بىلىكتى ماماندار ۇجىمى باس سۇيەكتەگى ىسىكتى الىپ تاستاۋ ۇشىن جەتى ساعات بويى اشىق تۇردە وتا جاساپ, ناۋقاستى اجالدان اراشالاپ العان.
ناۋقاس 16 جاستاعى ءجاسوسپىرىم قىز. ول وسى جىلدىڭ 15 اقپاندا وتكەن قالالىق كلينيكالىق بالالار اۋرۋحاناسىنىڭ «اشىق ەسىك كۇنى» ونكوگەماتولوگتىڭ قابىلداۋىندا بولعان. دارىگەرلەر قىزدى شۇعىل تۇردە اۋرۋحانانىڭ جانساقتاۋ بولىمىنە جاتقىزعان.
دارىگەرلەر اۋىر حالدەگى ناۋقاستىڭ جاعدايىن تۇراقتاندىرىپ, دياگنوستيكالىق تەكسەرۋدەن تولىق وتكىزگەن. ماماندار ءجاسوسپىرىمنىڭ ءومىرىن امان الىپ قالۋ ءۇشىن كۇردەلى وتا جاساۋعا شەشىم قابىلدادى.
كۇردەلى وتانى جوعارى ساناتتتاعى نەيروحيرۋرگ سامات كوكشيباەۆ پەن تاڭسىق ابدۋللاەۆ ءساتتى جاساپ شىقتى.
نەيروحيرۋرگتىڭ ايتۋىنشا, باس سۇيەككە جاسالعان وتا جاڭادان الىنعان قوندىرعىنىڭ كومەگىمەن جۇزەگە اسقان.
«ناۋقاس ونكولوگ پەن نەيروحيۋرگ دارىگەرلەرىنىڭ قاراۋىندا بولدى. وعان 17 اقپان كۇنى وتا جاسادىق. مۇنداي وتا قالالىق كلينيكالىق بالالار اۋرۋحاناسىندا العاش رەت ءوتتى. اۋرۋحاناعا جەرگىلىكتى بيۋدجەت ەسەبىنەن جاڭا ميكروحيۋرگيالىق اپپاراتى الىنعان بولاتىن. وتا كەزىندە وسى قوندىرعىنى قولداندىق. ەندى وسى اپپاراتتىڭ كومەگىمەن كۇردەلى وتالاردى جاساپ, ناۋقاس بالالاردىڭ ءومىرىن امان الىپ قالۋعا بارىمىزدى سالامىز», دەدى س.كوكشيباەۆ.
قازىر ناۋقاستىڭ جاعدايى قالىپتى. ەندى ول اۋرۋحاناداعى ەمىن ونكوحيرۋرگتىڭ باقىلاۋىندا جالعاستىرادى.
