ەندىگىدە وسىنداي وڭ ءۇردىستى پرەمەردەن باستاپ مينيسترلەر مەن اكىمدەر جالعاستىرعانى ابزال. ونسىز قوعامدىق كەلىسىم مەن بىرلىككە قول جەتكىزۋ مۇمكىن ەمەس.
ورىن العان قاتەلىكتەردى تۇزەتۋگە كەلگەندە مەملەكەت باسشىسى قىزبالىققا سالىنباي, كەرىسىنشە اقىلعا جۇگىنىپ ارەكەتتەنۋگە باسىمدىق بەرەتىنىن ايتتى.
ءوز باسىم بۇل ۇستانىممەن تولىق كەلىسەمىن. اينالىپ كەلگەندە گۇلدەنگەن ءارى ءادىل قوعام بۇرىنعىنى قوپارا سالۋمەن ورناسا, ءۇش رەۆوليۋتسيادان وتكەن, ءتورت پرەزيدەنتىنىڭ ۇشەۋى سوتتالعان قىرعىزستان قايدا قالدى؟ ءيا, سوڭعى جارتى عاسىردا ون بەس مەملەكەتتىك توڭكەرىستى باستان وتكەرگەن سيريانىڭ كۇنى نە بولدى؟
وزگەرىستەر البەتتە قاجەت, بىراق قانتوگىس پەن ەلدىڭ شاڭىراعىن شايقاۋ ارقىلى ەمەس. قاسىم-جومارت توقاەۆتىڭ العا تارتقانى دا – وسىنداي وركەنيەتتى جول. ال ەندى ساياسي رەفورمالاردىڭ جالعاسىن ءسوز ەتسە, مەملەكەت باسشىسى 1 ناۋرىزدا Nur Otan پارتياسىنىڭ كەزەكتەن تىس سەزىن شاقىرتۋ تۋرالى شەشىم قابىلدادى.
وعان بۇكىل ايماقتاردىڭ وكىلدەرى قاتىسىپ, جاڭا قازاقستاندى قۇرۋ مىندەتىنە ساي پارتيانى جاڭارتۋ جانە ونىڭ الەۋەتىن جۇمىلدىرۋ ماسەلەلەرى قارالادى. مۇنىڭ ءوزى ءتيىستى وزگەرىستەردىڭ ۇدەمەلى, الايدا اسىعىستىققا نە اسىرا سىلتەۋگە جول بەرمەي بايسالدى ءجۇرىپ جاتقانىن تاعى دا بايقاتادى.
قالاي بولعاندا دا قوعامدىق-ساياسي ساحنادا باسقا كۇشتەر ءالى قالىپتاسىپ ۇلگەرمەي وتىرعاندا, اعىمداعى تۇيتكىلدەر مەن مىندەتتەر جەدەل شەشىمدى تالاپ ەتكەندە باسقاشا ارەكەت ەتۋ زور قاتەلىك بولار ەدى. سايىپ كەلگەندە كەز كەلگەن رەفورما اتاۋلى الدەبىر ەكسپەريمەنت ەمەس, بۇگىن ءساتسىز شىقسا ەرتەڭ قايتا بايقاپ كورەتىن. تۇتاس ەلدىڭ, ميلليونداعان ازاماتتىڭ تاعدىرى ءسوز بولعاندا جاۋاپكەرشىلىك پەن قىراعىلىق ءاردايىم ءبىرىنشى ورىندا بولۋ كەرەك.
راسۋل جۇمالى,
ساياساتتانۋشى
