مينيسترلەر كابينەتى باسشىسىنىڭ حابارلاۋىنشا, قازىرگى ۋاقىتتا ارنايى حالىقتىڭ تابىسىن ارتتىرۋ باعدارلاماسى ازىرلەنىپ جاتىر. ونىڭ اياسىندا كىرىستەردەگى تەڭگەرىمسىزدىكتى تەڭەستىرۋ, اۋقىمدى جۇمىسپەن قامتاماسىز ەتۋ, يندۋستريالىق جانە اۋىل شارۋاشىلىعى جوبالارىن ىسكە اسىرۋ, وندىرىستەردى تەحنولوگيالىق جاڭعىرتۋ, ادامي كاپيتالدى دامىتۋ جانە ت.ب. بويىنشا شارالاردى ىسكە اسىرۋ جوسپارلانىپ وتىر.
سونىمەن قاتار ءا.سمايىلوۆتىڭ ايتۋىنشا, ەل پرەزيدەنتىنىڭ تاپسىرماسىن ورىنداۋ ماقساتىندا ۇكىمەت «سامۇرىق-قازىنا» قورىمەن بىرلەسىپ, ساتىپ الۋدى جۇزەگە اسىرۋدىڭ جاڭا ءتارتىبىنىڭ جوباسىن ازىرلەدى. بۇل ولاردىڭ اشىقتىعىن ارتتىرۋعا باعىتتالعان جانە سىبايلاس جەمقورلىق تاۋەكەلدەرىن بارىنشا ازايتادى. سونداي-اق اتالعان مەحانيزم جەرگىلىكتى وندىرۋشىلەر مەن جەتكىزۋشىلەردى قولداۋعا, ساتىپ الۋ پروتسەسىن وڭايلاتۋعا جانە بيزنەس كەدەرگىلەردى جويۋعا باعىتتالعان, سونىڭ ناتيجەسىندە, 10 مىڭ شوب سۋبەكتىسىنە كومەك كورسەتىلەدى.
«وتاندىق تاۋار وندىرۋشىلەردەن 400 ملرد تەڭگەگە 10 مىڭعا جۋىق تاۋار پوزيتسياسى ساتىپ الىنادى. بۇدان وزگە, زاڭ جۇزىندە اشىقتىقتى ارتتىرىپ, جەر قويناۋىن پايدالانۋ قۇقىعىن بەرۋ جانە كەلىسىمشارتتار تالاپتارىن وزگەرتۋ راسىمدەرىن جەڭىلدەتۋ جوسپارلانىپ وتىر», دەدى ءا.سمايىلوۆ.
پرەمەر-مينيستر بيزنەستى قولداۋ, ينۆەستيتسيالىق احۋال مەن بيزنەس-ورتانى جاقسارتۋ ماسەلەلەرىنە ەرەكشە نازار اۋداردى. اتالعان باعىتتار اياسىندا بۇگىنگى تاڭدا مەملەكەت سالىقتىق ىنتالاندىرۋلار ۇسىندى, كاسىپكەرلىك سۋبەكتىلەرىنىڭ وبليگاتسيالارىن كەپىلدەندىرۋ قۇرالدارى ازىرلەندى, مونو-شاعىن قالالاردا جانە اۋىلدىق ەلدى مەكەندەردە جەڭىلدىكتى ميكروكرەديتتەۋ ۇسىنىلۋدا.
ودان ءارى دامىتۋ شەڭبەرىندە جاڭادان قۇرىلعان وتاندىق كاسىپكەرلەر كەڭەسىمەن بىرلەسىپ, ينۆەستيتسيالىق احۋال مەن بيزنەس-ورتانى جاقسارتۋ جونىندەگى شارالار ىسكە اسىرىلاتىن بولادى. سونىمەن قاتار جەكە ينۆەستيتسيالارعا باسا كوڭىل بولىنەتىن ينۆەستيتسيالىق ساياساتتىڭ جاڭا تۇجىرىمداماسى ازىرلەندى.
سونداي-اق ول مەملەكەتتىڭ جەكەمەنشىك ينستيتۋتتىڭ بەرىكتىگىنە جانە زاڭ ۇستەمدىگىنە كەپىلدىك بەرۋىنىڭ, سونداي-اق بيزنەسكە ينفراقۇرىلىمدى تەڭ قولجەتىمدى ەتۋىنىڭ ماڭىزدىلىعىن اتاپ ءوتتى.
ءا.سمايىلوۆتىڭ ايتۋىنشا, الداعى ۋاقىتتا ۇكىمەت جۇمىسى وڭىرلەردەگى شاعىن جانە ورتا بيزنەسكە باسىمدىق بەرە وتىرىپ, مەملەكەتتىك قولداۋ شارالارىن ۇسىنۋدىڭ تيىمدىلىگى مەن اشىقتىعىن ارتتىرۋعا باعىتتالادى.
ءسوز سوڭىندا ءا.سمايىلوۆ ەلىمىزدە ەكونوميكانى قالپىنا كەلتىرۋ مەن ونى دامىتۋ درايۆەرىنە اينالاتىن جوبالار ازىرلەۋ قاجەت ەكەنىن اتاپ ءوتتى.
پرەمەر-مينيستر سەزد دەلەگاتتارىن پرەزيدەنت العا قويعان مىندەتتەردى ىسكە اسىرۋعا جانە جاقىندا قۇرىلعان ۇكىمەت جانىنداعى وتاندىق كاسىپكەرلەر كەڭەسىنىڭ جۇمىسىنا بەلسەندى ارالاسۋعا شاقىردى.
ەسكە سالا كەتەيىك, وتكەن جىلى ۆيتسە-پرەمەر رەتىندە ءا.سمايىلوۆ اپتا سايىن شاعىن جانە ورتا بيزنەستى دامىتۋ جونىندە كەڭەستەر وتكىزگەن بولاتىن. وسى كەزەڭدە قىزمەتتىڭ 18 باعىتى بويىنشا 160-تان استام شارۋاشىلىق ماسەلەلەرى قارالدى, قوزعالعان پروبلەمالاردىڭ 75%-عا جۋىعى شەشىمىن تاپتى. تاعى 250 ماسەلە بيىلعى 17 اقپاندا مەملەكەتتىك ورگاندار مەن پالاتا وكىلدەرىمەن وتكەن كەڭەستە شۇعىل تۇردە قارالدى.
