ءىس-شاراعا الەۋمەتتىك دامۋ جونىندەگى پرورەكتور شىڭعىس نۇرلانوۆ جانە اكادەميالىق ماسەلەلەر جونىندەگى دەپارتامەنت ديرەكتورى حايرۋللا جانبەكوۆ قاتىستى. كەزدەسۋ ونلاين جانە وفلاين فورماتتا ءوتتى. كارانتين شارالارىنا بايلانىستى 200-دەن استام ستۋدەنت ZOOM پلاتفورماسى ارقىلى قاتىستى.
دارحان ءبىلالوۆ ءبىلىم الۋشىلاردى تاربيەلەۋ جانە دامىتۋ بويىنشا جۇمىستا ۋنيۆەرسيتەت پەن ينستيتۋتتار باسشىلىعىنىڭ تىرەگى بولىپ تابىلاتىن ستۋدەنتتىك اكتيۆپەن وسىنداي كەزدەسۋلەردىڭ ماڭىزدىلىعىن اتاپ ءوتتى. سونداي-اق, ستۋدەنتتەردىڭ تۇرمىس جاعدايىن ءبىلۋ ءۇشىن جاتاقحانالاردى ارالاپ, ونداعى ستۋدەنتتەرمەن كەزدەسكەندىگىن, ۋنيۆەرسيتەتتە جۇرگىزىلىپ جاتقان جۇمىستاردىڭ ناتيجەسى ستۋدەنتتەر ارقىلى باعالاناتىندىعىن ءسوز ەتتى. سوندىقتان الداعى ۋاقىتتا دا ستۋدەنتتەرمەن ءجيى كەزدەسىپ, بارلىق ساۋالدارى مەن ۇسىنىستارىن تىڭداۋعا دايىن ەكەندىگىن ايتتى.
ستۋدەنتتەردىڭ سۇراقتارىنا جاۋاپ بەرگەن رەكتور زاماناۋي ستۋدەنتتەردىڭ ءبىلىم بەرۋ سالاسىنداعى تەحنولوگيالاردى مەڭگەرۋدەگى مۇمكىندىكتەرىن ايتىپ, وقۋ ۇدەرىسىندە قولدانىلاتىن پلاتفورمالاردىڭ ەرەكشەلىكتەرىنە توقتالدى. ۋنيۆەرسيتەتتىڭ ينفراقۇرىلىمدىق جانە تەحنيكالىق وقۋ قۇرىلعىلارىمەن قامتاماسىز ەتىلۋ ماسەلەلەرى كەزەڭ-كەزەڭىمەن شەشىلىپ جاتقاندىعىن, ماسەلەنى تولىق شەشۋ قاراجات پەن ۋاقىتتى قاجەت ەتەتىندىگىن ءتۇسىندىردى. بۇل رەتتە, ارينە, اكادەميالىق پروتسەستەرگە باسىمدىق بەرىلەدى دەدى.
رەكتور دارحان ءبىلالوۆ پەداگوگتىڭ ءرولى مەن ونىڭ مارتەبەسى تۋرالى ستۋدەنتتەردىڭ ەسىنە سالدى. «بۇگىندە پەداگوگ قىزمەتىنىڭ ماڭىزدىلىعى جانە ونىڭ ەل مەن وسكەلەڭ ۇرپاق الدىنداعى جاۋاپكەرشىلىگى ايتارلىقتاي ارتتى. سوندىقتان سىزدەر جاڭا ءبىلىم مەن داعدىلاردى يگەرىپ, ولاردى ۇنەمى جەتىلدىرىپ وتىرۋلارىڭىز كەرەك. بۇل سىزدەردىڭ بولاشاقتارىڭىز ءۇشىن ماڭىزدى. بولاشاق پەداگوگ رەتىندە ستۋدەنتتەر قازىردىڭ وزىندە ءوز الدىنا كاسىبي جاۋاپكەرشىلىكتى ارتتىرۋ مىندەتىن قويا ءبىلۋى كەرەك», دەدى رەكتور.
شىڭعىس نۇرلان ۇلى جاتاقحاناعا قاتىستى ساۋالدارعا جاۋاپ بەرە وتىرىپ, ۋنيۆەرسيتەتتە ءبىلىم ساپاسىن ارتتىرۋ, ءبىلىم سالاسىنا وزگەرىس ەنگىزۋ ماقساتىندا قولعا الىنىپ جاتقان جوبالاردىڭ بىرىنە توقتالدى. بۇل جوبا الەمنىڭ كوپتەگەن جوعارى وقۋ ورىندارىندا جۇيەلى قولدانىلىپ جۇرگەن Honors College جوباسى. جوبانىڭ ماقساتى – پەداگوگيكالىق ماماندىقتار بويىنشا وقيتىن دارىندى ستۋدەنتتەرگە تەرەڭ بىلىممەن قاتار داعدىلاردى بەرۋ. ول ءۇشىن ەموتسيونالدى ينتەللەكت, كريتەريالدى باعالاۋ جۇيەسى, ءبىلىم الۋشىلاردىڭ, اسىرەسە مامانداندىرىلعان مەكتەپتەردە (نزم, رفمم, بيل, BINOM جانە ت.ب.) زەرتتەۋ داعدىلارىن دامىتۋ سىندى باعىتتار بويىنشا دارىندى ستۋدەنتتەر قاتارى جاساقتالىپ, سەرتيفيكاتتالعان وقىتۋ باعدارلامالارى ەنگىزىلەدى.
ء«بىز ەلىمىزدەگى ەڭ ۇزدىك پەداگوگيكالىق جوعارى وقۋ ورنى بولعاندىقتان, دارىندى ستۋدەنتتەرىمىزدى مامانداندىرىلعان جەتەكشى مەكتەپتەرگە پراكتيكاعا جىبەرەتىن بولامىز. ول ءۇشىن اتالمىش جوبا اياسىندا جاڭا يننوۆاتسيالىق ءبىلىم بەرۋ باعدارلامالارىن ازىرلەپ, ءبىلىم الۋشىلاردىڭ ءبىلىمىن جان-جاقتى جەتىلدىرەمىز», دەدى پرورەكتور.
دەپارتامەنت ديرەكتورى حايرۋللا جانبەكوۆ وقۋ ۇدەرىسى مەن وقۋ فورماتى, اۋىسۋ, اكادەميالىق ۇتقىرلىققا قاتىستى ءجيى قويىلاتىن سۇراقتارعا جان-جاقتى جاۋاپ بەردى.
Town Hall فورماتىنداعى كەزدەسۋ بەيرەسمي بولعاندىقتان, قاتىسۋشىلار ادەتتە, ءوز يدەيالارى مەن پىكىرلەرىن, ۇسىنىستارىن ەركىن ءبىلدىرىپ, سۇراقتار قويادى. وسىنداي كەزدەسۋلەردىڭ ارقاسىندا ۋنيۆەرسيتەت الدىندا تۇرعان وزەكتى ماسەلەلەر بويىنشا ءوز پىكىرلەرىن قالىپتاستىرا الاتىن ءبىلىم الۋشىلاردىڭ, پروفەسسور-وقىتۋشىلار مەن قىزمەتكەرلەردىڭ سانى ارتادى.
كەزدەسۋ سوڭىندا رەكتور دارحان ءبىلالوۆ ستۋدەنتتەردىڭ سۇراقتارى مەن ۇسىنىستارىن تالقىلاپ, كوتەرىلگەن ماسەلەلەردىڭ شەشىلۋى باقىلاۋدا بولاتىنىن ايتىپ, جاۋاپتى تۇلعالارعا ناقتى تاپسىرمالار بەردى.
الماتى
