ءبىرىنشىسى – قاسىم-جومارت توقاەۆ بۇگىندە ەلدىڭ ءبارىن الاڭداتىپ وتىرعان وتكىر تاقىرىپتاردان قاشقاقتامايدى. الەۋمەتتىك جەلىدە, مەسسەندجەرلەردە, اسۇيلەردە تالقىلانىپ جۇرگەن سۇراقتاردىڭ بارىنە جاۋاپ بەرىلدى.
ەكىنشىسى – پرەزيدەنتتى الەۋمەتتىك جەلىدە سىناۋشىلار نە ايتسا دا, ول بەيبىت شەرۋشىلەر مەن تەرروريستەردىڭ, مارودەرلەردىڭ ايىرماشىلىعىن جاقسى ءبىلىپ وتىر. قۇقىق قورعاۋ ورگاندارىنىڭ زاڭعا قايشى تاسىلدەردى پايدالانۋ ماسەلەسىن دە جاقسى ءتۇسىنىپ وتىر. مەنىڭ ويىمشا, بۇل تاقىرىپقا ماي قۇيۋدى توقتاتىپ, تەرگەۋ قورىتىندىلارىن كۇتەتىن كەز كەلدى.
ءۇشىنشىسى – رەفورمالار بولادى. سۇحباتتىڭ ەڭ باستى مەسسەدجى وسى دەپ ويلايمىن. جۋرناليست سۇحباتتى قايتا-قايتا قاڭتار تاقىرىبىنا بۇرۋعا تىرىسقانىنا قاراماستان, پرەزيدەنت كەلەشەكتەگى رەفورمالار, قاڭتار وقيعاسىنىڭ ساباعى تۋرالى اڭگىمەگە ويىسىپ وتىردى.
ونىڭ پايىمىنشا, تەك قاڭتار وقيعاسىنان عانا ەمەس, جالپى كەيىنگى 30 جىلدان ۇلكەن ساباق الۋىمىز كەرەك.
ەڭ باستىسى – پرەزيدەنت راديكالدى, جىلدام شەشىمدەردى جاقتامايدى. كۇردەلى سۇراقتارعا وڭاي جاۋاپ بەرىپ قۇتىلۋعا قارسى. ودان رەۆوليۋتسيا «انىندەگىدەي» «اۋەلى وزەگىن قۇرتايىق, سودان كەيىن كورەرمىز» دەگەنگە ساياتىن ارەكەتتەر كۇتۋدىڭ, تالاپ ەتۋدىڭ تىپتەن قاجەتى جوق. بالكىم بىرەۋلەرگە ول اسىرە ساق كورىنۋى مۇمكىن. بىراق ونى اقىلمەن ارەكەت ەتىپ جاتقان جوق دەپ ەشكىم جازعىرا المايدى. بۇگىنگە دەيىن ول سىرتتاعى دا, ىشتەگى دە كۇشتەردىڭ اراسىندا تەڭگەرىم ساقتاي وتىرىپ, ساراپتالعان ساياسات ۇستانىپ كەلەدى. قازىر قازاقستانعا كەرەگى دە وسى. اقىرى نەمەن تىناتىنى بەلگىسىز ازاماتتىق قاقتىعىستارعا جول بەرۋگە بولمايدى.
ەركىن ءابىل,
تاريح عىلىمدارىنىڭ دوكتورى, مەملەكەت تاريحى ينستيتۋتىنىڭ ديرەكتورى
