ەرنار ءجاڭادىل «سامۇرىق-قازىنا» اق دامۋ جانە جەكەشەلەندىرۋ جونىندەگى باسقارۋشى ديرەكتورى قىزمەتىنە تاعايىندالدى. ءبىرىنشى كەزەكتە ول «قازمۇنايگاز «ۇك» اق جانە «ەير استانا» اق كومپانيالارىنىڭ قورىنا تيەسىلى جەكەشەلەندىرۋ باعدارلاماسىنا جاۋاپ بەرەتىن بولادى. جاقىن ارادا بۇل اكتيۆتەردى IPO-عا شىعارۋ جوسپارلانىپ وتىر, وعان قازاقستاننىڭ بارلىق تۇرعىندارى قول جەتكىزە الادى.
«ەرنار ءجاڭادىلدىڭ الدىنا ەلگە شەتەلدىك ينۆەستيتسيالاردى تارتۋدى جالعاستىرۋ مىندەتى قويىلدى. ەرنار بەيسەن ۇلى وسى ۋاقىتقا دەيىن ينۆەستيتسيالار, جەكەشەلەندىرۋ جانە حالىقارالىق ىنتىماقتاستىق جونىندەگى باسقارۋشى ديرەكتور قىزمەتىن اتقاردى. 2018 جىلى «قازاتومونەركاسىپ «ۇاك» اق-نىڭ IPO-عا, سودان كەيىن SPO-عا تابىستى شىعۋىنا بەلسەنە قاتىستى. 2021 جىلى ول قوردىڭ بىرقاتار بەيىندى ەمەس اكتيۆتەردەن ءتيىمدى شىعۋىن قامتاماسىز ەتتى. «سامۇرىق-قازىنا» اق-نا قىزمەتكە تۇرعانعا دەيىن ەرنار ءجاڭادىل Pricewaterhouse Coopers LLP اق-دا جۇمىس ىستەدى. بۋحگالتەرلىك ەسەپ جانە قارجى سالاسىندا ماگيستر دارەجەسى بار (مانچەستەر ۋنيۆەرسيتەتى, ۇلىبريتانيا). پرەزيدەنتتىك جاستار كادرلىق رەزەرۆىنىڭ مۇشەسى», دەلىنگەن حابارلامادا.
قوردىڭ ستراتەگيا جانە اكتيۆتەردى باسقارۋ جونىندەگى باسقارۋشى ديرەكتورى لاۋازىمىنا ەرنات بەردىعۇلوۆ تاعايىندالدى. ونىڭ الدىنا قويىلعان نەگىزگى مىندەت - بۇل قوردىڭ ۇزاق مەرزىمدى دامۋ ستراتەگياسىن ازىرلەۋ جانە ىسكە اسىرۋ, اكتيۆتەردى ءتيىمدى باسقارۋ جانە ينفراقۇرىلىمدىق جوبالاردى ۋاقتىلى ىسكە اسىرۋ. ورنىقتى دامۋدى قامتاماسىز ەتۋ, پورتفەلدىك كومپانيالار قىزمەتىنە كورپوراتيۆتىك باسقارۋدىڭ ERP-قاعيداتتارى مەن وزىق تاسىلدەرىن ەنگىزۋ ينۆەستيتسيالىق تارتىمدىلىقتى ارتتىرۋعا جانە ۇزاق مەرزىمدى قۇننىڭ ءوسۋىن قامتاماسىز ەتۋگە مۇمكىندىك بەرەدى.
«ەرنات قۇدايبەرگەن ۇلى قوردا ستراتەگيا, تۇراقتى دامۋ جانە تسيفرلىق ترانسفورماتسيا جونىندەگى باسقارۋشى ديرەكتور لاۋازىمىن اتقارعان بولاتىن. ەرنات بەردىعۇلوۆتىڭ حالىقارالىق كونسالتينگتىك كومپانيالاردا ون جىلدان استام جۇمىس تاجىريبەسى بار. ىسكەرلىك اكىمشىلىك سالاسىنىڭ ماگيسترى (MBA, University of Warwick, ۇلىبريتانيا), «بولاشاق» باعدارلاماسى بويىنشا باكالاۆر بىتىرگەن (University of Toronto, كانادا). پرەزيدەنتتىك جاستار كادرلىق رەزەرۆىنىڭ مۇشەسى», دەدى «سامۇرىق-قازىنا» اق ءباسپاسوز قىزمەتى وكىلدەرى.
«سامۇرىق-قازىنا» اق قوعاممەن بايلانىس جانە وزگەرىستەردى باسقارۋ جونىندەگى باسقارۋشى ديرەكتور لاۋازىمىنا عيبرات اۋعانوۆ تاعايىندالدى. عيبرات قايرات ۇلىنىڭ جاۋاپكەرشىلىگىنە ءۇش دەپارتامەنت كىرەدى: الەۋمەتتىك-ەڭبەك قاتىناستارى جانە ادام رەسۋرستارىن باسقارۋ دەپارتامەنتى, وزگەرىستەردى باسقارۋ دەپارتامەنتى جانە جۇرتشىلىقپەن بايلانىس دەپارتامەنتى.
«العا قويىلعان مىندەتتەرگە سايكەس جاڭا اشىق كادر ساياساتىن ەنگىزۋ, ينكليۋزيۆتىلىك پەن اشىقتىق دەڭگەيىن ارتتىرۋ مىندەتى تۇر. بۇدان باسقا, تسيفرلاندىرۋ شەڭبەرىندە IT-تەحنولوگيالار مەن اۋقىمدى دەرەكتەردى تالداۋ بازاسىندا وندىرىستىك جانە باسقارۋ پروتسەستەرىن قايتا قۇرۋ قاجەت بولادى. سونداي-اق, قوردىڭ جۇرتشىلىقپەن قارىم-قاتىناستارىن قايتا جۇكتەۋ شەڭبەرىندە كومپانيانىڭ قىزمەتى تۋرالى اشىقتىقتى جانە باق-تىڭ كاسىبي قوعامداستىعىن حاباردار ەتۋدى قامتاماسىز ەتۋ قاجەت. وسى جانە باسقا دا بىرقاتار وزگەرىستەر كومپانيا قىزمەتىنىڭ قوعام ءۇشىن اشىقتىعى مەن ايقىندىعىن قامتاماسىز ەتۋگە, ادامي فاكتوردى, اسىرەسە سىبايلاس جەمقورلىق قاۋىپتى سەكتورلاردى بارىنشا جويۋعا باعىتتالعان», دەپ اتاپ ءوتتى قوردا.
بۇعان دەيىن اۋعانوۆ «سامۇرىق-قازىنا» اق ادام رەسۋرستارىن باسقارۋ دەپارتامەنتىنىڭ ديرەكتورى قىزمەتىن اتقارعان. پرەزيدەنتتىك جاستار كادرلىق رەزەرۆىنىڭ مۇشەسى.
نيكولاي كازۋتين قوردىڭ قۇقىقتىق قولداۋ, قامتاماسىز ەتۋ جانە تاۋەكەلدەر جونىندەگى باسقارۋشى ديرەكتورى بولىپ تاعايىندالدى. قۇقىقتىق سالانىڭ اعىمداعى ماسەلەلەرىنەن باسقا, ول وتاندىق تاۋار وندىرۋشىلەر مەن شاعىن جانە ورتا بيزنەستى قولداۋ ءۇشىن قوردىڭ ساتىپ الۋ پروتسەسىندە اشىقتىقتى قامتاماسىز ەتۋ ماقساتىندا ساتىپ الۋ بويىنشا قولدانىستاعى كورپوراتيۆتىك قۇجاتتاردى وزگەرتۋگە, سونداي-اق قوردا جۇرگىزىلىپ جاتقان رەفورمالاردى قۇقىقتىق قامتاماسىز ەتۋگە جانە حالىقارالىق تورەلىكتەردە قوردىڭ مۇددەلەرىن ءتيىمدى قورعاۋعا جاۋاپ بەرەدى.
«سامۇرىق-قازىنا» اق ينۆەستيتسيالار جونىندەگى دەپارتامەنتىنىڭ ديرەكتورى لاۋازىمىنا بۇرىن قوردىڭ ينۆەستيتسيالار جونىندەگى دەپارتامەنتىنىڭ جوبالاردى قۇرىلىمداۋ سەكتورىنىڭ باسشىسى قىزمەتىن اتقارعان سابيعات راحمەتوۆ تاعايىندالدى. قوعاممەن بايلانىس دەپارتامەنتىنىڭ ديرەكتورى لاۋازىمىنا دامير ەگىزباەۆ تاعايىندالدى. بۇعان دەيىن ول اۋىل شارۋاشىلىعى مينيسترلىگىنىڭ ءباسپاسوز حاتشىسى, سونداي-اق ۇەم «قازاقستاندىق ءمجا ورتالىعى» اق كوممۋنيكاتسيالار جونىندەگى ديرەكتورى لاۋازىمىن اتقارعان بولاتىن.
