Ekin patrol دەپ اتالاتىن جاڭا قۇرىلعى ءارى اينالاسىنا «مەن كەلە جاتىرمىن» دەپ بەلگى بەرەتىن جارقىلداتقىش, ءارى توڭىرەكتى 360 گرادۋسقا دەيىن شولىپ, وزىنەن 70 مەترگە دەيىنگى قاشىقتاعى اۆتوكولىكتىڭ ءنومىرىن جازىپ الاتىن 10 كامەرالى «اقىلدى» قوندىرعى.
قوستاناي وبلىسى مۇنداي قۇرىلعىنىڭ التاۋىن ساتىپ الىپ وتىر, باعاسى قىمباتتاۋ, بىرەۋىنىڭ ءوزى 35 ملن تەڭگە تۇرادى. قازىر Ekin patrol ورناتىلعان ءتورت پاترۋل كولىگى قوستانايدا, ەكەۋى رۋدنىيدا جول ءتارتىبىن باقىلاپ ءجۇر.
جاڭا باقىلاۋ جۇيەسى بۇعان دەيىن ەكى اي ۋاقىت سىناقتان وتكەن. سىناق مەرزىمىنىڭ سوڭعى ەكى كۇنى ىشىندە پوليتسيا Ekin patrol كومەگىمەن 100-دەن استام جول قوزعالىسى ەرەجەسىن بۇزعانداردى انىقتاپ, ىزدەۋدە جۇرگەن 20 اۆتوكولىكتى تاپقان. تەستىلەۋ كەزەڭى بولعاندىقتان ەشكىمگە ايىپپۇل سالىنباپتى. الايدا ەندى اۆتوكولىك جۇرگىزۋشىلەردىڭ جولدا ابايلاپ قوزعالۋىنا تۋرا كەلەدى.
Ekin patrol بۇگىندە قاراعاندى مەن كوكشەتاۋ كوشەلەرىندە دە ءجۇر. تۇركيادا جاسالعان قۇرىلعىنى قوستانايعا قاراعاندىنىڭ «Gorus» فيرماسى جەتكىزىپتى. كومپانيا ينجەنەرى ۆيتالي وكارسكيدىڭ سوزىنە سەنسەك, كولىك ۇستىندەگى «اقىلدى» كامەرالار اۆتوماتتى رەجىمدە جانە ناقتى ۋاقىت رەجىمىندە بىردەي جۇمىس ىستەيدى. جول ءتارتىبىنىڭ بۇزىلعانى تۋرالى مالىمەتتەردىڭ ءبارىن ادامنىڭ قاتىسۋىنسىز دەرەكقورعا جىبەرىپ وتىرادى.
– باقىلاۋ جۇيەسى الدى-ارتىنداعى جىلدامدىق مولشەرىن اسىرعان ماشينالاردى جازىپ الىپ وتىرادى جانە ىزدەۋدەگى اۆتوكولىكتەردى انىقتايدى. رادارى 120 مەترگە دەيىنگى راديۋستا جۇمىس ىستەيدى. سونداي-اق 70 مەترگە دەيىنگى كولىكتەردى انىق كورە الادى, – دەدى ۆ.وكارسكي.
اكىمشىلىك پوليتسيا باسقارماسىنا قاراستى اۆتوماتتاندىرۋ جانە ەلەكتروندى قىزمەت كورسەتۋ توبىنىڭ ينسپەكتورى باۋىرجان نۇعىمانوۆتىڭ ايتۋىنشا, جاڭا پاترۋل جول بويىندا دۇرىس تۇرماعان ماشينانى دا, جولداعى جولاقتان اسىپ كەتكەن نەمەسە قىزىل بەلگىگە ءوتىپ كەتكەن اۆتوكولىكتەردى دە ءتۇسىرىپ الادى. جىلجىمالى باقىلاۋ جۇيەسىنىڭ باسقا كامەرالاردان باستى ەرەكشەلىگى – قالانىڭ كەز كەلگەن كوشەسىندە تاۋلىگىنە 7 ساعات بويى كەزەكشىلىك ەتەدى.
ۆيتالي وكارسكي قۇرىلعى قىمبات بولعانىمەن, قۇنىن تەز وتەپ الادى دەيدى. ەڭ باستىسى, ەندى جول ەرەجەسىن بۇزاتىندار ازايادى. ويتكەنى كولىك جۇرگىزۋشىلەردىڭ كوبى جول بويىندا, ءبىر ورىندا ءىلىنىپ تۇرعان كامەرالاردىڭ ماڭىندا عانا ەرەجە ساقتايدى, ال جىلجىمالى كامەرا كەز كەلگەن جەردە ابايلاپ, ەرەجە ساقتاپ جۇرۋگە ۇيرەتەدى.
قوستاناي وبلىسى
