جولىندا جان-جاقتى جۇمىس اتقارۋدا.
اباي ۋنيۆەرسيتەتىنىڭ كوممەرتسيالىق ەمەس اكتسيونەرلىك قوعام نىسانىنا ءوتۋى اكادەميالىق ەركىندىك الۋعا مۇمكىندىك بەردى. وتكەن جىلدىڭ اياعىندا اباي ۋنيۆەرسيتەتىنىڭ 2022-2025 جىلدارعا ارنالعان جاڭا دامۋ ستراتەگياسى تانىستىرىلىپ, كەلەشەكتەگى مىندەتتەر مەن دامۋ باسىمدىقتارى: اكادەميالىق ارتىقشىلىق, پەداگوگيكالىق زەرتتەۋ ۋنيۆەرسيتەتىنە ترانسفورماتسيالانۋ, وقىتۋ ادىستەمەسى, وقىتۋ تەحنولوگيالارىنداعى يننوۆاتسيا, «ۇيدەگى ينتەرناتسيونالداندىرۋ», مەكتەپتەرمەن ىنتىماقتاستىق ورناتۋ, وقىتۋدىڭ تسيفرلى ەكوجۇيەسىن قۇرۋ, جۇمىس بەرۋشىلەردىڭ جاس مامانداردى كاسىبي دايىنداۋعا قاتىسۋىن قامتاماسىز ەتۋ جانە تاعى باسقا سالالارداعى پەرسپەكتيۆالىق قۇزىرەتتىلىكتەر ايقىندالدى.
وسىعان سايكەس ينستيتۋتتا ءبىلىم بەرۋ باعدارلامالارىن دايىنداۋدا جۇمىس بەرۋشىلەردىڭ تالاپتارى ەسەپكە الىنىپ, پراكتيكاعا باعدارلانعان مامانداردى دايىنداۋ جولعا قويىلدى. ايتالىق, قازىرگى تاڭدا دۋالدى وقىتۋدىڭ تالاپتارىنا سايكەس 4-كۋرس ستۋدەنتتەرى كاسىبي بىلىكتىلىگىن شىڭداۋ ءۇشىن مەكتەپتەردە 1 جىل بويى تاجىريبەدەن وتەدى. وسىلايشا, ءبىلىم الۋشىلار وقۋدان قول ۇزبەي, ياعني ۋنيۆەرسيتەتتە اپتاسىنا ەكى كۇن وقىپ, قالعان كۇندەرىن مەكتەپتە وتكىزىپ, بولاشاقتا ساپالى جانە تابىستى جۇمىس ىستەۋى ءۇشىن بارلىق قاجەتتى قۇزىرەتتەرگە يە بولا الادى. سونىمەن بىرگە جەكەلەگەن پاندەر بويىنشا تەوريالىق جانە پراكتيكالىق ساباقتاردى عىلىمي-زەرتتەۋ ينستيتۋتتارىندا, ءتىل ۇيرەتۋ ورتالىقتارىندا وتكىزۋ قولعا الىنباق, بۇل كەيىن تۇلەكتەردىڭ وسى مەكەمەلەردە جۇمىسقا ورنالاسۋىنا مۇمكىندىك بەرەدى.
قازىر ينستيتۋت باكالاۆرياتتىڭ 15, ماگيستراتۋرانىڭ 13 جانە دوكتورانتۋرانىڭ 10 ءبىلىم بەرۋ باعدارلاماسى بويىنشا ماماندار دايارلايدى. ينستيتۋت الەمنىڭ 20-دان اسا ەلىنىڭ جەتەكشى ۋنيۆەرسيتەتتەرى جانە ۇيىمدارىمەن ارىپتەستىك بايلانىس ورناتقان, 2012 جىلدان بەرى «ورىس ءتىلى مەن ادەبيەتى» ماماندىعى بويىنشا قوس ديپلوم بەرۋ باعدارلاماسىن پولشانىڭ سلۋپسك قالاسىنداعى پومورسك اكادەمياسىمەن بىرگە ءساتتى جۇزەگە اسىرىپ كەلەدى. ستراتەگيالىق دامۋ جوسپارىنا سايكەس الداعى ۋاقىتتا ينستيتۋتتىڭ باسقا دا ءبىلىم بەرۋ باعدارلامالارى بويىنشا اۋستريا, بولگاريا, رەسەي, ەستونيا, تۇركيانىڭ جەتەكشى جوعارى وقۋ ورىندارىمەن قوس ديپلومدىق ءبىلىم بەرۋدى جۇزەگە اسىرۋ مىندەتى قويىلدى.
ستۋدەنتتەردىڭ الەۋمەتتىك, ازاماتتىق بەلسەندىلىگىن دامىتۋ – كۇن تارتىبىندەگى ماڭىزدى ماسەلەنىڭ ءبىرى. بىلتىر ءبىلىم الۋشىلاردىڭ عىلىمي-شىعارماشىلىق قابىلەتتەرىن دامىتۋ بارىسىندا ينستيتۋتتاعى جاستار ورتالىقتارى مەن كلۋبتارىنىڭ جۇمىسى وزەكتەندىرىلدى. ناتيجەسىندە, ستۋدەنتكە شوعىرلاندىرىلعان وقىتۋ مەن تاربيە نەگىزىندە ەڭ الدىمەن, قازىرگى ستۋدەنت جاستاردىڭ قىزىعۋشىلىعى مەن تالاپ-تىلەكتەرى ەسكەرىلىپ, «كۇلتەگىن» ستۋدەنتتىك شىعارماشىلىق بىرلەستىگى قۇرىلدى. ونىڭ قۇرامىنا ەنگەن «ۇركەر» ستۋدەنتتەر تەاترى, اbaimusic كلۋبى, QALAMGER جاس جۋرناليستەر كلۋبى, ABAImedia ورتالىعى, «ابادان» سپورت كلۋبى, «ايداي» بي كلۋبىن دارىندى ستۋدەنت جاستاردىڭ وزدەرى باسقارىپ, جۇمىس ىستەۋدە. مينيسترلىك تاراپىنان الداعى ۋاقىتتا ستۋدەنتتەردىڭ وقۋ سالاسىنداعى جەتىستىكتەرىن عانا ەمەس, سونىمەن بىرگە ينتەگراتسيالانعان الەۋمەتتىك GPA بالى, ياعني قوعامدىق جانە ۆولونتەرلىك جۇمىستارعا قاتىسۋ دەڭگەيىن ەسەپكە الۋ جۇيەسىن ەنگىزۋدىڭ تەتىكتەرى قاراستىرىلىپ جاتقانى قۋانتىپ وتىر. سەبەبى تەرەڭ ءبىلىمى, جوعارى كاسىبي بىلىكتىلىگىمەن قوسا, جالپىادامزاتتىق جانە رۋحاني قۇندىلىقتاردى بويىنا سىڭىرگەن, ازاماتتىق ۇستانىمى جوعارى, بەلسەندى ماماننىڭ قوعامعا, ەلدىڭ دامۋى مەن وركەندەۋىنە تيگىزەر پايداسى كوبىرەك ەكەنىن جاقسى تۇسىنەمىز.
قورىتا ايتقاندا, جاھاندانۋ ءۇردىسى قارقىن العان زاماندا جوعارى ءبىلىم بەرۋ مەن عىلىم سالاسىنداعى دامۋدىڭ يننوۆاتسيالىق باعىتتارى ءوز جەمىسىن بەرۋدە. الداعى ۋاقىتتا ءبىلىم جانە عىلىم مينيسترلىگى تاراپىنان ايقىندالعان مىندەتتەردى ىسكە اسىرۋ جولىندا بارلىق الەۋەتتى جۇمىلدىرۋ – ساپالى كادرلار دايارلاۋدىڭ نەگىزى بولاتىنى انىق.
الۋا تاڭجارىقوۆا,
اباي اتىنداعى قازۇپۋ
فيلولوگيا جانە كوپتىلدى ءبىلىم بەرۋ ينستيتۋتىنىڭ ديرەكتورى,
فيلولوگيا عىلىمدارىنىڭ دوكتورى
